Read Hadiyya Ibro'i Asso 11 Bible Online

Ibro'i Asso 11 - Hadiyya bible

Ibro'i Asso 11

¹Amma'nnato yimmi «Soodonne siixxinoommo» yinaa neeyyantoommi luwwa siixxinummaannisa issaa malbee'isa la'isoohane. Moo'nnumbee'i luwwam moo'nnummi luwwisa issaa la'isoohane.

²Gaassi doollenne hee'llo'i manna Waa'i galaxxukkok amma'nnaxxi bikkinatte.

³ Waa'i ixxi sagarinne uulla qooccukkisa amma'nnatinne lanqoommo. Ee bikkina moo'amoo luwwi moo'amoobee'i luwwiinsi qooccamaakko.

⁴ Aabeel Qaayeelaanniinsi e'lloo kitima Waa'ina hincaa'oo'isa issukkok amma'nnato. Waa'im uwwu luwwa aa'imminne Aabeel muccur ihukkisa ixxi bikkina kuraakko. Aabeel lehaa lasagem ixxi amma'nnaxxi bikkina kabad afeebe'em kuramoolla.

⁵ Heenook lehoo'nnim iimane massamukkok amma'nnatinnette. Waa'i ixxo massu bikkina siidamukkoyyo. Ixxi iimane massamoo'n illageenim Waa'a liiransukkisa ixxi bikkina kuramaakko.

⁶Amma'nnakkoo'n Waa'a liiransakkeena xanakkamoyyo. Mashka'oomim Waa'i kollonne hinceena hasookkok Waa'i yoo'isaa ixxo wodaninne hasoo keenina irifo'o uwwoo'isaa amma'nnimmi hasisookko.

⁷ Lasaqqi doollenne ihoo luwwi bikkina Waa'i Nohe'ina qoxxisaa kuru ammane Waa'a baddaa ixxi abaroosa gatiseena markaba baxoo'isa issukkok amma'nnato. Ee'isinne uulli minaadabanne oogatamukko. Nohe'i amma'nnatinne Waa'iinsi uwwamoo muccurooma a'llukko.

⁸ Waa'i Abrihaamina «Gulummi issaa kiina uwwoommo» yu uulla maroo'isina weeshu ammane Abrihaam ijaajamaa maroo'isa issukkok amma'nnato. Ixxim hanno marooda'e la'oo'nnim ixxi uulliinsi firaa marukko.

⁹ Waa'i uwweena neeyyatu uullanne waaraanchi ihaa hee'ukkok amma'nnatinnette. Ixxesam Waa'i uwweena neeyyatu uulla a'llitam Yisaaqii Yaaqoobii allaggi manni uullanne dukkaananne hee'llo'o.

¹⁰Mashka'oomim Waa'i ixxi gagoomim sheeqqaraa gindamoobee'isa issaa baxaa axisaakkoo beero'o Abrihaam egeram hee'ukko.

¹¹ Abrihaam lomma'nnaakkoohane, Saara'a alceennattee qattam amman higaa lomma'nto'ookkotanee ikko'aarem neeyyatu Waa'i amma'nnamaakkoohan ihukkisa la'u bikkina amma'nnatinne oos anni ihukko.

¹² Ee bikkina lehu manchisa ihaa hee'u Abrihaamiinsi iima'n boollaankisaa dambalaq shashsha'llisaa xigakkeena xanakkambee'i shumo'i qaramukko.

¹³ Oo keen hundim ixxuwwina uwwamu neeyyaxxi sagara a'llitoo'nnim amma'nnatinnem leto'o. Ihukkaarem ka uullanne koyyaa waaraanoo ikko'isa laqqo'i bikkina qee'llonne hee'llu'uuyyim moo'lla'a hashshu yita'a liiranto'o.

¹⁴Ee woshsha wocco'i manni ixxuwwi gaqqi uulla egettu'uuyyi yo'is caakkaa la'amaakkoohane.

¹⁵Ixxuwwim ee utta'a fitto'i uulla daba'llita'a matteena sawwito'oohan yakkota'n daba'llita'a mattam gada'i hee'ukko.

¹⁶Ihukkaarem kaba ixxuwwi iimanenne yoo e'lloo uulla mixxamuulla. Ee bikkina Waa'im ixxuwwina beero'o gudisu bikkina ixxuwwina Waa'a yamamaa weeshamukkaare tuussiisooyyo.

¹⁷ Waa'i Abrihaama keenu ammane Abrihaam ixxi beet Yisaaqa Waa'ina kitim issaa uwwoo'isina issukkok amma'nnato. Ee neeyyaxxi sagara egeraa hee'u Abrihaam ixxeka mexxo'i beetichchom Waa'ina kitim issaa uwweena gudaa hee'ukko.

¹⁸Waa'i Abrihaamina «Yisaaq kollinne ki shumo'i weeshamookko» yukkane.

¹⁹Lehu keenom Waa'i lehiinsi ki'iseena xanoo'isa Abrihaam amma'nnaa hee'ukko. Ee bikkina lehiinsi ki'ukkaannisa issaa Yisaaqa dabaraa a'llukko.

