Read Hadiyya Iyyaas Kitaaba 6 Bible Online

Iyyaas Kitaaba 6 - Hadiyya bible

Iyyaas Kitaaba 6

¹Isra'ee'l ooso baddimiinsi ki'ukkok Iyyaarko'i qash gooc qoxxaallisa xufamaa waardiyyinne egeramaa hee'ukko; ee bikkina beero'o aagookkokii firookkokii ayyim hee'ukkoyyo.

²Waa'im Iyyaasina «Oono'o; Iyyaarko'oo Iyyaarko'i adilaa qoxalluwwi gaadaanoo ki anganne higisaa uwwaammo.

³Atii ki gaadaanii beero'ooma ballanne mataagge loh balli afeebe'e.

⁴Lamarem qeessuwwim lamar xurumba Waa'i hdi'l saga'l saaxxi'n illagenne amaddamisa isse; odim lama'l ballanne qeessuwwi xurumba fuggu'uuyyi beero'ooma lamaraagge do'llehe.

⁵Ee lasage qeessuwwi xurumba uttambee'isa fuggona; xurumbikkam sagara maccessakkam ammane minaadab hundim lobakata shuurona; ee ammane beero'ik qash uboohaare manni hundichchim ee beero'o xabbaa aagona» yukko.

⁶Naawe'i beet Iyyaasim qeessuwwa weeshaa «Waa'ika Hidi'l Saga'l Saaxina iyyehe; ki'nnuwwiinsim lamar qeessuwwi lamar xurumba amadda'a Waa'i Hidi'l Saga'l Saaxi'n illagenne mattona» yukko.

⁷Minaadabinam «Beero'ooma mattakka'a doo'llehe; gaadaanim Waa'ika Hdi'l Saga'l Saaxina higga'a mattona» yukko.

⁸Iyyaasim minaadaba ijaaju ammanenne lamaren qeessuwwim lamar xurumba amadda'a fuggu'uuyyi Waa'i illagenne matto'o; ee ammane Waa'ik Hidi'l Saga'l Saaxin ixxuwwa awwonam hee'ukko.

⁹Gaadaanim xurumba fuggam qeessuwwi illagenne higga'a mattu'uuyyi ixxuwwi hara'mmitam keenim Hidi'l Saga'l Saaxina awwonta'a mattam hee'llo'o ee amman hundam qeessuwwi uttambee'isa xurumba fuggam hee'llo'o

¹⁰Iyyaasim minaadabina «An shuullehe» yoommaare shuuttakkam bikkina «Shuullehe» yoommi amman afeebe'e shuuttakkotte; ki'nnuwwi suumiinsim matem sagarim firoonee macceesamoonee» yaa ijaajukko.

¹¹Ixxim minaadab Waa'i Hidi'l Saga'l Saaxininne maqirem beero'ooma mataagge do'llamisa issukko; ee lasage minaadab wiiddanto'i beyyo daba'llita'a gatto'o.

¹²Iyyaasim soodaraar daram ki'ukko; qeessuwwi Waa'ika Hidi'l Saga'l Saaxina iyyito'o

¹³Lamarem qeessuwwim lamar xurumba amadda'a uttambee'isa fuggu'uuyyi Waa'i Hidi'l Saaxi'n illagenne higga'a matta'a hee'llo'o; gaadaanim ixxuwwi illagenne mattam hee'llo'o; ixxuwwi hara'mmitamkeenim Hidi'l Saga'l Saaxi'n lasonne awwontam hee'llo'o; ee amman hundam xurumbi fugamam hee'ukko.

¹⁴La'm ballinam beero'ooma mataagge do'lla'a wiiddanto'i beyyo daba'llito'o. Lohem ballam ee'isa issito'o.

¹⁵Odim lama'l balli soodukkuuyyi daram ki'lla'a beero'ooma lamar kore do'llo'o. Lamar kore do'llo'ok xale'i ee balli hee'ukko.

¹⁶Lama'l kore do'llo'i ammanenne qeessuwwi xurumba fuggo'o; Iyyaasim minaadabina «Waa'i beero'ooma ki'nnuwwina higisaa uwwu bikkina shuullehe.

¹⁷Beero'oomaa beero'i woronne yoo luwwaa hundam Waa'ina hincaa'akko'i kiti'mmisa issitakka'a ma'llichchim gatoobee'isa bi'issehe. Neese asse'nnummi shaashshitam keeno maaxxa'a gatisso'i bikkina buubbeesaanchi Rahaabee is minenne yoo luchchoo hundam shitakkotte.

¹⁸Ihukkaarem hirim ihu luwwiinsi ma'llichchom massitakka'a hawwo eebaqqitakkambee'isa ki'nnuwwi gaga ege'llehe; hirim ihu luwwiinsi massitakka'a Isra'ee'l gattenne u'nnii duunchii afoo'isa issitakkamo.

¹⁹Ihukkaarem bir, worqi, xaariinsii naas xaariinsii baxaamu mu'utii hundim Waa'ina keesamaakkoohan ihu bikkina Waa'i mu'ut afuuroo beyyonne dissamona» yukko.

²⁰Qeessuwwi xurumba fuggo'i ammanenne minaadab shuutto'o; xurumbika sagara macceesso'isam minaadab lobakata shuutto'o. Ee beero'i qash gindamukko; gaadaan hundichchim matem hawwi bee'em beero'o aagga'a qeefaddo'o.

²¹Ee lasage beero'i wororonne hee'u luchchi hundichchom goona, meento, harde'e, lommanna, mirgo'uwwa, gereebbaa, hallaa qare'aalli bisa'inne ma'llichchim gatoobee'isa bi'isso'o.

²²Iyyaasim ee uulla shaashshitto'i lamem manchinam «Buubbeesaanchi meentichchi mine mattakka'a isena hide'llakko'isinnem isee is abaroosaa hundam fissehe» yukko.

²³Ee bikkina ixxuwwi Ra'aab mine aagga'a ise, is anna, ama, abbaayyuwwa, abaroosaa qaroo hundam fissita'a Isra'eel wiiddanto'i beyyiinsi tochchonne dissito'o.

²⁴Beero'oo woronne yoo luwwaa hudam giirinne shokkiisso'o. Ihukkaarem bira, worqaa naasiinsii xaariinsii baxamu mu'uttuwwaa waa'i mu'ut afuuroo minenne dissito'o.

²⁵Iyyaarko'o shaashshitamisina Iyyaas asse'u lamem manchom buubbeesaanchi Ra'aabe maaxxa'a gatisso'i bikkina ise, is anni abaroosaa is abaroosaa hundam Iyyaas gatisukko; is shumo'im kaballi afeebe'e Isra'ee'l lambe'enne yookko.

²⁶Ee ammane Iyyaas «Ka Iyyaarko'i beero'o baxeena ki'oo mancho Waa'i duumaakkoohan ihona; shooho'o muroohaare won beeto hoogona; qash goocam uullisoohaare hoffi beeto hoogona» yukkuuyyi qoxxaalli hidiro gassukko.

²⁷Waa'i Iyyaasinne maqire hee'u bikkina uulli hundannem ixxek sad firukko.