Read Hadiyya 2Tasalonqe'i Asso 1 Bible Online

2Tasalonqe'i Asso 1 - Hadiyya bible

2Tasalonqe'i Asso 1

¹ Niyyanni Waa'annee ni Moollanni Yesuus Kiristoosannee ikkakko'i Tasalonqe'enne hee'llakkam amma'nnaanina Phaawuloos, Sillaasii Ximootoosii asse'llo'i asso.

²Niyyanni Waa'ikii ni Moollanni Yesuus Kiristoosikii eroommii xummii ki'nnuwwina ihona.

³Niyyabbaayyuwwa, ki'nnuwwik amma'nnat lobakata li'ukkuuyyi maru bikkinaa ki'nnuwwina'i ki'nnuwwim iittantakkam iitti exxukkuuyyi maru bikkinaa neese hundem ammanem Waa'a galaxximmi hasisookko. Eekka issimmim niina laboohane.

⁴Ee bikkina neese ni gagim amma'nnaa'n wixxittuwwina ki'nnuwwanne bakke'nnummisa kulloommok ki'nnuwwanne afu lobakat hawwonnee asqachchannee hundannem iyyaqqimminne amma'nnatonne qoxxitakka'a yoontakke'isa.

⁵Ee hawwo aa'llakkam Waa'i adillanina labbakkam keen ikkakkamisina moo'isoo Waa'ik oogato'i xabbeena.

⁶Waa'i xabbeenisa oogatoohan ihu bikkina ki'nnuwwa hawwissam keeno Waa'i dabaraa ixxuwwam hawwisookko.

⁷Hawwo aa'llakkam keeninam Moollanni Yesuus Kiristoos ixxaanninne malaayyaam asse'amaaninne maqirem gii'l labaninne iimaniinsi waaroo ammane niinninne maqirem usheexxato uwwookko.

⁸Waa'a laqqambee'i keenoo ni Moollanni Yesuus mishiraachchi sagarina ijaajantambee'i keenoo ee ammane baado miqisookko.

⁹ Ixxuwwim Moollanni illagiinsii lombi yoo ixxi malaayyiinsii annanni ikka'a doolli hundam hee'oo bichchi woronne hawwitamo.

¹⁰Neese ki'nnuwwina kulloommi woshshi ki'nnuwwi beyyonne amma'nnamaakkoohan ihu bikkina ixxi doo'llu kee'n illagenne lomba siixxeenaa ixxonne amma'nnito'i keen hundi illagenne maalallato siixxeenaa waaroo ammane hawwitamo.

¹¹Neese hundem ammanem ki'nnuwwina Waa'a uunxinoommuullak ni Waa'i weeshu weeshanina labbakkam keen issoo'isina, ki'nnuwwim er luwwi hundam hassakkamisinaa amma'nnaxxi baxo baxxakkamisinaa ixxi malaayyinne guullaa wonshoo'isinatte.

¹²Odim ni Moollanni Yesuusik summi ki'nnuwwanne lomba siixxoo'isinattee ki'nnuwwim ixxeensi lomba siixxitakkamisinattee. Oohim ni Waa'i eroomminnettee Moollanni Yesuus Kiristoos eroomminnettee.