Read Hadiyya Iyyaas Kitaaba 24 Bible Online

Iyyaas Kitaaba 24 - Hadiyya bible

Iyyaas Kitaaba 24

¹Ee lasage Iyyaas Isra'ee'l sulli hundam seekeemanne wixxaa'ukko; Isra'ee'l lommanna, awwonsaano, oogataanoo daannuwwaa weeshukko; ixxuwwim Waa'i illagenne wixxito'o.

²Iyyaasim minaadabina hundinam «Isra'ee'l Moollanni Waa'i ‹Lobakat doolliinsi illageen gaassi ki'nnuwwi anno'i Efiraaxis daajji eeqidonne mulli waa'uwwanne otossitu'uuyyi hee'llo'o; Abrihaaminaa Naakoorinaa anni hee'u Taara'i ee keeninne maqirem hee'ukko.

³Ki'nnuwwina anni hee'u Abrihaam ee daajji eeqidonne yoo uulliinsi woraa Kana'aa'n uulli hundam uwwummo. Odim Yisaaqam ixxena uwwummo ixxi shumo'om Fikkaannisummo.

⁴Yisaaqina Yaaqoobaa Eesa'aa uwwummo; Eesa'ana Eedoo'm duuna gulummi issaa uwwummo; Ihukkaarem Yaaqoobii ixxi oosii Gibxi uulla dillito'o.

⁵Ee lasage Muse'ee Aaroonaa asse'ummo. Gibxi uulli mannam boobaninne aphphisaa lasage ki'nnuwwa ee beyyiinsi fissummo.

⁶Ki'nnuwwi anno'om Gibxiinsi fissummi ammane Ertira'i Dambalaqa affakko'o; faraxxi gaarre'innee faradaaninnee Ertii'l Dambalaq afeebe'e hollansito'o.

⁷An hara'mmoommisina I kollonne laatto'aare ixxuwwaannonnee Qibxi uulli manni lambe'ennee tuunsi ihoo'isa issummo; dambalaqam Gibxi uulli mannanne dabaraa ixxuwwa xuuxoo'isa issummo, Gibxanne issummoka ki'nnuwwi laqqakkamo. Udma'i uullannem lobakat ammane hee'llakko'o.

⁸Ee lasage Anim ki'nnuwwa Yoordaanoosiinsi eelliinchi firinne hee'llam Amoore'i manni uulla worummo. Ixxuwwim ki'nnuwwinne qasanto'aare An ixxuwwa ki'nnuwwi anganne higisaa uwwummi bikkina ixxuwwi uulla ki'nnuwwi lago aa'llakkamo iaxxuwwam bi'isummo.

⁹Ee lasage Moo'aaphphi adil hee'u Siifor beet Baalaq Isra'eelinne orameena ki'ukko; ki'nnuwwam qangona Bii'eer beet Baala'aama weeshukko.

¹⁰Ihukkaarem An Baala'aamika macceeseena hasummibee'i bikkina ixxi ki'nnuwwa lobakatisa maasse'ukko. Anim ki'nnuwwa ixxi angiinsi gatisummo.

¹¹Yoordaanoosa fittakka'a Iyyaarko'o waattakko'o; Iyyaarko'i manni ki'nnuwwinne oranto'o; ee'isam Amoore'i manni, Feerze'i manni, Kana'aa'n manni, Hiite'i manni, Gergeese'i manni, Eewi'i mannii Iyyaabuus mannii ki'nnuwwinne oranto'o. Ihukkaarem An ixxuwwa ki'nnuwwi anganne higisaa uwwammo.

¹²Ki'nnuwwi illagiinsi lamem Amoore'i manni adilluwwam fissaa hollukkok an asse'ummi haldiishsha bagaan ki'nnuwwi bisa'ayyo te'im ki'nnuwwi xiyyayyo.

¹³Badattakkobee'i uullaa baxxakkobee'i beero'oo ki'nnuwwina uwwummaare eekke'ennem afuuttakko'o; kaassakkobee'i woyi'n mishiinsii wee'l mishiinsii ittakkamuulla› yoolla.

¹⁴«Kabadem Waa'a baddehe. Xabbeenoominnee amma'nnantakko'oo keen ikkakka'atii Waa'a awwaaddehe. Ki'nnuwwi anno'i Mesophphoxaame'ennee Gibxannee otossitam hee'llo'i Waa'i bikkenne otossitakkam waa'uwwa ki'nnuwwiinsi qeessitakka'a hanqo'i Waa'anne xale'enne otossi'llehe.

