Read Hadiyya 2Tasalonqe'i Asso 2 Bible Online

2Tasalonqe'i Asso 2 - Hadiyya bible

2Tasalonqe'i Asso 2

¹ Niyyabbaayyuwwa, ni Moollanni Yesuus Kiristoos waa'l bikkinaa ixxenne edammeena wixxinoommi wixxixxi bikkinaa ki'nnuwwa uunxinoommuullak

²neese Waa'i sagara kullummuuyyi te'im woncummuuyyi te'im niinniinsi kitaabamukkan issitakka'a «Moollanni waaroo ayyaam afaakko» yimminne ki'nnuwwik tiir qaqqisaa heekke'oobee'isinattee muggoobee'isinattee.

³Ayyim ki'nnuwwa ma'isinnem qawwiisoone. Mashka'oomim gaassaa lasaanchi lagimmi ihoo'nnii ijaajamoobee'i bichchi beet waaroo'nnii oo ayyaam afooyyo.

⁴ Ixxi odim Waa'a yakkam luwwinnee Waa'ina otossakkam luwwinnee uullixxamukkuuyyi ixxi gaga lobakata iimiimaa'ukkuuyyi Keesammi Minenne maraa afuuraa «An Waa'a» yukkuuyyi alallaatookko.

⁵Ki'nnuwwinne maqire hee'ummi ammane eekka kurummisa sawwitakkamoyyonnihe?

⁶Ixxena yamamu amman afeebe'e kaba moo'amoobee'isa egedaa hooru luwwi mada'e ihukkisa laqqakkamo.

⁷Ihona bagaan ijaajamoobee'ek maaxaqqanne kaba baxukkuuyyi yookko. Baxookkokim ixxi moo'amoobee'isa kaba egedaa hoorookkok googiinsi laa'eebe'i afeebe'e.

⁸ Ee lasage ijaajamoobee'ek moo'amookko. Ixxom Moollanni Yesuus lombinne moo'amaa suumiinsi firoo fooshshinne duraa bi'isaa hoorookko.

⁹ Oo ijaajamoobee'ek Sheexaanchi malaayyinne qophpha'n agannuwwaa maalalsiisoo mare'uwwaa hundam issukkuuyyi waarookko.

¹⁰Gatteena hanqa iittimma sabbo'i bikkina bi'llam keenonne jor qawwiishshi hundam eebookko.

¹¹Ee bikkina ixxuwwi qophpha'n luwwanne amma'nnitamisina huushisoo malaayye Waa'i ixxuwwina asse'ookko.

¹²Oohim ihukkok «Hanqanne amma'nninoommoyyo» yita'a baaxiilo baxxeena liirantam keenonne hundannem oogato'i afoo'isinatte.

¹³Moollanninne iittantakko'oo niyyabbaayyuwwa, neese ki'nnuwwi bikkina yinaa hundem ammanem Waa'a galaxximmi hasisookko. Mashka'oomim Keesammi Ayyaaninne keesantakka'atii hanqannem amma'nnitakka'atii gattakkamisina Waa'i ki'nnuwwa luxxi keen issaa [1] doo'llaakko.

¹⁴Neese ki'nnuwwina kullummi mishiraachchi saga'l kollinne eehannina weeshaakko. Weeshukkokim ni Moollanni Yesuus Kiristoosika lomba siixxitakkamisinatte.

¹⁵Eehannata'i niyyabbaayyuwwa, qoxxitakka'a uullehe; ni summinnettem ihukko ni assi kitaabinne neese ki'nnuwwina losinsummi losano qoxxissakka'a amaddehe.

¹⁶Ni Moollanni Yesuus Kiristoos ixxi gagii neese iittaa ixxi eroomminne heer heerina hee'oo qoxxishshaa soodonne ihoo er luwwaa uwwu niyyanni Waa'ii

¹⁷ki'nnuwwi wodano er baxinnee sagarinnee hundinnem qoxxisona.