Read Hadiyya 1Ximootoos Asso 3 Bible Online

1Ximootoos Asso 3 - Hadiyya bible

1Ximootoos Asso 3

¹«Ayyi manchim amma'nnaanina awwonsaanchi iheena hasulas lombi yoo baxo hasaakko» yoo woshshi hanqame.

² Amma'nnaano awwonsaanchi miiqakkam luw bee'ane, mat meentichchi aro'o, iyyaqqoohane, gaga ijaajoohane, ogoraamo, koyya aa'oohane, losiseena xanoohane,

³dimboobee'ane, atanaachcha fissoobee'ane, maashaalla, xummaanchoo diinate iittoobee'anee ihimmi hasisookko.

⁴Ixxi mi'n abaroosa erisa gassoohane, ixxi oosim ixxena hundi luwwannem ijaajamoohanee ixxo lonsoohanee ihimmi hasisookko.

⁵Ixxi mi'n abaroosa gasseena xanubee'i manchi Waa'i minaadaba hinkid gasseena xanookko?

⁶Awwonsaanchi ihoo manchi Sheexaanchi oogatamukkisam biranchinne fugamaa oogatamoobee'isina haareechcho amma'nnaakkoo manchi ihimmi hasisooyyo.

⁷Ixxi gaga sholle'aa Sheexaanchaannonne shikkanne aagaa uboobee'isa lophphaatim amma'nnubee'i manni beyyonne er sad yoo manchi ihimmi hasisookko.

⁸Odim amma'nnaanina awwaaddam keenim manni lonsoo keeno, lamo woccambee'i keeno, lobakat woyi'n diqaasa agimmik losanbee'i keenoo diinate iittitambee'i keenoo ihimmi hasisookko.

⁹Odim caakkaa la'amu amma'nnaxxi hanqo'i woshshanne muccur wodaninne qoxxita'a uullito'oo keen ihimmi hasisookko.

¹⁰Ixxuwwi gaassita'a keenantona. Ixxuwwannemdu miiqakkam luwwi bee'i keen ikkolas awwaaddona.

¹¹Ee'isam ixxuwwi meentim[1] manni lonsoo keeno, hamtambee'i keeno, iyyaqqitam keenoo hundi luwwannem amma'nnanto'oo keenoo ihimmi hasisookko.

¹²Amma'nnaano awwaadoo keen mat meentichchona aro'oo ixxuwwi oosoo ixxuwwi mi'n abaroosaa erisa gassoo keenoo ihimmi hasisookko.

¹³Amma'nnaanina erisa awwaaddam keen ixxuwwi gagina lobakat lomba siixxitamo. Yesuus Kiristoosanne yoo amma'nnatonnem lobakat iggimma siixxitamo.

¹⁴«Abbis ammanenne ki beyyo waaroommo» yaa sawwummaarem kiina ka asso kitaabaammo.

¹⁵Ayyi la'ukko dasumta'nnim Waa'i mi'n abaroos hinkid hee'immi hasisooda'e laqqoo'isinatte. Oo Waa'i mi'n abaroosim hanqina utubaa shooho'oo ihu Waa'i minaadaba.

¹⁶Waa'a labimmik maaxammi woshshi lobakata xillaalla. Oohim Kiristoos «Manchi ihaa moo'amukko. Muccur ihukkis Keesammi Ayyaaninne la'amukko. Asse'amaaninam moo'amukko. Uulli minaadab hundinam alallaatamukko. Uulli hundannem amma'nnamukko. Lombinne iimane marukko» yoohane.