Read Hadiyya 1Ximootoos Asso 5 Bible Online

1Ximootoos Asso 5 - Hadiyya bible

1Ximootoos Asso 5

¹Lommancho kiyyannisa issitaa soge bagaan axeettitte. Harde'i keenom kiyyabbaayyuwwisa issitaa moo'e.

²Lomma'nnu meentom amo'isaa harde'i meentom aayyuwwisaa issitaa muccuroominne moo'e.

³Aro'i lehaa mulla hee'oo meento lonsehe.

⁴Aro'i lehu meentichchona oos te'im oos oos hee'ulas ixxuwwi gaassita'a ixxuwwi mi'n abaroosina hara'mmimminne amma'nnaan issoo er baxo lossona. Ixxuwwi amanaa anninaa dabatta'a hara'mmitona. Eekka Waa'i iittoohane.

⁵Ihukkaarem hara'mmoo manni bee'aa hanqo'isam mullam hee'llamote iseka sawwit hundam Waa'anne ubbuussa'a Waa'i hara'mmoo'isina hiimoo ballaa Waa'i uunximminne hee'llamotane.

⁶Ihona bagaan is gaga heellixxitu'uuyyi hee'llamote foorinne hee'llu'uuyyim leto'ookkotane.

⁷Miiqakkam luwwi bee'i keen ikkamisina ka ijaajo ixxuwwina kure.

⁸Ixxi qarmanna lophphaatim ixxi mi'n abaroosa abooyyoobee'ek ayyim amma'nnatiinsi ubaakkoohane. Oo manchi amma'nnubee'i manchiinsi baasaakkoo jora.

⁹Isemdu lohayyi hiinchiinsi hoffe'llambee'etan ikkolasii mexxo'i goonchonne affo'ookkotan ikkolasii busar meenti kitaabamoo amma'nnaa'n doonanne kitaabantona.

¹⁰Isem ooso li'isimminne, koyya aa'imminne, Waa'i minaadaphpheka lokko aanshimminne, hawwu keeno hara'mmimminnee hundisinnem eroka baximmina guddo'ookkotan ihimminnee la'anto'ookkotan ihimmi hasisookko.

¹¹Harde'i ihu busar meenti idootanne afimmi mixan exxukkuuyyi maroo ammane Kiristoosa utta'a maa'l mixanonne mattam bikkina doonanne kitaabbitte.

¹²Ee'isinne illageen aaggo'i hidiro gindita'a oogato'onne aaggamo.

¹³Ixxuwwi odim miniinsi mine do'llu'uuyyi bax bee'i keen ihimma lossamo. Bax bee'i keen ihimmi xale'em ihoo'n hamaano, aagisoobee'i woshshanne aaggam keenoo laboobee'i woshsha woccam keenoo ikkamo.

¹⁴Ee bikkina busar ihu harde'i meenti ladiisantamisina, ooso qattamisinaa ixxuwwi mine gassitamisinaa sogoommo. Ee'isinne maso'i neese game'lloobee'isa googo ifiissona.

¹⁵Mashka'oomim kanniinsi illageenim mat mat keen Sheexaancho awwonteena laso daba'llito'ookko.

¹⁶Busar meentina amma'nnito'oo qarmancho [2] hee'llolas ee meento is hara'mmitona bagaan amma'nnaa'n wixxitenne kee'mmamoone. Ee'isinne hara'mmaan bee'i keenina amma'nnaan hara'mmeena xanookko.

¹⁷Amma'nnaano danaamisa gassoo lommannina lophphaatim mishiraachchi sagara kurimminaa losisimminaa badaroo keenina qinqinxaakkoo lomba uwwimmi hasisookko.

¹⁸ Mashka'oomim Keesammi Kitaabanne «Hurbaata ganoo mirgo'ika suume kattitte» yamamaa kitaabamaakko. Odim «Badaroo manchinam ixxi malaayyika miqimmi hasisookko» yamamaakko.

¹⁹ Amma'nnaa'n lommancho kasasakkam woshshanne lam manchi te'im sas manchi naqqasubeelas ee woshsha aa'llitte.

²⁰Mulli keen baddoo'isina baaxiilo baxxam keeno manni hundi illagennem axeere.

²¹Mahannem mannika ille moo'lloo'nnii golo'lloo'nnii ka ijaajo awwontoo'isina Waa'i illagenne, Yesuus Kiristoos illagennee doo'llamaakkoo Waa'i asse'amaa'n illagennee an keese ijaajoommo.

²²Waa'i baxina manna doo'llitaa anga issiteena gaaggaabbitte. Mulli manni baaxiilonne hamaarantitte. Ki gagam muccuroominne ege'lle.

²³Ki godaphphi xissi bikkinaa keese hundi ammanem xissoo bikkinaa woyi'n diqaasika hoffokam age bagaan ka lasage xale'i wo'o aggitte.

²⁴Mat mat mannik baaxiil guullaa la'amaakkoohane. Oo baaxiilim ixxuwwanne afoo oogato'o gaassaatim moo'isoohane. Ihukkaarem mat mat kee'nnek baaxiil lasonne la'amoohane.

²⁵Ee'isam er baxim la'amaakkoohane. La'amoo'n yoohan ihukkaarem hore'em maaxamaa gateena xanooyyo.