Read Hadiyya 2Ximootoos Asso 4 Bible Online

2Ximootoos Asso 4 - Hadiyya bible

2Ximootoos Asso 4

¹Ixxi adillanonne ihaa foorinne yo'i keenonnee lehu keenonnee oogateena waaroo Yesuus Kiristoos illagennee Waa'i illagennee keese kaka ijaajoommo.

²Waa'i sagara kure; makku ammanee makkubee'i ammanee hundem ammanem guddaa egere. Manna acceeqassaa dabare, axeeree sogee; iyyaqqimmannee losisimmannee qoxxe.

³Manni hanqo'i losano saboo amman waarookko. Ihukkaarem ixxuwwina mishisoo luwwa macceesseena muxmuxitu'uuyyi ixxuwwi iittitam luwwa kuttam losisaano ixxuwwi gagina wixxaa'llamo.

⁴Hanqo'i woshsha macceesimma utta'a heesso macceesimmanne daba'llitamo.

⁵Ihukkaarem at hundi ammanem qoxxe; hawwonnem xa'nne. Mishiraachchi sagara kurimmi baxo baxe. Kiina uwwamu baxom guullitaa baxe.

⁶An kitimamoommi amman afaakko. Kaba an ka uulli heechchiinsi annanni ihaa maroommi amman afaakko.

⁷An er ora oramaammo. Xoreexxancham guullaammo. Amma'nnatom egeraammo.

⁸Ka lasage muccurooma moo'isoo kaachchi mare'i iina gudaakko. Eekkam hanqa oogatoo Moollanni waaroo balla iina irifo'i issaa uwwookko. Xale'i iinatte ihoo'n ixxeka waarimma iittitam keenina hundinam uwwookko.

⁹Xansiisukkis hundinnem i beyyo qaqqissaa waare.

¹⁰ Deemaas ka uulla iittaa eese lagaa Tasalonqe'e maraakko. Qeerqeesim Galatiya maraakko. Tiito'om Dalmaata maraakko.

¹¹ Iinninne maqire yookkok xale'i Luqaasatte. Maarqoos iina lobakata awwaadoohan ihu bikkina waattoo ammane kiinninne maqirem amaddaa waare.

¹² Tiikiiqoosam Efeesoo'n beero'o asse'aammo.

¹³ At waattoo ammane Xiiroo'aadanne Karphaas beyyonne uraa waarummi Barnoosaa kitaabbuwwaa amaddaa waare. Lophphaatim omachchonne kitaabamu kitaabbuwwa amaddaa waare.

¹⁴ Woqqaaccichchi Alaksaandiroos eese lobakata hawwodukko. Waa'i ixxena baxu baxisam miqona.

¹⁵Neese kullummi woshsha hore'em sabu bikkina atim ixxo ege'lle.

¹⁶An luxxeka kasasamaa dabachcha uwwummi ammane hundim iinniinsi annanni ikko'o bagaan matim iina hara'mmukkoyyo. Waa'i eekka ixxuwwanne xigoone.

¹⁷Ihukkaarem mulli manni hundim mishiraachchi sagara macceessamisina ixxeka asso guullaa alallaatoommisina Moollanni iinninne maqire ihaa malaayye uwwukko. Ee bikkina eese hobbi aqiinsi fissukko.

¹⁸Moollanni eese jor luwwi hundiinsim gatisaa iima'n adillanina afisookko. Ixxena heer heerinam lombi ihona! Aameen.

¹⁹ Phirisqilena, Aqilinaa Onisfooroos mi'n abaroosinaa xummaato kure.

²⁰ Eraasxoos Qorontoosanne gataakko. Xarfimoosim xissu bikkina Miiliixanne uraammo.

²¹Xansiisukkis hundinnem hagayyi aageena illageen i beyyo waare. Eebuloos, Phudees, Liinoos, Qilaawdiyaa amma'nnaan abbaayyuwwii hundim xummaato asse'llo'ookko.

²²Moollanni kiinninne maqire ihona. Eroommi ki'nnuwwina ihona.