Read Hadiyya Iyyaas Kitaaba 5 Bible Online

Iyyaas Kitaaba 5 - Hadiyya bible

Iyyaas Kitaaba 5

¹Yoordaanoos daajji eeqidonne eelliinchi aagginne hee'llo'i Amoore'i adilluwwii Meedeteraaniyaa'n Dambalaq gadanonne hee'llo'i Kana'aa'n adilluwwii hundim Isra'ee'l oos higgeebe'e Yoordaanoos wo'o waa'i hinkid gokkisuda'e macceesso'o; ee bikkina ixxuwwi wodan baachchinne bukkamukko. Isra'ee'l oosinnem uullixanteena xanto'oyyo.

²Ee ammane Waa'i Iyyaasina «Banca axxissaa Isra'ee'l oosika ballachchantobeekeeno ballachche» yukko.

³Ee bikkina Iyyaas banca axisaa «Ballachchimmi duunaa» yamamoo beyyonne Isra'ee'l ooso ballachchukko.

⁴Iyyaas ballachchu mashka'im Gibxi uulliinsi fitto'i minaadaphphek gaadina affa'a hee'llo'i goon hundim Gibxiinsi fitta'a lasage udma'i uullanne googonne leta'a beeddito'i bikkinatte.

⁵Ee ammane Gibxiinsi fitto'i minaadaphphek goon hundichchim ballachchanto'aarem googonne qaranto'i goo'n oos hundim ballachchanto'oyyi hee'llo'o.

⁶Gibxiinsi fitto'i ammane orina affa'a hee'llo'i Isra'ee'l oosik goon hundim Waa'ina ijaajantobee'i bikkina leta'a beedditeebe'i afeebe'e Isra'ee'l oos sor hiincho udma'i uullanne karkaaddo'o. Waa'i oos oosina uwweena ixxuwwi anno'ina hide'aa hee'u adii marabii daadoo uulla illinne moo'llambee'isa hide'ukko.

⁷Waa'i ixxuwwi bikkenne ixxuwwi ooso ki'isukko; googonne hee'llu'uuyyi qaranto'i goo'n ooso ballachchukko.

⁸Oo keen ballachchanta'a lasage mada fayye'lleebee'i afeebe'e minaadab hundim wiiddanto'i beyyonne afuutto'o.

⁹Waa'im Iyyaasina «Gibxi uulli agidda'n maala ki'nnuwwiinsi onkoroollisaammo» yukko. Ee bikkina ee beeyyi summi kaballi afeebe'e «Gelgala» yamamookko.

¹⁰Isra'ee'l oosim Iyyaarko'i hincitenne yoo Gelgalanne wiiddanta'a hee'llo'isam aga'nnaannonne tommonnee soo'l ayyaa'm hiimonnee eekke'em Shaashshiqqi Uguda lonsito'o.

¹¹Shaashshiqqi Uguxxi la'm darinam uulli mishiinsi qorosho'oo goodakko'i hamaamaa itto'o.

¹²Ee uulli mishiinsi itto'i la'm dariinsi ki'isaa maanna'a yakkam hurbaat iimaaniinsi ga'nnimma urukko. Ee hiinchonne Isra'ee'l oos Kana'aa'n uullii mishiinsi itto'o bagaan la'mmeka ee maanna'a siiddeena xanto'oyyo.

¹³Iyyaas Iyyaarko'ina hincitenne hee'ukkuuyyi bisa'a amadaakkoo manchi ixxi kollonne hincaa «At ni kolliinsettennii ni diina'i kolliinsette?» yukko.

¹⁴Ixxim Iyyaasina «Waa'i gogoxxi awwonsaanchi ihummi bikkina waaraammo bagaan ki'nnuwwi kolliinsi te'im ki'nnuwwi diina'i kolliinsi waarummoyyo» yukko. Iyyaasim uullanne illillaachcha ubaa «I moollanna an ki awwaadaanchi kiina maha issona hassootto?» yukko.

¹⁵Waa'i gogoxxi awwonsaanchim ixxena «At uullitti beeyyi keesamaakkoohan ihu bikkina ki lokkiinsi caamma'a fisse» yukko. Iyyaasim oo Waa'i gogoxxi awwonsaanchi yukkisa issukko.