Read Hadiyya Tiito'i Asso 3 Bible Online

Tiito'i Asso 3 - Hadiyya bible

Tiito'i Asso 3

¹Manna gassitam keeninaa gassimmi malaayyi yo'i keeninaa amma'nnaan ijaajantamisina tiissiise. Er bax hundam baxxeena guddo'oo keen ikkamisina,

²ayyennem jora woccambee'isa, wocantambee'isa, maashaalluwwaa manni hundinam guullita'a eroomma moo'issam keenoo ikkamisina tiissiise.

³Neese ni gagim eraare qoossinoombee'i keeno, ijaajammoombee'i keeno, huushammoommi keenoo annanni annanni jor mixaninaa liiranchinaa agidoo hee'nnummo. Odim jollinnee to'achchinnee hee'nnummuuyyi sabammaammoo keenoo neesena'i neesem iittammoombee'i keenoo hee'nnummo.

⁴Ihukkaarem neese Gatisaanchi Waa'ik eroommii biijoom yoo iittii la'amaa lasage

⁵neese gantummok banxummi er baxinnette ihoo'n ixxaanninne qishixxatinne la'mmaagge qarammaa aanshaqqimminnettee Keesammi Ayyaaninne haareechchi ihimminnettee.

⁶Ee Keesammi Ayyaanam neese Gatisaanchi Yesuus Kiristoosinne Waa'i niina lonsaa uwwukko.

⁷Eeham issukkok ixxi eroomminne muccullaa neeyyatinne ege'llinoommi heer heerina hee'oo heechcha a'llinoommisinatte.

⁸Kuk amma'nnamaakkoo woshsha. Waa'a amma'nnitam keen er baxonne qoxxitamisina ee woshsha qoxxissaa kuttoo'isina hasoommo. Ookki lobakata eranee manni hundinam awwaadoohanee.

⁹Ihukkaarem awwaad bee'i fitanchiinsi, shumo'o xiqqanchiinsi, wocanchiinsii See'l mashka'inne fitanchiinsii qee'lle. Eehido'i luwwi hawwodoohanee awwaad bee'anee.

¹⁰Annannooma qooccoo mancho mataagge te'im lamaagge soggaa lasage ee manchiinsi gibe.

¹¹Oo manchi boqqi ihukkisa, baaxiilaanchi ihukkisaa ixxi gagannem oogaxxukkisaa la'e.

¹² An hagayye Niqophphilaasanne higiseena sawwummi bikkina Arxeemaasa te'im Tiikiiqoosa ki beyyo asse'oommi ammane ihukkisam ikkaa i beyyo waare.

¹³ Seera la'oo Zeeneesinaa Aphphiloosinaa googonne mahim hanqatoobee'isa issitaa xantittis hundinnem hara'mmitaa geegeese.

¹⁴Ni mannim mishbee'i keen ikka'a gattambee'isa hasisoo luwwa siixxiteena xantamisina er luwwa baximma lossona.

¹⁵Iinninne yo'i keen hundim kiina xummaato asse'llo'ookko. Amma'nnatinne neese iittitam keenina xummaato kure. Waa'ik eroommi ki'nnuwwinne hundinnem maqire ihona.