Read Hadiyya Tiito'i Asso 1 Bible Online

Tiito'i Asso 1 - Hadiyya bible

Tiito'i Asso 1

¹Waa'ina awwaadaanchiinsii Yesuus Kiristoosina asse'amaanchiinsii Waa'i doo'llu keenom amma'nnatonne qoxxitona hara'mmoommisinaa Waa'a baddimmina awwonsoo hanqa ixxuwwina la'isoommisinaa doo'llamummi Phaawuloosiinsi asse'amu asso.

²Oo amma'nnatim heer heerina hee'oo heechchi neeyyatanne shooho'amaakkoohane. Ee heechcham uwweena qophphanoobee'i Waa'i hinaxxi doolliinsi illageenim sagara aagaakkoohane.

³Eeham ixxi qoodu amman afukkaare neese Gatisaanchi Waa'i eese ijaajaa yabo uwwukkaare an alallaatoommi ixxi saga'l kollinne caakkukko.

⁴ Amma'nnaxxi mateeyyoominne hanqo'i i beet ihu Tiito'ona niyyanni Waa'iinsii neese Gatisaanchi Yesuus Kiristoosiinsii eroommii xummii ihona.

⁵An keese Qarxeesanne urummok gatu luwwa taaphansitoo'isinattee an keese ijaajummisam beero'i hundannem amma'nnaano awwonsoo lommanna doo'llitoo'isinattee.

⁶ Oo doo'llantam lommannim miiqakkam luwwi bee'ane, mexxo'i meentichchona aro'o, ixxi oosim adaba bi'imminnee ijaajancha sabimminnee acceeqasisoobee'i amma'nnaan ihimmi hasisookko.

⁷Oo amma'nnaano awwonsoo lommanchi Waa'ika baxo baxoohan ihu bikkina ixxonne miiqakkam luwwi bee'an ihimmi hasisookko. Odim bolxoobee'ane, nadadoobee'ane, dimboobee'ane, atanaachcha fissoobee'anee diinate iittoobee'anee ihimmi hasisookko.

⁸Ihukkaarem koyya aa'oohane, er luwwa isseena iittoohane, gaga ijaajoohane, xabbeena, keesammaa gaga ege'lloohanee ihona.

⁹Losu hanqo'i sagarannem losukkisinne qoxxaa uullona. Ee hanqo'i losaninne mulli keeno sogeenaa ee losanom sabbam keeno acceeqasaa dabareenaa xanookko.

¹⁰Dut ijaajantambee'i keen lophphaatim ballachchammaammo yitam keeniinsi awwaad bee'i woshsha woccam keenii huushissam keenii yo'o.

¹¹Oo keen laboobee'i losishsha losissu'uuyyi ixxuwwi gagina awwaadoo luwwa siixxiteena yita'a abaroos hundam amma'nnatiinsi ubbuussam bikkina ixxuwwi suume amaxxitamisa isse.

¹²Ixxuwwiinsi mat hee'u ixxuwwi hiraagaanchi hee'ukkok «Qarxees uulli manni hundem ammanem qophphanaano; jor moochchi'nnoo'i keenoo baxo ceenta'a leella'ina hee'llam keenoo» yaa ixxuwwi bikkina wocaa hee'ukko.

¹³Oo wocamu woshshi hanqi ihu bikkina er amma'nnat hee'oo'isinaa

¹⁴Ayihuxxi manni heessoo hanqa sabbam manni ijaajoo aa'llambee'isinaa qoxxissaa axeere.

¹⁵Muccur keenina hundem luwwim muccura. Ihukkaarem muccuroom bee'i keeninaa amma'nnat bee'i keeninaa muccur luwwi ma'lluchchim bee'e. Hore'oomam ixxuwwik tiirii wodanii muccuroo'n yoohane.

¹⁶Ixxuwwi «Waa'a lanqoommo» yita'a woccamo. Ihukkaarem baxxam baxinne Waa'a laggamo. Mashka'oomim ixxuwwi shigigaa'oo'isa ikkam keeno, ijaajantambee'i keenoo er luwwa maham issiteena labbambee'i keenoo.