Read Hadiyya Filimoon Asso 1 Bible Online

Filimoon Asso 1 - Hadiyya bible

Filimoon Asso 1

¹ Yesuus Kiristoos bikkina karamummi iinniinsi Phaawuloosiinsii niyyabbaayyi Ximootoosiinsii iittantaattoo niinninne maqire baxxoo Filimoonina

²ki minenne wixxitam amma'nnaanina, niyyaayya Afiibanaa ee'isam niinninne maqirem mishiraachchi sagarina gaadaa'nnisa ihu Arkiphaasinaa asse'amu asso.

³Niyyanni Waa'iinsii ni Moollanni Yesuus Kiristoosiinsii eroommii xummii ki'nnuwwinne maqire ihona.

⁴Iyyabbaayyi Filimoona, at Waa'i oos hundam iittitoo'isaa Moollanni Yesuusanne yoo ki amma'nnatoo macceesummi bikkina Waa'a uunxeena hincummi amman hundam keese sawwoommi ammane i Waa'a galaxxoommo.

⁶Odim neese Kiristoosan inkummi bikkina niina yoo er luwwi hundam erisa laqqaa ki amma'nnato mulli keenina kurimminne qoxxitoo'isina Waa'a uunxoommo.

⁷Iyyabbaayyo, keesenne amma'nnaa'n wodan usheexxu bikkina ki iitti eese lobakata liiransaakkoo qoxxisaakkoo.

⁸At iina Kiristoosinne abbaayyi ikkitti bikkina at issimmi hasisoo luwwa issitona keese iggimminne ijaajeena xanam hee'ummo.

⁹Ihukkaarem an keese iittoommi bikkina malaayyinnette ihoo'n iittinne uunxoommo. Mashka'oomim an lommancho; odim Yesuus Kiristoos bikkina karamaammoohane.

¹⁰ An keese uunxoommok karaxxi minenne hee'ummuuyyi Kiristoosinne i qachchi issummi Anaasimoos[1] bikkinatte.

¹¹Ixxi kanniinsi illageen kiina awwaadam hee'ukkoyyo. Ihukkaarem ka lasage iinam kiinam awwaadookko.

¹²Ixxom ki beyyo dabaraa asse'aammo. Ixxo ki beyyo dabaraa asse'ummuuyyi an i gagoomim ki beyyo waarummaannisa xigoommo.

¹³An ka beyyonne mishiraachchi saga'l bikkina karamaa yoommaannonne ixxi iina ki bikkenne ihaa hara'mmoo'isina iinninne maqire hee'uta'n iittam hee'ummo.

¹⁴At eese hara'mmitona hasoommok ki doo'llinnette bagaan malaayyinnette ihubee'i bikkina at iittitoo'n maham isseena hasoommoyyo.

¹⁵Ayyi la'ukko Anaasimoos hofqax ammanina kiinniinsi annanni ihukkok ka lasage hundi ammanem kiinninne maqire hee'eenatte ihookko.

¹⁶Ixxi ka lasage kiinninne maqire hee'ookkok agishshisa ihaatette ihoo'n agishshiinsi lophphaa iittamaakkoo abbaayyisa ihaatette. Ixxi iina iittamaakko abbaayyo. Lophphaatim kiina maarinne agishshi ihukkaarem Moollanninne abbaayyo.

¹⁷Ee bikkina at eese ki beshichchi issitaa moo'lloohan ikkilas ixxom i'isa issitaa aa'e.

¹⁸Ixxi keese hawwodu luwwi te'im kiinniinsi liqaayyo aa'u luwwi yoohaare ee badano eesenne yoo'isa issitaa xige.

¹⁹An Phaawuloos ee badano miqeena i anginnem iittamaa kitaabaammo. Ihona bagaan at Kiristoosanne amma'nnitoo'isa issummok anette ihummi bikkina hore'em at ki gagim i bada'n manchi ikkittisa kiina tiissiisimmi hasisooyyo.

²⁰Iyyabbaayyo, ee bikkina ka er luwwa issitoo'isina Moollanni summinne uunxoommuulla. Neese Kiristoosinne abbaayyuwwi inkummi bikkina i wodano liiranse.

²¹An ka kiina kitaabummoka issitoo'isa amma'nnoommo. Hore'em an yummaanniinsi lonsitaa issitoo'isa la'oommo.

²²Odim Waa'i ki'nnuwwi uunxato macceesaa ki'nnuwwi beyyo daba'lloommisa issoo'isa amma'nnoommi bikkina iina koyyina'n mine gudise.

²³ Yesuus Kiristoos bikkina iinninne maqire karamaa yoo Ephphaafir xummaato asse'aakko.

²⁴ Odim i bax beshshuwwi Maarqoos, Arisxirookoos, Deemaasii Luqaasii xummaato asse'llo'ookko.

²⁵Moollanni Yesuus Kiristoos eroommi ki'nnuwwinne maqire ihona.