Read Hadiyya 1Ximootoos Asso 6 Bible Online

1Ximootoos Asso 6 - Hadiyya bible

1Ximootoos Asso 6

¹Waa'i summii neese losinsummi losishshii duumamoobee'isina agiddanonne yo'i keen hundim ixxuwwi moollanno'ina laboo lombi hundam uwwimmi hasisoohan ihukkisa laqqona.

²Amma'nnu moollanno'i yoo agid amma'nnatinne ixxuwwi abbaayyuwwi ikko'i bikkinaa yita'a ixxuwwi moollanno'o sholliissoone. Ihukkaarem ixxuwwi moollanno'i amma'nnaanoo iittanto'oo keenoo ikko'i bikkina eraa'llaanniinsim lonsita'a awwaaddona. Ka woshsha losisee qoxxissaa kuree.

³Ayyi manchim ni Moollanni Yesuus Kiristoos hanqo'i sagarinnee amma'nnatinnee iittamoobee'i annanni losishsha losisulas

⁴oo manchi biranchinne fugamaakkoohane bagaan maham la'oobee'ane. Eehido'i manchi woca qooccimminaa sagalluwwanne fitanchinaa muxmuxoohane. Eehannikim lasaanchi to'achchimma, wocancha, game'llancha, mannanne jora labimmaa

⁵tiir bi'aa hanqiinsi firaakkoo manni lambe'enne beeddoobee'i fitanchaa eeboohane. Ee keenina amma'nnat godda siidisookkoka labaa moo'amookko.

⁶«Iina yoo luwwi ihookko» yoohaannina hanqinam Waa'a baddimmi hundi luwwiinsim lophphaakko godda.

⁷Neese ka uulla maham amandaa waallummoyyo. Ka uulliinsim maham amandaa malloommoyyo.

⁸Eehaara'i niina intoommi luwwii edde'nnoommi luwwii hee'ulas ihookko.

⁹Ihukkaarem goddaan ikkeena hassam keen keenanchanne aaggamo. Odim gindanchannee bichchannee massaa hawwodoo dut qawwoo'm mixanonnee qaashi'nnoo'i luwwannee amadantamo.

¹⁰Mashka'oomim diinate iittimmi jolli hundinam lugumo. Mat mat keen godda hollantu'uuyyi amma'nnatiinsi ubba'a ixxuwwa bagaxxisa qasoo lobakat kichchechchanne aaggo'ookko.

¹¹Ihukkaarem ate, Waa'i mancho! At eehido'nne'i luwwiinsi gibe. Muccurooma, Waa'a baddimma, amma'nnato, iitto, iyyaqqimmaa maashaalloomaa hase.

¹²Amma'nnaxxi gubbancha qoxxitaa gubbame. Dut naqaashshuwwi illagenne ki danaam amma'nnato naqqassitti ammane Waa'i keese weeshu heer heerinam hee'oo heechcha qoxxissaa amaxxe.

¹³ Hundi luwwinam foore uwwoo Waa'i illagennee Pheenxeenaawekkichchi Philaaxoosina hanqo'i woshsha wocu Yesuus Kiristoos illagennee an keese ijaajoommo.

¹⁴Ni Moollanni Yesuus Kiristoos waareebe'e huushanchii miiqakkam luwwii bee'isinne ka ijaajo egere.

¹⁵Adilluwwina Adilii moollanno'ina Moollannii maasse'amaakkoo mexxo'i gassaanchi Waa'i yu amman afoohaare Kiristoos waarookko.

¹⁶Lehoobee'ek, ayyim hinceena xanoobee'i caakkanne hee'ookkok, ayyim hore'em moo'ubee'ekii ayyim moo'eenam xanoobee'ekii xale'i Waa'a. Ixxena lombii heer heerina hee'oo malaayyii ihona! Aameen.

¹⁷Ka uullanne yo'i goddaan birantambee'isa te'im higoo goddanne bakke'llambee'isa ijaaje. Ihukkaarem neese liiranseena niina hasisoo luwwi hundam biijoominne lonsaa uwwoo Waa'anne bakke'llamisina ijaaje.

¹⁸Er baxo baxxamisina, er baxim lophphukkuuyyi maroo'isinaa biijoominne ixxuwwina yoohaanniinsi mulli keenina baxxansitamisinaa kure.

¹⁹Ee'isinne ixxuwwi gagina beeddoobee'i godda soodina wixxaa'llona. Ee lasage hanqo'i heechcha siixxiteena xantamo.

²⁰Ximootoosa, kiina uwwamu yabo egere! Waa'i iittoobee'i wociinsii qophphanom lachcha yakkam fitanchiinsii qee'lle.

²¹Mat mat keen eehido'i lachchi niina yookko yitu'uuyyi amma'nnaxxi googiinsi huushanto'ookko. Waa'ik eroommi kiinninne[3] maqire ihona.