Read Hadiyya Iyyaas Kitaaba 8 Bible Online

Iyyaas Kitaaba 8 - Hadiyya bible

Iyyaas Kitaaba 8

¹Waa'im Iyyaasina «Badditittee muggitittee; gaadaan hundam kiinninne masse; Aay adila, minaadaba, beero'oomaa uulloomaa ki anganne higisaa uwwoommo.

²Kanniinsi illageen Yaarko'onnee Yaarko'i adilannee issittisam Aayannee Aay adilannee issitootto. Kaba ihukkaarem Aay beero'iinsi boggakkam amaxxaa fooraam diinatee ki'nnuwwi gagina massitakkamo. Beero'iinsi afareen gafannita'a qassam keen maaxamta'a egettamisa isse» yukko.

³Ee bikkina Iyyaasii gaadaanii hudim. Aay beero'o matteena ki'llo'o. Iyyaasim ee keeniinsi sad kum qoxalluwwaa malayyaammuwwi mannaa doo'llaa hiimonne asse'ukko.

⁴Iyyaasim ixxuwwina «Beero'iinsi afareen beero'ooma qassakkeena xantakkam beyyonne maaxamtakka'a guddakka'a egellehe bagaan beero'iinsi qee'llitakkotte.

⁵Anii iinninne maqire yoo minaadabii hundim beero'onne hincinoommo. Ka illageen inkummisam qasseena fittamaare ixxuwwiinsi gimboommo.

⁶Kanniinsi illageen gimbummisam ixxuwwa baddinaa gimbummoka labissa'a neese hollitam ammane beero'iinsi qee'lliteebe'i afeebe'e gimboommo.

⁷Ee ammane ki'nnuwwi moollanni Waa'i beero'ooma ki'nnuwwi anganne higisaa uwwoo bikkina maaxamtakko'i beyyiinsi fittakka'a beero'ooma amaddehe.

⁸Beero'o amaddakka'a lasage Waa'i ijaajukkisannem giirinne shokkiissehe. Waa'i yukkisannem issitakkamisina ku keen ki'nnuwwi issitakkona uwwummi ijaajo» yukko.

⁹Ee lasage Iyyaas ixxuwwa asse'ukkaare Aayenaa Beeteelinaa lambe'enne Aayena eelliinchi aagginne maaxamteena matto'o. Ihukkaarem Iyyaas ee hiimo minaadabinne maqirem garukko.

¹⁰Iyyaas la'm ayyaamo soodaraar daram ki'aa gaadaano weeshaa wixxaa'ukko. Ixxii Isra'ee'l awwonsaanii gaadaano awwonsita'a. Aay beero'o matto'o.

¹¹Ixxenne maqire hee'llo'i gaadaan hanaa'n qarinne ixxuwwinaa Aayenaa lambe'enne yoo cabbanne wixxito'o.

¹²Iyyaasim onti kuma ihoo manna doo'llaa Beeteelinaa Aayenaa lambe'enne Aay beero'iinsi eelliinchi aagginne gafannitamisa issukko.

¹³Gaadaanim ee beero'iinsi hanaa'n qarinnee eelliinchi aagginnee maaxamta'a afuutto'i gogotinne maqirem mat ikka'a qasseena hundam luwwam gudisso'o Iyyaasim ee hiimo cebbanne garukko.

¹⁴Aay beero'i adiim Iyyaasoo Iyyaas gogotaa moo'u ammanenne ixxii ixxi gogotii hundim Isra'eela qasseena gudda'a soodaraar daram Yoordaanoos Daajji gadanonne yoo cebbi lallabo qaqqissa'a matto'o. Ihukkaarem ee beero'iinsi afareen maaxamto'i gaadaan yo'isa laqqo'oyyo.

¹⁵Iyyaasii Isra'ee'l minaadabii hundim kaa'amto'an ikka'a ixxuwwi illagiinsi udma'i uulli kolli gibbo'o.

¹⁶Ee bikkina beero'onne yoo manni hundim ixxuwwa holliteena weeccanta'a mat ikko'o Ixxuwwim Iyyaaso hollitu'uuyyi beero'iinsi qee'llito'o.

¹⁷Aayiinsi Beeteeliinsi Isra'eela holleena firubee'i manchi hee'ukkoyyo. beero'i ooxxi gooc fooqukkisam utta'a Isra'eela hollito'o.

¹⁸Waa'im Iyyaasina «Aaya ki anganne higisaa uwwummi bikkina ki anganne amadditti bagado ee beero'i kollonne dabare» yukko. Iyyaasim ixxi anganne yoo bagado ee kollonne dabarukko.

