Read Hadiyya 1Ximootoos Asso 4 Bible Online

1Ximootoos Asso 4 - Hadiyya bible

1Ximootoos Asso 4

¹Lasaanchi doollenne mat mat keen huushisoo ayyaannuwwaa habus losanoo awwontu'uuyyi amma'nnatiinsi ubbamisa Keesammi Ayyaan caakkisaa kuraakko.

²Eehido'i losan waarookkok labishshinne qophphano woccam bikkina ixxuwwik wodan xaarinne guba'akko'i orachchisa ihaa duudu bikkina ixxuwwi tiir acceeqasoobee'i manniinsette.

³Oo keen eebaqqancha hoottamo. Waa'anne amma'nnita'a hanqa laqqam keen Waa'a galaxxita'a ittam Waa'i qooccu hurbaatam ittambee'isa hoottamo.

⁴Waa'i qooccu luwwi hundim danaam ihu bikkina Waa'a galaxxakku'uuyyi aa'akkolas sabakkam luwwi mahim bee'e.

⁵Mashka'oomim Waa'i sagarinnee Waa'a uunximminnee maasse'amaakkoohane.

⁶Ee ijaajo amma'nnaanina losissilas at awwontoo amma'nnaxxi sagarinnee hanqo'i losaninnee li'llaattoohan ikkaa Yesuus Kiristoosina er awwaadaanchi ikkootto.

⁷Waa'i lombina ihoobee'i awwaad bee'i heessiinsi ki gaga ege'lle. Ihukkaarem Waa'ina ijaajancha lossittuuyyi mare.

⁸Orachchina mat mat luwwa losisimmi hoffokam awwaadookko. Ihukkaarem Waa'a baddimmi ka heechchinaa lasaqqi heechchinaa neeyyat yoohan ihu bikkina hundisinnem awwaadookko.

⁹Ku woshshi manni hundim amma'nnimmi hasisoo hanqo'i woshsha.

¹⁰Neese hee'oo Waa'anne neeyyato issinummi bikkina badalloommoo gubbammoommoo. Oo hee'oo Waa'i manni hundam lophphaatim amma'nnu keeno gatisoohane.

¹¹Ka woshsha ijaajee losisee.

¹²Ayyim kiikka oosoommano moo'aa gadoone. Ihukkaarem at woccoo wocannee hee'lloo heechchannee iittinne, amma'nnatinnee muccuroominnee amma'nnaanina kobi'l ihe.

¹³An waareembe'i mannina Keesammi Kitaaba qananaa'lleena, alallaatteenaa losisseenaa qoxxe.

¹⁴Keesenne amma'nnaa'n lommanni anga issu ammane hiraaqqi sagarinne kiina uwwamu uwwancha gadditte.

¹⁵At li'llittuuyyi mattittisa manni hundim la'oo'isina ee keeno baxinne moo'ise. Ki gagam ee keeno issimmina higissaa uwwe.

¹⁶Ki gagaa at losissitti losishshaa qoxxitaa egere. Eekka issimminne ki gagaa kiinniinsi macceesoo keenoo gatissoo bikkina eehannonne qoxxe.