¹⁵Waa'anne otassimmi ki'nnuwwina jora labaa moo'amaakkoohaare ki'nnwwi anno'i Efiraaxis daajji eeqidonne hee'llu'uuyyi Waa'i bikkenne otossito'i qophpha'n waa'uwwa te'im kaba yoontakke'i uullanne hee'llo'i Amoore'i manni Waa'i bikkenne otossitam waa'uwwina otossitakkamoka kaballa doo'llehe; ihukkaarem anii i abaroosii Waa'anne otossinoommo» yukko.

¹⁶Minaadabim «Waa'a ullaa ixxi bikkenne mulli waa'uwwanne otossimmi niinniinsi qee'llona.

¹⁷Ni Moollanni Waa'i niyyanno'oo neesee Gibxi uulli agiddaniinsi fissukkisaa ni illagennem issu maalalsiisoo mare'uwwaa hundam moo'nnaammo; mallummi googonne hundannee hingummi mulli minaadaphphi lambe'enne hundannemii neese xumminne egeraakko.

¹⁸Ee'isam ka uullanne hee'llo'i Amoore'i mannaa mulli minaadabaa hundam ni illagiinsi hollaakko; ee bikkina ixxi niina Waa'i ihu bikkina ixxena awwandoommo» yita'a dabatto'o.

¹⁹Iyyaasim minaadabina «Ixxi keesammaa to'achchoo Waa'aa ihu bikkina ixxena awwaaddakkeena xantakkamoyyo; ixxim ki'nnuwwi baxxakkam baaxiiloo boqqoomaa haafooyyo.

²⁰Ki'nnuwwimdu Waa'a uttakka'a ixxi bikkenne mulli waa'uwwanne otossitakkolas kinnuwwa quunqinne daba'llaa guzumo'ookko; ki'nnuwwam bi'isookko» yukko.

²¹Minaadabim Iyyaasina «Ee'isa hore'em ihoone; neese Waa'anne otossinoommo» yito'o.

²²Iyyaasim ixxuwwina «Waa'anne otossitakkeena doo'llitakko'isina ki'nnuwwi bikkina ki'nnuwwi minaadabim «Eeyya! Nees naqaashshuwwa!» yito'o.

²³Ixxim «Eehid ihulasa'e ki'nnuwwi lambe'enne yoo mulli waa'uwwa hoollehe ki'nnuwwi wodanom Isra'ee'l Moollanni Waa'i kollonne daballehe» yukko.

²⁴Minaadabim Iyyaasina «Ni Moollanni Waa'ina otossinoommo; ixxi ijaajom egelloommo» yito'o.

²⁵Ee bikkina Iyyaas ee ayyaamo minaadabinne maqire hidi'l sagara aagukko. Seekeemannem ixxuwwina seeraa gatti ogoraa uwwukko.

²⁶Iyyaasim ee seeraa gatti ogoraa hundam Waa'i see'l kitaabanne kitaabukko. Ee lasage mat lob kina massaa Keesammi Mi'n gadanonne yoo qilxokkichchi lugumonne kaasukko.

²⁷Ixxim minaadabina hundinam oono'llehe! Ku kin niina naqaash ihookko; mashka'oomim Waa'i niina wocu sagara hundam macceesaakko. Ee bikkina ki'nnuwwi Waa'a laggakkambee'isina egereena ku kin ki'nnuwwina naqaash ihookko» yukko.

²⁸Ee lasage Iyyaasim minaadab hundam annannichchom ixxi gaqqi uulla maroo'isina geegesukko. Ixxuwwim matto'o.

²⁹Oo luwwi hundim ihaa lasage Waa'ina awwaadaanchi Naawwe'i beet Iyyaasik umur xibbee tommi hiinchoo ihaakkoohaannonne lehukko.

³⁰Minaadabim Iyyaaso duunaam Efiree'm uullanne Gaa'aash duuniinsi hanaa'n qaranne yoo ixxi gaqqi uullanne Tiimnaatseeraahanne waammito'o.

³¹Iyyaas foorinne hee'u doollenne hundannee ee lasagem Waa'i Isra'eelina issu maalalsiisoo luwwa hundam moo'llo'i lommanni hee'llo'i doolli hundannee Isra'ee'l minaadab Waa'anne otossito'o.

³²Isra'ee'l minaadab Gibxiinsi eebbo'i Yooseef miqe Seekeemanne waammito'o. Oo beyyim Yaaqoob Sheekeemina anni hee'u Hamoor oosiinsi mat xibbi kin birina bitaa'u uulli hee'ukko. Oo uullim Yooseef shumo'ina uwwamukko.

³³Ee'isam Aaroon beet Ali'aazarim lehukko; ixxim duunaam Efireem uullanne oohim ixxi beet Fiinihaasina uwwu hoffi Giibi'i uullanne waammamukko» yito'o.