Read Hadiyya Iyyaas Kitaaba 4 Bible Online

Iyyaas Kitaaba 4 - Hadiyya bible

Iyyaas Kitaaba 4

¹Minaadab hundichchim Yoordaanoos firaa lasage Waa'i Iyyaasina,

²«Minaadaphphi lambe'iinsi tommiinsii lamem sulliinsii mat mat mancho doo'llitaa tommoo lammancho aa'e.

³Ixxuwwim Yoordaanoos Daajji lambe'enne qeessuwwi uullito'i beyyiinsi tommoo lam kinaa ki'issa'a iyyita'a ki'nnuwwinne maqire matta'a kaballi maaro'o gattakkam beyyonne dissitamisina ijaaje» yukko.

⁴Ee lasage Iyyaas Isra'ee'l minaadaphphi tommiinsii lamem sulliinsii annannichchiinsim mat mato doo'llu tommoo lamem manchoo weshukko.

⁵Iyyaasim ixxuwwina «Ki'nnuwwi Moollanni Waa'ika Hidi'l Sagara disakkam Saaxi'n illagenne higgakka'a Yoordaanoos Daajji lambe'enne mallehe. Ki'nnuwwi annannichchim Isra'ee'l sulli xiqqisanne mat mat kina ki'issakka'a ki'nnuwwi gudumonne iyyehe.

⁶Ku kinneewwi Waa'i Isra'ee'l minaadabina issu luwwi hundam tiissiisoohane; lasaqqi doollennem ki'nnuwwi oos «Ku kinneewwi marichcho» yita'a ki'nnuwwa xa'mmitam ammane

⁷ki'nnuwwim ixxuwwina Waa'i Hdi'l Sagara dissakkam Saaxi'n illagenne Yoordaanoos Daajji wo'i uullukkisaa oo daajji uullu ammanenne Hdi'l Sagara dissakkam Saaxin firukkisaa ku kinneewwi Isra'ee'l minaadabina heer heerinam tiissiisoohan ihukkisaa kuttakkamo» yukko.

⁸Isra'ee'l oosim Iyyaas ijaajukkisa issito'o; Waa'im Iyyaasina kurukkisanne Isra'ee'l xiqqisanne Yoordaanoos lambe'iinsi tommoo lam kinaa ki'issa'a iyyita'a gattam beyyi afeebe'e massita'a dissito'o.

⁹Iyyaasim Hidi'l Sagara dissakkam Saaxina iyyito'i qeessuwwi uullita'a hee'llo'i Yoordaanoos Daajji lambe'enne mulli tommoo lam kinaa uullissukko. Oo kinneewwim kaballi afeebe'e eekke'em yookko.

¹⁰Muse'e Iyyaasina uwwu ijaaccisannem minaadabim Iyyaas kuroo'isina Waa'i ijaaju luwwi hundim wo'mmeebe'i afeebe'e Waa'ika Hdi'l Sagara dissakkam Saaxina iyyito'i qeessuwwi Yoordaanoos Daajji lambe'enne uullita'a egetto'o. Minaadabim qaqqissa'a ee daajje fitto'o.

¹¹Minaadab hundim fitta'a lasage ixxuwwi moo'llonam Waa'ika Hdi'l Sagara dissakkam Saaxina iyyito'i qeessuwwi daajjiinsi fitta'a ee minaadaba awwonsito'o.

¹²Roobeel sulli, Gaad sullii Minaas sulliinsim kollii Muse'e ijaajukkisanne ikka'a o'l mu'uta amadda'a Isra'ee'l oos illagenne higga'a fitto'o.

¹³Sor kuma ikkam manni agilluwwaa bagadduwwaa amadda'a orina Iyyaarko'i gadanonne yoo biir uulla Waa'i illagenne higga'a fitto'o.

¹⁴Waa'i ee balla Isra'ee'l oos illagenne Iyyaaso iimiimaa'ukko; ixxuwwim Muse'e lonsito'isam Iyyaasom ixxi heechchi doolli hundannem lonsito'o.

¹⁵Waa'im Iyyaasina

¹⁶«Waa'ika Hdi'l Saga'l Saaxina iyyito'i qeessuwwi Yoordaanoos Daajjiinsi fittamisina ijaaje» yukko.

¹⁷Iyyaasim qeessuwwina «Yoordaanoos daajjiinsi fillehe» yaa ijaajukko

¹⁸Waa'ika Hidi'l Saga'l Saaxina iyyito'i qeessuwwi Yoordaanoos daajjiinsi fitta'a ixxuwwi lokkim gogaal uulla hance'u ammanenne Yoordaanoos illagee'nnisam tochchiinsi tochchi afeebe'e wo'mmaa daadukko.

¹⁹Minaadabim luxxi aga'nnaannonne tommi ayyaamonne Yoordaanoosiinsi fitta'a Iyyaarko'iinsi eelliinchi firoo kolli gabalanne yoo Gelgalanne wiiddanto'o.

²⁰Iyyaasim ixxuwwi Yoordaanoosiinsi massito'i tommoo lamem kinam Gelgalanne kaasukko.

²¹Ixxim minaadabina «Ku kinneewwi mahane» yita'a xa'mmitamaare

²²Ixxuwwinam «Isra'ee'l oos ka Yoordaanoos daajje gogaalli ullinne fitto'o» yitakkamo.

²³Odim ki'nnuwwi Moollanni Waa'i neese Ertiira'i dambalaqa filleembe'i afeebe'e ni illagiinsi gokkisukkisam ki'nnuwwim Yoordaanoos wo'o fittakeebe'i afeebe'e ki'nnuwwi illagiinsi gokkisukkisa kullehe.

²⁴Waa'i eekka issukkok ixxek angi wodaam ihukkisa uullanne yo'i minaadab hundim laqqamisinattee ki'nnuwwim ixxo heer heerinam badditakka misinattee» yaa kurukko.