Read Hadiyya 1Ximootoos Asso 1 Bible Online

1Ximootoos Asso 1 - Hadiyya bible

1Ximootoos Asso 1

¹Neese Gatisaanchi Waa'ii niina neeyyat ihu Yesuus Kiristoosii ijaajjo'aare Yesuus Kiristoosina asse'amaanchi ihummi iinniinsi Phaawuloosiinsi

² Anni Waa'ikii ni Moollanni Yesuus Kiristoosikii eroommi, qishixxatii xummii amma'nnatinne hanqo'i i beet ikkitti Ximootoosina ihona.

³An Maqeedoona marummuuyyi at Efeesoonanne afuuttoo'isina keese uunxoommok mat mat keen niihaanniinsi annanni losano maham losissambee'isa ijaajjoo'isinatte.

⁴Odim amma'nnatinne Waa'i baxina maham awwaadoobee'i fitancha eeboo heesso kurimmaa lugumo afakkambee'i shumo'o xigimmaa uttamisina ijaajjoo'isinatte.

⁵Neese ijaanjummi ijaaccek horoor woshshi muccur wodaniinsi, er tiiriinsii hanqo'i amma'nnatiinsii firoo iitto

⁶mat mat keen eehanniinsi huushanta'a awwaad bee'i fitanchanne daba'llito'ookko.

⁷Ixxuwwi woccam luwwi te'im hanqisa issita'a losissam luwwi mada'e ihukkisa laqqoo'nnim Seera losisaano yamanta'a weeshanteena hassamo.

⁸Ayyim Seera laboo'isinne awwaaxxulas danaam ihukkisa lanqoommo.

⁹Seer uullukkok muccur keeninatte ihoo'n Seera ginditam keeninatte, ijaajantambee'i keeninatte, Waa'a sabbam keeninatte, baaxiilaammuwwinatte, muccuroombee'i keeninatte, haashaarammi keeninatte, annaa amaa shitam keeninatte, manna shitam keeninatte,

¹⁰saa'aaninatte, meenti bikkenne gooninne iinse'llam keeninatte, manna agga'a massitam keeninatte, qophphanaaninatte, qophphanonne hide'llam keeninattee hanqo'i losaninne iittamoobee'i luwwi hundam issitam keeninattee.

¹¹Oo hanqo'i losanim siidamookkok maasse'amaakkoo Waa'iinsi an kuroommisina iina yabo uwwamu lombaam mishiraachchi sagarannette.

¹²An ixxena awwaadoommisina amma'nnamaammoohan issaa doo'llaa iina malaayye uwwu ni Moollanni Yesuus Kiristoosa galaxxoommo.

¹³ An ixxo eraare game'llaammoohane, hawwisaammoohanee sholliisaammoohanee hee'ummo. Ihukkaarem an amma'nnoo'n illageen lachcha hoonginne issummi bikkina iina haafukko.

¹⁴Yesuus Kiristoosinne yoo mateeyyoominne iina uwwu amma'nnatinnee iittinnee ni Moollannik eroommi iina lobakata lophphukko.

¹⁵«Baaxiilaano gatiseena Kiristoos ka uulla waarukko» yamamukkok hanqame; amma'nnimmim hasisoohane. Baaxiilaaniinsi hundiinsim lophphoommi baaxiilaanchi anette.

¹⁶Ihukkaarem heer heerina hee'oo heechcha siixxiteena Yesuus Kiristoosanne amma'nnitam keenina kobi'l ihoommisina baaxiilaaniinsi hundiinsim lophphoommi baaxiilaanchi eesenne ixxeka gabalbee'i iyyaqqimma la'iseena ixxi iina haafukko.

¹⁷Doolli hundinam adilina lehoobee'aanninaa moo'amoobee'aanninaa mexxo'i Waa'ina galatii lombii heer heerinam ihona! Aameen.

¹⁸I beet Ximootoosa, an keese ijaajoommi ijaaj ki bikkina hiraagaan gaassi kutto'isam ee sagara qoxxitaa awwaaxximminne erisa qasantoo'isinatte.

¹⁹Amma'nnatii er tiirii kiina hee'ona. Mat mat keen ixxuwwi tiir acceeqasonam sabba'a amma'nnatonne hakkammi bee'i faraxxisa ikko'ookko.

²⁰Ee keeniinsim Waa'a game'llimma uttamisina Sheexaanchina higisaa uwwummi Heemeeniwoosii Alaksaandiroosii yo'o.