Read Hadiyya 2Tasalonqe'i Asso 3 Bible Online

2Tasalonqe'i Asso 3 - Hadiyya bible

2Tasalonqe'i Asso 3

¹Lasaanchonnem niyyabbaayyuwwa, ki'nnuwwi lambe'enne ihukkisam Moollannik sagar qaqqisaa haraaroo'isinaa lomba siixxoo'isinaa niina Waa'a uunxehe.

²Mishiraachchi sagaranne hundi amma'nnoobee'i bikkina boqqi manniinsii jor manniinsii Waa'i neese gatisoo'isina Waa'a uunxehe.

³Moollanni amma'nnamaakkoohan ihu bikkina ki'nnuwwa qoxxisookkoo ee joriinsi egerookkoo.

⁴Neese ijaanjummi luwwa kaba issitakku'uuyyi yoontakke'isaa ka lasagem issitakkamisaa Moollanni kollinne ki'nnuwwa amma'nninoommo.

⁵Moollanni ki'nnuwwika wodano Waa'i iittoo Kiristoos iyyaqqimmaa qoossitakka'a laqqakkamisina issona.

⁶Niyyabbaayyuwwa, neese losinsummi losa'nnisa ihoo'n baxo ceemmaalli abbaayyuwwiinsi hundiinsim annanni ikkakkamisina Moollanni Yesuus summinne ijaanjoommuulla.

⁷Neese ki'nnuwwinne maqire hee'nnummi ammane ceemmaalluwwi inkumbee'isa laqqakkam bikkina neese labbakka'a hinkid hee'immi hasisooda'e ki'nnuwwi gagim laqqakkamo.

⁸Diinate minqoo'n ayyekam hurbaata intummoyyo. Ihukkaarem «Ki'nnuwwanne ayyennem kee'mminoommoyyo» yimminne ballaa hiimoo badallummuuyyii yakinummuuyyii banxam hee'nnummo.

⁹Neese eehid issinoommok ki'nnuwwi neese kobi'llitakkamisina hansaatette bagaan ki'nnuwwiinsi hara'mmato siindeena niina hanqi bee'aateyyo.

¹⁰Ki'nnuwwinne maqire hee'nnummi ammanem «Baxoobee'ek ayyim itoone» yinaa ijaanjaammo.

¹¹Kabadem ihukkaare ki'nnuwwiinsi mat mat keen ceemmaalluwwaa aagisoobee'i luwwanne aaggu'uuyyi baxxoo'n hee'llam keenoo ikko'isa macceensaammo.

¹²Eehido'i manni ishitiggita'a baxxu'uuyyi ixxuwwi heechchina hasisoo luwwa siixxitamisina Moollanni Yesuus Kiristoos summinne ijaanjoommoo qoxxinsaa songoommoo.

¹³Niyyabbaayyuwwa, er baxo baxxakkeena hooggakkotte.

¹⁴Ayyi la'ukko ayyi manchim ka assi kitaabanne ijaanjummi ijaajo sabookkok hee'ulas ee mancho qoossitakka'a laqqehe. Oo manchi tuuroo'isinam ixxena ki'nnuwwinne mah mateeyyoomim hee'ona.

¹⁵Ihukkaarem ixxo abbaayyisa issitakka'a soggehe bagaan masokkichchisa issitakka'a moo'llakkotte.

¹⁶Xumma uwwoo Moollanni ixxi gagim hundem ammanem hundisinnem ki'nnuwwina xumma uwwona. Moollanni ki'nnuwwinne hundinnem maqire ihona.

¹⁷An Phaawuloos i gagim ka xummaato i anginne kitaabaammo. An kitaabummi assonne hundannem ku mare'i yoohane. An ka'isa kitaabaammo.

¹⁸Ni Moollanni Yesuus Kiristoosik eroommi ki'nnuwwinne hundinnem maqire ihona.