Read Hadiyya Ibro'i Asso 10 Bible Online

Ibro'i Asso 10 - Hadiyya bible

Ibro'i Asso 10

¹Seer lasaqqi doollenne waaroo er luwwina kobi'lla bagaan hanqo'aneyyo. Ee bikkina See'llisanne hiinchina hiinchina uttoo'n kitima amadda'a Waa'i kollonne hincitam keeno muccusseena hore'em xanukkoyyo.

²Oo kitima amadaa waaraa Waa'ina otossoo keen baaxiiliinsi hanqo'isa muccuraakkoohan yakkota'n ixxuwwi wodan od baaxii'l bikkina acceeqasam hee'ukkoyyo. Kitimam Waa'ina hincaa'imma uttam hee'llo'oyyonnihe?

³Ihukkaarem oo hiinchina hiinchina hincam hee'u kitim manna ixxuwwi baaxii'l bikkina tiissiisoohan hee'ukko.

⁴Mashka'oomim labeennuwwikii fella'ikii xiig baaxiilo muccusseena xanooyyo.

⁵ Ee bikkina Kiristoos ka uulla waaru ammane Waa'ina «At kitimaa kiina uwwakkam luwwaa hassittoyyo. Ihukkaarem iina orachcho gudissitto.

⁶Shokkiisakka'a hincaa'akkam kitimannee baaxii'l bikkina hincoo kitimannee at hore'em liirantooyyo.

⁷Ee ammanenne i bikkina Keesammi Kitaabanne ‹I Waa'a! An ki doo'lla isseena waaraammo› yamamaa kitaabamaakko» yaakko.

⁸Hanaan «Kitima, kiina uwwakkam luwwa, shokkiisakka'a hincaa'akkam kitimaa baaxii'l kitimaa at hassittoyyo te'im eehannonne liirantittoyyo» yukko. Ihukkaarem ee kitim hundam issakkamok See'llisinnette.

⁹Ee lasage odim «Iyyanna! An ki doo'lla isseena waaraammo» yaa e'lloo haareechchi kitima beyyonne uulliseena moosir kitima beyyiinsi bi'isaa hoorukko.

¹⁰Waa'i doo'llisanne Yesuus Kiristoos ixxi gaga matemaaggem kitim issaa Waa'ina hincaa'imminne neese hundim muccullaammo.

¹¹ Qeessi hundim baaxiilo muccusseena xanoobee'i kitima dut ammane ballina ballina dut ammane hincaa'llu'uuyyi uullita'a awwaaddam hee'llo'o.

¹² Ihukkaarem Kiristoos heer heerinam ihoo mexxo'i kitima baaxii'l bikkina hincaa'aa lasage Waa'i makkanne afuuraakko.

¹³Eehanniinsi kid ixxi maso'i ixxi lokkiinsi woroon iheebe'e eehe'enne egeraakko.

¹⁴Mashka'oomim matem kitiminne guullaa baaxiiliinsi muccussu keeno heer heerinam mucculluwwi issaakko.

¹⁵ Odim Keesammi Ayyaanim «Moollanni ‹Ka lasage an ixxuwwinne aagoommi hidir kane, I seera ixxuwwi tiironne issoommo; ixxuwwi wodanonnem kitaaboommo› yaakko» yaa niina kuraakko.

¹⁷ Odim ixxi «Ixxuwwika baaxiiloo jor baxoo od sawwoommoyyo» yaakko.

¹⁸Oo hundim haafamu bikkina baaxii'l bikkina hincoo kitim od hore'em hasisooyyo.

¹⁹Eehaara'i iyyabbaayyuwwa, Yesuus xiiginne Keesammiinsi keesammi beyyo aangeena xannoommis amma'nnamaakkoohane.

²⁰Aangeena xannoommokim ee du'm eddechchinne oohim ixxi maarinne fooqaa'u haareechchi heechchi googinnette.

²¹Keesammi Minenne niina hundiinsi lob qeessichchi yoo bikkina

²² hanqo'i wodaninne, malbee'i amma'nnatinne, jor sawwitiinsi muccuraakkoo wodaninnee muccur wo'inne aanshamaakkoo orachchinnee Waa'i kollonne hincinona.

²³Neeyyato aagu Waa'i amma'nnamaakkoohan ihu bikkina amma'nninaa kulloommi ee neeyyato qoxxinsaa amandona.

²⁴Iittinnee er baxinnee mat mulleka baqaa'nneena sawwinona.

²⁵Mat mat keen mat ihakka'a wixximma losan issita'a sabbo'is ihoo'n neesena'i neesem wixxinaa qoxxixxammona. Hore'em Moollanni waarimmi hincukkisa sawwitakku'uuyyi eraa'llaanniinsi lonsitakka'a wixxi'llehe.

²⁶Hanqo'i woshsha lanqaa lasage ni doo'llinnem baaxiilo banxumlas ee baaxii'l bikkina hincoo kitim bee'e.

²⁷ Ihukkaarem Waa'ina ijaajantambee'i keeno baddisoo oogato'ii itoo malaayyaam giirii egeroolla.

²⁸ Mat manchi Muse'i Seera gindulas lam te'im sas manchi naqqasoohaare oo manchi qishixxat bee'ekam lehookko.

²⁹ Eehaara'i Waa'i Beeto gadukkaannina, baaxiiliinsi muccussu hidi'l xiigam kora'i luwwisa xigukkaanninaa Waa'i ixxi eroomminne uwwu Keesammi Ayyaanam game'llukkaanninaa hinkido'i kee'mmaalli oogato'i gudaakkoo labissakka'ate?

³⁰ Mashka'oomim «Baado miqisimmi iihane; annannichchinam ixxi baxisam an miqoommo» odim «Moollanni ixxi minaadabanne oogatookko» yaa wocukkok ayyetda'e ihukkisa lanqoommo.

³¹Ee bikkina hee'oo Waa'i anganne ubimmi lobakata baddisoohane.

³²Ihukkaarem Waa'ik caakki ki'nnuwwina caakkaa lasage lobakata hawwonne gubbantakko'i eraa'l doolle sawwi'llehe.

³³Mat mat ammane ki'nnuwwa manni illagenne tuussiisakko'ookkoo hawwisakko'ookkoo. Odim mat mat ammanem hawwitam keeninne maqirem hawwitakko'ookko;

³⁴karanto'i keeninam qishixxitakko'ookko. Odim ki'nnuwwi amaxxam bogakko'i ammane liiranchinne iyyaqqitakko'ok iimanenne ki'nnuwwina lobakat doollina hee'oo e'lloo amaxxi yoo'isa laqqakko'i bikkinatte.

³⁵Eehannata'i lobakat irifo'o siiddakkam bikkina ki'nnuwwi amma'nnato darabbakka'a uttakkotte.

³⁶Mashka'oomim Waa'ika doo'lla issitakka'a ixxeka neeyyata a'llitakkeena qoxximmi hasisookko.

³⁷ Keesammi Kitaabanne «Waareena yookkok qaqqisom waarookko bagaan dasooyyo.

³⁸Muccur manchi amma'nnatinne hee'ookko. Ihukkaarem ixxi amma'nnatiinsi laso daba'lluta'n an ixxonne liiramoommoyyo» yamamaa kitaabamaakko.

³⁹Ihukkaarem neese lasonne daba'llita'a bi'llam kee'n gaalchi inkoo'n amma'nnita'a gattam kee'n gaalcha.