²⁰ Lasonne ihoo luwwa Yisaaq sawwimminne Yaaqoobaa Eesa'aa maasse'ukkok amma'nnatinnette.

²¹ Yaaqoob leheena hincu ammanenne Yooseefika lamem oosom maasse'ookkokii bicco sikke'aa Waa'ina otossukkokii amma'nnatinnette.

²² Yooseefim lehoo amman hincukkaare Isra'ee'l minaadab Gibxi uulliinsi fittamisa kurukkokii ixxeka miqem maha issimmi hasisooda'e ijaajukkokii amma'nnatinnette.

²³ Muse'e qaramu ammane lobakata mishisoohan ihukkisa ixxi amaa annii moo'lla'a adi'l ijaajo badditoo'n sas agana maaxxo'ok amma'nnatinnette.

²⁴ Muse'em li'aa lasage «Adi'l landichchi beeto» yamameena sabukkok amma'nnatinnette.

²⁵Ixxim hoffi ammanenne higoo baaxiilonne liiramimmiinsi Waa'i minaadabinne maqirem hawwo aa'imma doo'llukko.

²⁶Ixxi lasonne siixxoo irifo'o moo'u bikkina Gibxi uullanne yoo goddiinsi hundiinsim Kiristoos bikkina hawwo aa'immi lophphoo goddi ihukkisa xigukko.

²⁷Adi'l quunqa baddoo'nnim Gibxi uulliinsi firukkok amma'nnatinnette. Moo'amoobee'i Waa'am moo'ukkaannisa issaa sawwu bikkina laso daba'llimma sabukko.

²⁸ Won ooso shoo'isina ijaajamaa hee'u Waa'i asse'amaanchi Isra'ee'l minaadaphpheka won ooso shoobee'isa Shaashshiqqi Uguda uullisukkokii gereechchi xiiga mi'n goocanne labakkamisa issukkokii amma'nnatinnette.

²⁹ Isra'ee'l minaadab gogaalli uullinne higakkamaannisa ikka'a Ertiira'i Dambalaqa fitto'ok amma'nnatinnette. Ihukkaarem Gibxi uulli manni ixxuwwisam filloommo» yita'a aaggo'aare dambalaq ixxuwwa xuuxukko.

³⁰ Isra'ee'l minaadab lamar balla kululita'a lasage Iyyaarko'i beero'o ootakko'i ki'n oot gindamaa ubukkok amma'nnatinnette.

³¹ Saa'aanchotte hee'llo'i Ra'aabe Isra'ee'l doqqaano qa'llisa issita'a xumminne aa'llo'i bikkina ijaajantambee'i keeninne maqire bi'lloo'n gatto'ok amma'nnatinnette.

³² Eehaara'i Geedewoon bikkina, Baaraaq bikkina, Samsoon bikkina, Yoofta'i bikkina, Daawiit bikkina, Saamu'eel bikkinaa hiraagaa'n bikkinaa kaba kureena amman bee'i bikkina an maham wocoommoyyo.

³³ Amma'nnatinne uulli adilluwwa kaa'llo'o. Hanqo'isa oogattu'uuyyi gassito'o. Waa'i ixxuwwina uwwu neeyyatom siixxito'o. Hobbi suumem ifiisso'o.

³⁴ Malaayyaam giiram xoo'isso'o. Bisa'i qariinsim xotto'o. Hoongaan hee'llo'i keenim qoxxaalluwwi ikko'o. Orannem malaayyaammuwwi ikko'o. Ixxuwwa qasseena waatto'i bii'l diina'am kaa'lla'a guullito'o.

³⁵ Meentim ixxuwwi qarmanni lehiinsi ki'ukkaare a'llito'o. Mat mat keenim e'lloo heechchanne lehiinsi ki'lleena egetta'a hee'llo'i bikkina karatiinsi tirancha sabba'a lobakat asqachchinne leto'o.

³⁶Mat mat keenom naacakko'ookkoo ganakko'ookkoo. Odim mat mat keenom chimchiminne karakka'a karaxxi minenne aagisakko'ookko.

³⁷Mat mat keeno kininne aphphisakka'a shakko'ookko. Mat mat keeno magaazinne lam issakka'a diqakko'ookko. Mat mat keeno bisa'inne shakko'ookko. Mat mat keenim fella'ikaa gereebbikaa labasa edde'lla'a beyyiinsi beyyo do'llu'uuyyi hawwito'ookko. Odim buxaa yaayyanto'oo keenoo ikka'a lobakata hawwito'o.

³⁸Ixxuwwim udma'uwwannee duunneewwannee do'llo'o. Daawwa'uwwannee baalluwwannee maaxanto'o. Ixxuwwina ku uulli laboobee'an ihukko.

³⁹Ku keen hundim ixxuwwi amma'nnaxxi bikkina galaxxanto'oo keen ikko'aarem ixxuwwina uwwamu neeyyaxxi sagara siixxito'oyyome.

⁴⁰Mashka'oomim Waa'i e'lloo sawwite niina gaassaatim sawwu bikkina ixxuwwi niinninne maqirem wo'm keen ikkamo bagaan neese bee'eka wo'm keen ikkamoyyo.