Read Hadiyya Iyyaas Kitaaba 7 Bible Online

Iyyaas Kitaaba 7 - Hadiyya bible

Iyyaas Kitaaba 7

¹Isra'ee'l oos hirim ihu luwwa bi'isimma hoogimminne Waa'a hawwoddo'o oohim Yihuxxi sulliinsi Zaara'i moolliinsi Zabid abaroosiinsi Kaarim beet akkaane hirim ihu luwwiinsi massukko. Ee bikkina Waa'i Isra'ee'l oosonne lobakata quuqukko.

²Iyyaasim Beeteeliinsi eelliinchi firinne beeti'aawe'ina gadanonne yoo Aay beero'o Iyyaarko'iinsi manna asse'aa «Fillehe uullooma shaashshehe» yukko. Oo mannim fitta'a matta'a uullooma shaashshito'o.

³Ixxuwwim matto'i beyyiinsi Iyyaas beyyo daba'llita'a «Lam kuma te'im sas kuma ikkam manni matta'a Aay beero'o aphphissona bagaan minaadab hundichchim mattoone; mashka'oomim ixxuwwi hofqax mannam ikko'i bikkina hundichchim ee beyyo matta'a badattoone» yito'o.

⁴Ee bikkina sas kuma ikkam manni Aay beero'o matto'o ihukkaarem Aay beero'i manni illagiinsi gibbo'o.

⁵Aay beero'i mannim ixxuwwa ee beero'i qash goociinsi ki'issa'a kina anakkam beyyi afeebe'e aad hootta'a hollitu'uuyyi qasso'o; ixxuwwiinsim sadee lohoo ikkam qax manna shito'o; ee bikkina Isra'ee'l minaadaphphek wodan baachchinne bukkamaa wo'isa ihukko.

⁶Ee ammanenne Iyyaas ixxi eddechcha dereerukko; ixxii Isra'ee'l lommannii Waa'i Hidi'l Saga'l Saaxi'n illagenne uulli hiimeebe'e uullanne illillaachcha ubbo'o. Ixxuwwi horoorennem buchcha laphphito'o.

⁷Iyyaasim «Moollanni Waa'a, neese Amoore'i anganne higissaa uwwiteenaa bi'isseenaa mahina Yoordaanoos daajje fissitto. Yoordaanoos eeqidonne afuurimmi niina e'llam hee'ukkoyyonihe?

⁸Waa'a, Isra'ee'l minaadab ixxuwwi diina'i illagiinsi gibbolas mayyoommo;

⁹Kana'aa'n mannii ka uullanne yoo mulli minaadabii hundim ka woshsha macceessa'a neese kibbita'a guullitamo; ni summam ka uulliinsi bi'issamo; ki geejji summi bikkina marichcho issitootto?» yaa uunxukko.

¹⁰Waa'im Iyyaasina «Ki'e! Mahina uullanne illillaachcha ubbaate?

¹¹Isra'ee'l minaadab an ijaajummi hidi'l sagara gindita'a hirim ihu luwwa game'lla'a massita'a ixxuwwi mu'uxxi woronne maaxxo'ookkoo qophphanto'ookkoo; ee'isa issimminne eese hawwoddo'ookko.

¹²Ee bikkina Isra'ee'l minaadab ixxuwwi diina'i illagenne uulliteena xantamoyyo. Ixxuwwi duumanto'oo keen ikko'i bikkina ixxuwwi diina'i illagiinsi gibbamo; hirim ihaakkoo luwwa ixxuwwi lambe'iinsi bi'issobeelas ka lasage an ixxuwwinne maqir ihoommoyyo.

¹³Mare! Ka minaadaba muccusse! Ixxuwwinam ‹Ki'nnuwwi lambe'enne hirim ihaakkoo luwwi yoo bikkina Isra'ee'l Moollanni Waa'i sood afeebe'e ki'nnuwwi gaga muccussaqqehe! Isra'eela! Ka hirim ihaakkoo luwwa ki lambe'iinsi fissitbeelas ki diina'i illagenne uulliteena xantooyyo

¹⁴Ee bikkina soodo daram sulli sullinne hinci'llehe; an annanni issoommi sulli moollinne moollinne hincihona; ee'isam an annanni issoommi moolli abaroosinne abaroosinnem hincihona; odim an annanni issoommi abaroos annannichchim hincihona.

¹⁵Hirim ihu luwwa issu manchi iinninne aagu hidiro gindaa Isra'eelanne jor sholle'nna afisu bikkina ixxi massu luwwii yoo luwwii hundim giirinne shokkona› yoolla yihe» yukko.

¹⁶Iyyaasim la'm ayyaamo soodaraar daram ki'aa Isra'eela sullinne sullinne hincaa'ukko. Ee keeniinsim Yihuxxi sulli annanni ihukko.

¹⁷Ixxim Yihuxxi sullo moollinne moollinne hincaa'ukko. Ixxuwwi shumo'om abaroosinne abaroosinnem hincaa'ukko. Ixxuwwiinsim Zabid abaroosa annanni issukko.

¹⁸Zabid abaroos annannichchim hincu ammanenne, Yihuxxi sulliinsi Zaara'i moolliinsi Zabidaan beet hee'u Kaarme'i beet Akkaan annanni ihukko.

¹⁹Ee lasage Iyyaasim Akkaanina «I beeto Isra'ee'l Moollanni Waa'ina ki baaxiilo biiraa yimminne lomba uwwe; issitti luwwam maaxxoo'n iina kure» yukko.

²⁰Akkaanim ixxena dabaraa «Hanqame; Isra'ee'l Moollanni Waa'a baaxiilo baximminne hawwodaammo; issummokim kane.

²¹Boggi mu'uxxi lambe'enne mat mishisoo Baabiloo'n manni kaabba, lam kiilo'o ihoo biiraa kiilo'oo kolloo ihoo worqaa moo'aa mixummi bikkina massummo. Ee mu'utam i dukkaa'n woronne birooma hundiinsi woroon issaa uullanne waammaammo» yukko.

²²Ee lasage Iyyaas mat qax manna asse'ukkaare ixxuwwim dukkaa'n beyyo geetta'a matta'a biroom woroonette ihaa mu'utoom waammammukkisam siiddo'o.

²³Ixxuwwim eekka dukkaa'n woriinsi fissita'a Iyyaasii Isra'ee'l oosii hundim yoo beyyo eebba'a Waa'i illagenne dissito'o.

²⁴Iyyaasii Isra'ee'l oosii hundim Akkaana, bira, worqa, kaabba, ixxeka goo'n ooso, landaa mirgo'uwwa, halla, gereebba, dukkaanaa ixxena yoo luwwaa hundam «Hawwi cebba» yakkam beyyo massito'o.

²⁵Iyyaasim Akkaanina «Mahina neese u'nnissitto? Waa'im kaballa keese u'nnisooko» yukko. Isra'ee'l oos hundim Akkaana aphphissa'a shito'o. Ee lasage ixxi abaroosaa ixxena yoo luwwaa hundam kininne aphphissa'a giirinne shokkiisso'o.

²⁶Ixxuwwim ixxi hanenne kaballi afeebe'e yoo lobakat kina tuubbo'o. Ee lasage Waa'i lobakat quunqiinsi daba'llukko. Ee bikkina ee beyyi summi kaballi afeebe'e «Hawwi cebba» yamamookko.