Read Hadiyya 1Ximootoos Asso 2 Bible Online

1Ximootoos Asso 2 - Hadiyya bible

1Ximootoos Asso 2

¹Hundi luchchiinsim gaassitakka'a ki'nnuwwina hasisoo luwwinaa mulli keeninaa uunximminnee galaxximminnee manni hundinam Waa'a uunxitakkamisina ki'nnuwwa uunxinoommo.

²Odim neese hundisinnem wocbee'i xumminne Waa'a baddinummuuyyi lombinne hee'nnoommisina adilluwwinaa hundiinsi hanaan yo'i gassaan hundinaa Waa'a uunxehe.

³Oohim neese Gatisaanchi Waa'i illagenne eranee liiransoohanee.

⁴Ixxim manni hundim gatoo'isinaa hanqa la'oo'isinaa hasoohane.

⁵Matem Waa'i yookko. Waa'i lambe'ennee manni lambe'ennee yoo lambe'i manchim manchi ihaa waaru mexxo'i Yesuus Kiristoosatte.

⁶Manni hundam gatiseena ixxi gaga tissi issaa uwwukkokim ixxotte. Oohim amman afukkaare Waa'i manna gatiseena iittukkisa kuroohane.

⁷ Anim amma'nnatoo hanqaa alallaateena asse'amaanchoo losisaanchoo ihaa mulli minaadaphphi beyyo asse'amummok ee mashka'innette. An kaka wocummuuyyi hanqa wocoommo bagaan qophphanoommoyyo.

⁸Goon quuqimmaa wocanchaa uraa beyyi hundannem muccur mannoominne Waa'a uunxoo'isina hasoommo.

⁹ Meentim ixxuwwi gaga heeshaa'lla'a laboo eddechcha edde'imminne ixxuwwi gaga wereeggissona bagaan shurubba dadisimminne te'im worqa issaqqimminne te'im bito xee'aalli luwwa issaqqimminne te'im bito xee'aalli eddechcha edde'imminne ixxuwwi gaga wereeggissoone.

¹⁰Ihukkaarem Waa'anne amma'nnu meentina laboo er baxo baxxona.

¹¹Meenti hundi luwwannem ijaajanchinne woc bee'eka lossona.

¹²Meenti losisonaa goona ijaajonaa hasoommoyyo. Issuwwi cawwita'a uttona.

¹³ Mashka'oomim gaassaa qooccamukkok Addaamatte. Ee lasage Heewwaane qooccanto'o.

¹⁴ Meentichcho huushanta'a Waa'i seera gindito'o bagaan Addaam huushamukkoyyo.

¹⁵Ihukkaarem meentichcho amma'nnatinne, iittinne, muccuroominnee laboo'isinnee hee'llolas ooso qarimminne gattamo.