Read Hadiyya 2Ximootoos Asso 1 Bible Online

2Ximootoos Asso 1 - Hadiyya bible

2Ximootoos Asso 1

¹Waa'i Yesuus Kiristoos kollinne neeyyatu heechcha alallaatoommisina Waa'i doo'llinne Yesuus Kiristoosina ass'amaanchi ihummi Phaawuloosiinsi

² iittoommi i beet Ximootoosina niyyanni Waa'ikii ni Moollanni Yesuus Kiristoosikii eroommi, qishixxatii xummii ihona.

³An Waa'a uunxummuuyyi hiimoo ballaa keese sawwoommi amman hundam muccur wodaninne iyyanno'isam awwaadoommi Waa'a galaxxoommo.

⁴An kiikka indiidda sawwoommi bikkina keese moo'aa lobakata liirameena quluxoommuulla.

⁵ Keesenne yoo hanqo'i amma'nnato tiiroommo. Oo amma'nnat luxxeka kiyyummi amanne Looyisennee ee lasage odim kiyyummanne Eewwonsennee hee'ukkane. Kaba keesennem oo amma'nnat yoo'isa la'aammo.

⁶Ee bikkina an keesenne anga issummi ammane Waa'i kiina uwwu ki woronne yoo uwwanchi gii'llisa aphphoo'isa issitoo'isina tiissiisoommo.

⁷Waa'i niina malaayyika, iittikaa gaga ijaajimmikaa Keesammi Ayyaana uwwukko bagaan baddimmi ayyaana uwwukkoyyo.

⁸Eehannata'i Waa'i uwwoo malaayyinne Yesuus Kiristoos mishiraachchi saga'l bikkina iinninne maqirem hawwo aa'e bagaan Moollanni bikkina kutteena baddititte. Ixxi bikkina karamummi eesem moo'llaa baddititte.

⁹Waa'i neese gatisukkokii ixxi minaadab inkoommisina annanni issaa weeshukkokii neese issinummi er baxinnette ihoo'n ixxi sawwu sawwitinnettee Yesuus Kiristoosinne doolli hundiinsim illageen ixxi issu eroomminnettee.

¹⁰Oo eroommim neese Gatisaanchi Yesuus Kiristoos waarimminne kaba caakkaa la'amukko. Ixxim leho bi'isaa heer heerinam hee'oo heechcha uwwukkisa mishiraachchi sagarinne la'isaakko.

¹¹ Ee mishiraachchi sagarinam an alallaataancho, asse'amaanchoo losisaanchoo ihaa doo'llamummo.

¹²An ka'isa hawwoommok ee bikkinatte. Ihukkaarem an amma'nnummok ayyetda'e ihukkisa la'oommi bikkina tuuroommoyyo. Iina yabo uwwukkok[1] oo balli afeebe'e egereena xanoo'isam la'oommo.

¹³Iinniinsi macceessitti hanqo'i saga'l ogora awwontittuuyyi Yesuus Kiristoosinne siidamoo amma'nnatonnee iittonnee qoxxitaa hee'e.

¹⁴Kiina uwwamu er yabo neesenne hee'oo Keesammi Ayyaaninne egere.

¹⁵Issiyanne yo'i amma'nnaan hundim eese laggo'isa at laqqootto. Ee laggo'i keeninnem Figeeloosii Hermoogeeneesii yo'o.

¹⁶Onisfooroos eese lobakata qoxxisu bikkina ixxi mi'n abaroosa Waa'i maasse'ona. An karamummaarem ixxi baddukkoyyo.

¹⁷Oroo'm beero'o afu ammanem lobakat qulunxinne eese hasaa edamukko.

¹⁸Lasaanch doollenne Waa'i ixxena eroomma issona. Efeesoonanne iina awwaadu awwaad hundam at erisa laqqootto.