Read Hadiyya Iyyaas Kitaaba 9 Bible Online

Iyyaas Kitaaba 9 - Hadiyya bible

Iyyaas Kitaaba 9

¹Yoordaanoosiinsi eelliinchi agoo kollinne hansawwannee qaala'annee Meedeteraaniyaa'n Dambalaq tochchonne hanaa'n qarinnem Liibaanoos Duun afeebe'e hee'llo'i Keexe'ik, Amore'ik, Kana'aannek, Feerze'ik, Hiiwwe'ikii Yaabusikii adilluwwi hundim Isra'eel kaa'ukkisa maccesso'o.

²Ee lasage oo keen hundim Iyyaasoo Isra'eelaa qasseena mat ikka'a wixxito'o.

³Hiiwe'i shumo'insette hee'llo'i Gaba'oo'n manni ihukkaarem Iyyaas Yaarko'onnee Aayannee issukkoka macceesso'i ammanenne

⁴Iyyaaso qawwissam baxo baxxo'o. Ixxuwwim googina hasisoo hurbaata gudissa'a ixxuwwi hallannem moosir jooniyyaa ka illageenim awwaado uwwaa dereerammukkaare qaafunta edakko'oo woyi'n diqaasa issakkam ebeer canaa iyyiisso'o.

⁵Ixxuwwi lokkonnem ka illageenim issakka'a beeddukkaare gobakko'oo barbaasso'o issita'a moosir eddechcha edde'llo'o. Amaddo'i hurbaatim gogaakkoohanee buuhaakkoo qorosho'oo hee'ukko.

⁶Ee lasage Iyyaas yoo beyyo Gelgala matta'a ixxenaa Isra'ee'l minaadabinaa «Neese qee'l uulliinsi waallummok ki'nnuwwinne maqire xumminne hee'nneena xansiisoo hidiro aangeenatte» yito'o.

⁷Ihukkaarem Isra'ee'l minaadab hiiwwe'i mannina «Ayyi la'ukko ki'nnuwwi yoontakke'i beyyi niina abbis ihaakkoohaare ki'nnuwwinne maqire hinkid hidiro aangeena xannoommo» yito'o.

⁸Ixxuwwim Iyyaasina «Neese ki awwaadaano» yito'o. Iyyaasim ixxuwwina «Ki'nnuwwoom ayyayyaamo? Wattakko'okim hanniinsette?» yaa xa'mmukko.

⁹Ixxuwwim Iyyaasina «Neese ki awwaadaan waallummok lobakata qee'l ulliinsette; mashka'oomim ki'nnuwwi Moollanni Waa'i ki'nnuwwina hara'mmimminne Gibxanne issukkoka macceensaammo.

¹⁰Ee'isam Yoordaanoos daajjinsi eelliinchi firinne hee'llo'i lamem Amoore'i adilluwwannem Haseeboo'n adillanne Siihoonannee Ashtaarootanne hee'u Baashaa'n adilanne Oogannee issu luwwi hundam macceensaammo.

¹¹Ni awwonsaanii ni lambe'enne yoo minaadabii hundim googina hurbaata amandaa ki'nnuwwinne exxinona asse'llo'ookko; neesem ki'nnuwwina awwaadaan inkoommisinaa ki'nnuwwii neesee xumminne hee'nnoomisinaa issoo hidita'n sagara aaggakkona xa'mminoommisina ijaajjo'ookko.

¹²Ku googina amandummi qorosho'i ki'nnuwwi beyyo waalleena ki'nnummi ammane iibaalli hee'ukko; ihukkaarem kaba gogaakkoo'isaa buuhaakkoo'isaa moo'llehe.

¹³Ku woyi'n diqaas canneewwim wonshinnummi ammane haareelli hee'ukko; ihukkaarem kaba dereeraamaakkoo'isa moo'llehe; goog lobakata qee'llimmiinsi ki'ukkok edde'nnummi eddeechchii issaqqinnummi barbaasso'ii beedaakko» yito'o.

¹⁴Ee bikkina Isra'ee'l minaadab Waa'a xa'mmitoo'nnim ee manni hurbaatiinsi aa'llo'o.

¹⁵Iyyaasim ixxuwwinne maqire xumminne hee'immina hidi'l sagara aagukko. Isra'ee'l minaadaphphi awwonsaanim ee hidi'l sagara egetteena hide'llo'o.

¹⁶Ixxuwwinne maqire hidiro aaggo'i saxxi balli lasage oo manni ixxuwwina hincitenne hee'llam olla'i manni ikko'isa Isra'ee'l oos laqqo'o.

¹⁷Ee bikkina Isra'ee'l oos Gaba'oo'n minaadab hee'llam hee'llo'i beero'uwwa matta'a saxxi ballina affo'o. Ixxuwwi beero'uwwim Kaafira, Bi'erootaa Qiiriyaat Yi'aariimaa hee'ukko.

¹⁸Isra'ee'l minaadaphphi awwonsaanim Isra'ee'l Moollanni Waa'i summinne hide'lla'a hee'llo'i bikkina Isra'ee'l oos ee manna shiteen xanto'oyyo. Ee bikkina Isra'ee'l minaadab hundim awwonsaanonne quunquunto'o.

¹⁹Ihukkaarem awwonnsaan hundim Isra'ee'l minaadabina «Isra'ee'l Moollanni Waa'i summinne hide'nnummi bikkina ixxuwwa nakkim hasisooyyo.

²⁰Neese hide'nnummi hidi'l sagara gindinumlas Waa'i quunqi neesenne dilloo bikkina hee'llona» yito'o.

²¹Odim awwonsaan edda'a «Ixxuwwi hee'llona ullehe; ihukkaarem Isra'ee'l minaadab hundinam haqqa iiqqam keenoo wo'o eebbam keenoo ikkona» yito'o.

²²Iyyaasim Gaba'oo'n manna weeshaa «Ki'nnuwwi niina hincit beyyonne hee'llakku'uuyyi «Ki'nnuwwiinsi lobakata qee'l uullanne hee'nnoommi keeno› yitakka'a neese qawwiissakko'ok mahinatte?

²³Ee bikkina kaba ki'nnuwwi duumaantakko'oo keeno; ki'nnuwwi Moollanni Waa'i minnina agid ikkakka'a hundi ammanem haqqa iiqqakku'uuyyaa wo'o eebbakku'uuyyaa hee'llakkamo» yukko.

²⁴Ixxuwwim Iyyaasina dabata'a «Ki'nnuwwi Moollanni Waa'i uullooma hundam ki'nnuwwina uwweenaa uulloomanne yoo keeno hundam ki'nnuwwi illagiinsi bi'iseenaa ixxi awwaadaanchi Muse'e ijaajukkisa neese ki agid macceensaammo. Eehanniinsi ki'ukkaanninne ni foo'l bikkina ki'nnuwwa baddinaa eekka issinaammo.

²⁵Kabaden neese ki anganne yoomminne'i bikkina eroka labaa moo'amukkoka hundam neesenne isse» yito'o.

²⁶Ee bikkina Iyyaas ee balla Gaba'oo'n manna Isra'ee'l oos angiinsi shitambee'isa gatisukko.

²⁷Ihukkaarem Iyyaas ee balla Gaba'oo'n manni Isra'ee'l minaadabinaa Waa'inaa kitima hincaa'akkam beyyina haqqa iiqqam keenoo wo'o eebbam keenoo issukko. Kaballi afeebe'em Waa'i ixxena otossakkamisina doo'llu beyyonne eekka issitamuulla.