Read Hadiyya Ibro'i Asso 1 Bible Online

Ibro'i Asso 1 - Hadiyya bible

Ibro'i Asso 1

¹Gaassi doollenne Waa'i niyyanno'ina hiraagaaninne ihaa dut ammane dutisinne kuraa hee'ukko.

²Ihukkaarem ka lasaanchi doollenne ixxi Beetinne niina wocaakko. Oo ixxi Beetim hundem luwwam lago a'lloo'isina Waa'i doo'llukkanee ixxennem hundi luwwam qooccukkanee.

³Oo Waa'i Beet Waa'ika lomba belelaa'aa moo'isoohane; Waa'i qoocci hundoonchim ixxonne yoohanee. Odim qooccamu luwwi hundam ixxaanninne malaayyaam sagarinne bakkiisaa amadaakkoohane. Mannikam baaxiilo muccussaa lasage hundem luwwam ijaajoo Waa'aannonne makkanne iimanenne afuuraakko.

⁴Ixxim Waa'i asse'amaaniinsi lophphoo summa a'llukkisinnem ixxuwwiinsi lobakata lobane.

⁵ Waa'i ixxi asse'amaaniinsi matinam «At i beetona'e; an keese kaballa qaraammo» te'im «An kiina anni ihoommo; atim iina qachchi ikkootto» yukkok bee'e.

⁶ Ihukkaarem Waa'i ixxeka won Beeto ka uulla asse'ukkuuyyi «I asse'amaan hundim i Beetina otossitona» yaakko.

⁷ Asse'amaa'n bikkinam «Ixxena asse'amaano hafachchisa awwaadaanom gii'l laba'nnisa issaakko» yaakko.

⁸ Ihukkaarem ixxi Beet bikkina «I Waa'a, kiikki adillan heer heerinam hee'oohane. Atim ki minaadabanne hanqo'isa oogattittuuyyi gassitoohane.

⁹Muccurooma iittitaa jolle sabbitti bikkina Waa'i keese doo'llaa ki beshshuwwiinsi lophphoo lombi liirancha uwwaakko» yaakko.

¹⁰ Ee'isam «Moollanna! Luxxekam at uulla qooccitaatto. Odim iimanim ki angi baxo.

¹¹Oo keen bi'llamo. Ihukkaarem at hee'llootto. Ixxuwwi hundim eddechchisa ebeettamo.

¹²Atim ixxuwwa weyyakkisa xaaxxootto. Ixxuwwim eddechchisa hagara daba'llitamo. Ihukkaarem at hundi ammanem atetteme. Kiikki doollim hore'em beeddoobee'ane» yaakko.

¹³ Waa'i ixxi asse'amaaniinsi matinam «Ki maso'o ki lokkiinsi woroon isseembe'i afeebe'e iihaannonne makki kollonne afuure» yukkok bee'e.

¹⁴Eehaara'i asse'amaan hundim Waa'ina awwaaddam keenoo Waa'i uwwoo gatimma a'llitam keenoo hara'mmitamisina Waa'iinsi asse'antam ayyaannuwwa.