Read Hadiyya 2Ximootoos Asso 2 Bible Online

2Ximootoos Asso 2 - Hadiyya bible

2Ximootoos Asso 2

¹Eehannata'i i beeto, Yesuus Kiristoosanne yoo eroommanne qoxxe.

²Dut kee'n illagenne iinniinsi macceessitti woshsha mulli mannina losisseena xantam amma'nnanto'oo keenina atim yabo uwwe.

³Yesuus Kiristoosina er gaadaanchisa ikkaa keesennem afoo hawwo aa'e.

⁴Oramoo gaadaanchi orina ixxo asse'u mancho liiranseena hasookko bagaan ixxi gaqqi quuxonne digaadamooyyo.

⁵Xoreexxamoo manchim xoreexxanchi seera laboo'isinne egeraa xoreexxamubeelas kaachchi mare'e siixxeena xanooyyo.

⁶Badaraa baxoo abuullaanchim hurbaaxxeka ludo a'llimmi hasisookko.

⁷Waa'i keese hundem luwwam qoossitoo'isa issoo bikkina an wocoommi luwwa qoosse.

⁸An mishiraachchi sagaranne kurummisam Daawiit shumo'iinsi qaramukkokaa lehiinsim ki'ukkokaa Yesuus Kiristoosa sawwihe.

⁹Jora baxu manchisa ihaa xaarinne karamaa hawwoommok ee mishiraachchi saga'l bikkinatte. Ihukkaarem Waa'i sagar karamooyyo.

¹⁰Ee bikkina doo'llanto'i keen Yesuus Kiristoosiinsi uwwamoo gatimma heer heerina hee'oo lombinne maqirem siixxitamisina ixxuwwi bikkina hundi luchchom iyyaqqoommo.

¹¹«Ixxenne maqire lenummaa'lleensi ixxenne maqirem hee'nnoommo.

¹² Iyyaqqinummaa'lleensi ixxenne maqirem adilluwwi inkoommo. Ixxo langumlas ixxim neese lagookko.

¹³Neese ixxena amma'nnammumbee'aarem ixxi gaga lageena xanoobee'i bikkina amma'nnamaakkoohan ihaa hee'ookko» yamamu woshshi hanqame.

¹⁴Macceesoo keeno hawwodimmiinsi bagaan maham awwaadoobee'i bikkina sagalluwwanne fitantambee'isa ka woshsha Waa'i illagenne tiissiisee ijaajee.

¹⁵Waa'ika hanqo'i sagara xabbeenisa losissittuuyyi baxxoo baxonne tuuttoobee'i amma'nnantaattoo baxaanchi issitaa ki gaga Waa'ina hincaa'lleena yakihe.

¹⁶Awwaad bee'i luwwanne fitanchi Waa'iinsi qeessukkuuyyi massoo bikkina eehanniinsi ege'lle.

¹⁷Ixxuwwi woccam woshshi fayye'oobee'i madisa edukkuuyyi maroohane. Ee kee'n lambe'ennem Heemeeniwoosii Filixoosii yo'o.

¹⁸Oo keen «Lehiinsi ki'immi gaassim higaakko» yitu'uuyyi hanqo'i losaniinsi annanni ikko'ookko. Mat mat keenoom amma'nnatiinsi ubbussamuulla.

¹⁹Ihukkaarem «Waa'i ixxan ihu keeno la'ookko»; odim «Waa'ika summa weeshoo keen hundim joriinsi qee'llona» yamamaa kitaabamaakkoo Waa'ik heekke'oobee'i qoxxaalli hanqi yookko.

²⁰Mat geejji minenne hee'ookkok worqiinsii biriinsii baxamu mu'ut xale'i ihoo'n haqqiinsii buchchiinsii baxamu mu'utim hee'ookko. Ee mu'utiinsi mat mato lombina awwaaxxakkamane. Mat mato odim kora'i luwwina awwaaxxakkamane.

²¹Ayyim ixxi gaga kora'i luwwiinsi annanni issulas lombina awwaaxxakkam mu'uxxisa ihookko. Ee'isinne Waa'ina annanni ihaakkoo awwaadoo mu'ut ihaa er bax hundinam gudaakkoohan ihookko.

²²Ee bikkina at woraadda'n jor mixaniinsi qee'llitaa muccur wodaninne Moollanna weeshsham keeninne maqirem muccurooma, amma'nnato, iittoo xummaa qoxxitaa hase.

²³Woshsha eeboo'isa laqqoo bikkina awwaad bee'i qawwoo'm fitanchiinsi qee'lle.

²⁴Moollannina awwaadoo manchi wocamoohan ihimmi hasisooyyo. Ihukkaarem manni hundinam maashaalla, danaamisa losisoohane, iyyaqqoohanee

²⁵ixxenne uullixxamoo keeno qaphphaa'aa sogoohanee ihimmi hasisookko. Ayyi la'ukko ixxuwwi baaxiilo biiraa yita'a daba'llita'a hanqa laqqamisa Waa'i issoohan ihookko.

²⁶Ee'isinne ixxi hasu luwwa issitamisina ixxuwwa qeefadaa karaa amadu Sheexaanchi shikkiinsi fissaqqitamo.