Read Hadiyya Iyyaas Kitaaba 3 Bible Online

Iyyaas Kitaaba 3 - Hadiyya bible

Iyyaas Kitaaba 3

¹Iyyaas soodaraar daram ki'ukko; ixxii Isra'ee'l minaadabii hundim Saxiima yakkam beyyiinsi ki'lla'a Yoordaanoos Daajje watto'o; ee daage fitteena illageen eekke'enne wiiddanto'o.

²Sas balliinsi lasage minaadaphphi awwonsaan ee wiidda'n lambe'inne higgo'o.

³Ixxuwwim minaadabin «Ki'nnuwwi Moollanni Waa'ika Hidi'l Saga'l Saaxina Leewi'i oosiinsi qeessuwwi iyyita'a moo'llakkam ammane yoontakke'i wiiddaniinsi ki'llakka'a ixxuwwa awwonnehe.

⁴Kanniinsi illageen ka googinne mattakka'a laqqakkambee'i bikkina googooma ixxuwwi moo'issamo; ee bikkina Waa'i Hidi'l Sagara dissakkam Saaxinanne hincitakkotte; ki'nnuwwaannonnee Waa'i Hidi'l Sagara dissakkam Saaxi'n lambe'ennee yoo qee'lloom lam kum angi ihona» yita'a ijaajjo'o.

⁵Iyyaasim minaadabina «Soodo Waa'i ki'nnuwwi lambe'enne maalallisiisoo luwwa baxoo bikkina ki'nnuwwi gaga muccussehe» yukko.

⁶Ixxim qeessuwwina «Hidi'l Sagara dissakkam Saaxina iyyitakka'a minaadaphphi illagenne higgehe» yukko. Ixxuwwim ee Hidi'l Sagara dissakkam Saaxina iyyita'a minaadaphphi illagenne higgo'o.

⁷Waa'im Iyyaasina «Muse'enne maqire ihummisam ee'isam kaballam kiinninne maqire yoommisa ku Isra'ee'l minaadab hundim la'oo'isina keese ixxuwwi illagenne kaballa iimiimaa'imma asheeroommo.

⁸Atim Hidi'l Sagara dissakkam Saaxina iyyitam qeessuwwina ‹Yoordaanoos Daajji gammala affakkam ammane wo'i woronne aaggakka'a uullehe› yitaa kure» yukko.

⁹Iyyaasim Isra'ee'l minaadabina «Kid hincitakka'a ki'nnuwwi Moollanni Waa'ika sagara macceessehe» yukko.

¹⁰Ixxim minaadabina «Hee'oo Waa'i ki'nnuwwi illagiinsi Kana'aa'n minaadabaa Hiiwe'i minaadabaa Ferize'i minaadabaa Gerigeese'i minaadabaa Amoore'i minaadabaa Iyyaabuus minaadabaa holloo ammane ixxi ki'nnuwwi lambe'ennetti ihukkisa laqqakkamo.

¹¹Macceesseehe; uulli hundinam Moollanni Waa'i Hidi'l Sagara dissakkam Saaxin ki'nnuwwi illagenne higaa Yoordaanoos firookko.

¹²Kabadem Isra'ee'l tommiinsii lamem sulliinsii anannichchiinsim mat mat mancho hincaa'llakka'a tommoo lam manchoo doo'llehe.

¹³Uulli hundinam Moollanni Waa'ikka Hidi'l Sagara dissakkam Saaxina iyyito'i qeessuwwi lokki Yoordaanoos Wo'i uullaa mat beyyonne wixxaa naaramooko» yukko.

¹⁴Ee bikkina minaadab Yoordaanoos Daajje fitteena wiiddanto'i beyyiinsi dukkaannuuwa gindita'a fitto'i ammanenne Hidi'l Sagara dissakkam Saaxina iyyito'i qeessuwwi ixxuwwi illagenne higga'a matto'o.

¹⁵Ammanoom hurbaata murakkam amman ihu bikkina Yoordaanoos Daajji wo'mmaa hee'ukko. Hidi'l Sagara dissakkam Saaxina iyyito'i qeessuwwim Yoordaanoos Dajji gammala affa'a ixxuwwi lokki wo'onne aagu ammanenne

¹⁶hanaanaad daadoo wo'i uullukko. Xaartaan gadanonne yoo Addaam yakkam qee'llonne yoo beero'onne afeebe'e mat beyyone wixxukko. Sooqixxi Dambalaqanne daadaa dilloo wo'i ma'llichchim daadoobee'isa uullukko. Minaadabim fittu'uuyyi Iyyaarko'i ixxuwwi illagenne hee'ukko.

¹⁷Isra'ee'l minaadab hundichchim Yoordaanoos Daajje gogaalli uullinne fitteebe'i afeebe'e Waa'ika Hidi'l Sagara dissakkam Saaxina iyyito'i qeessuwwi Yoordaanoos Daajji lambe'enne qoxxita'a uullita'a hee'llo'o.