¹⁹Iyyaas eekka issu ammanenne gafannita'a hee'llo'i Isra'ee'l gaadaan maaxamto'i beyyiinsi qaqqissa'a fitta'a beero'ooma qeefadda'a ee ammanem giirinne shokkisso'o.

²⁰Aay beero'i mannim laso daba'llita'a moo'llo'i ammanenne beero'iinsi wiriir iim hooraa firam hee'ukko; udma'i uulla gibbam hee'llo'i Isra'ee'l oos ixxuwwa hollitam hee'llo'i Aay manni kollonne daba'llito'i bikkina gibba'a xottam goog hore'em hee'ukkoyyo.

²¹Iyyaasii Isra'ee'l minaadabii hundim beero'iinsi afareen maaxamta'a hee'llo'i keen beero'ooma amaddo'isaa shokkisso'isaa moo'llo'i ammanenne laso daba'llita'a Aay beero'i manna shito'o

²²Beero'o amadda'a hee'llo'i Isra'ee'l oosim ixxuwwi hanenne waatto'i Isra'ee'l oos hundi kollinnem ixxuwwa kibbita'a matim xoroo'n shito'o.

²³Ihukkaarem Aay adila shitoo'nnim Iyyaas beyyo wotto'o.

²⁴Isra'ee'l ooso holliteena matto'i Aay beero'i manna hundam udma'i biiranne bisa'inne guullita'a shita'a lasage daba'llita'a Aay beero'onne gatu keen hundam bisa'inne shito'o.

²⁵Ee balla leto'i Aay beero'i mannik goonnekii meentikii xig tommoo lam kumaa hee'ukko.

²⁶Iyyaas Aay beero'onne hee'u manni hundam guullaa bi'iseebe'i afeebe'e qaseena bagado ki'isu anga dabarukkoyyo.

²⁷Waa'i Iyyaas ijaaju saga'llisannem Isra'ee'l oos ee beero'i fooraam diinatee mulli amaxxaa hundam ixxuwwi gagina qeefadda'a mossito'o.

²⁸Iyyaasim Aay beero'o shokkisaa kaballi afeebe'e yo'isam dolli hundinam udma'i uulli ihoo'isa issukko.

²⁹Aay beero'i adilam haqqanne saqalaa leesh uulli hiineebe'i afeebe'e calcaloo'isa issukko. Eelliinchi aagoo ammanenne Iyyaas ijaaju manni leesha haqqiinsi dilliissa'a beero'o aagakkam qash goocanne ubusso'o. Kaballi afeebe'e yoo lobakat kinam ee leesh hanenne tuubbo'o.

³⁰Ee lasage Iyyaas Geebaa'l Duunanne Isra'ee'l Moollanni Waa'ina kitima hincaa'akkam beyyo axisukko.

³¹Waa'ina awwaadaanchi Muse'e Isra'ee'l ooso ijaajukkisanne Muse'i See'l kitaabanne kitaabamukkisanne kitima hincaa'akko'i beyyom axisamukkok cabbaramubee'aanniinsettee xaar nakkubee'i kiniinsettee hee'ukko. Ee beyyonnem shokkoo kitimaa maateeyyoo'm kitimaa Waa'ina hincaa'llo'o.

³²Isra'ee'l oos moo'llonam Iyyaas ee kaasu kinneewwanne Muse'e kitaabu Seera kitaabukko.

³³Ee ammane Waa'ina awwaadaanchi Muse'e Isra'ee'l minaadab maasse'antamisina gaassaa ijaajukkisannem Isra'eel hundichchim lommannii gaaxxi awwonsaanii oogattam keenii ixxuwwi lambe'enne hee'llam waaraanii Leewi'i oos hee'llo'i qeessuwwi iyyito'i Waa'i Hidi'l Saga'l Saaxi'n illagenne qeddi kollinnee makki kollinnee uullita'a hee'llo'o; ixxuwwim kollii Gariizaa'n Duu'n kollonne kollii Geebaa'l duu'n kollonne afare dabatta'a uullito'o.

³⁴Ee lasage Iyyaas sagara iimaa'aa see'l kitaabanne maassi bikkinaa duunchi bikkinaa kitaabamu seer hundam qananaa'ukko.

³⁵Muse'e ijaajukkaannika Iyyaas mat sagaram gatisoo'n Isra'ee'llek meenti, ciilluwwii lambe'enne yoo waraanii wixxito'i wixxixxi beyyonne qananaa'ukko.