Read Hadiyya Ibro'i Asso 12 Bible Online

Ibro'i Asso 12 - Hadiyya bible

Ibro'i Asso 12

¹Duuphphisa kibbaakkoo dut naqaashshuwwi ni kululleetanne yoo bikkina niina iyyi ihoo luwwi hundaa neese lobakata karaa amadoo baaxiiloo ni haniinsi sheelantaa uunjinaa ni illagenne yoo geellichcha iyyaqqimminne qoxxinaa geellona.

²Geelloommokim ni amma'nnato asheeraanchoo goollaanchoo ihu Yesuusiinsi ni illi annanni ihoobee'isa ixxo moo'imminnette. Ixxim lasagenne siixxoo liiranchi bikkina yaa haqqanne saqalamaa sholle'aa lehimma mahannem xigoo'n ee hawwo iyyaqqaa Waa'i adilla'n barcu'm makkanne afuuraakko.

³Kabadem ihukkaare ki'nnuwwanne afoo hawwonne hooggakka'a anga uwwitakkambee'isina baaxiilaan afisu hawwonne lobakata iyyaqqu Yesuusa sawwi'llehe.

⁴Kabad afeebe'e baaxiilinne gubbantakkam gubbanchanne ki'nnuwwik xiig dunameebe'i afeebe'e gubbantakko'oyyo.

⁵ Waa'i ki'nnuwwa ixxi oos issaa «I beeto, Waa'ika axeerimma sholliissitte; keese sogoo ammanem koo'llitaa uttitte.

⁶Mashka'oomim Waa'i iittoo keeno axeerookko; ixxi oos issaa aa'oo keenom ganookko» yaa sogukkoka xaddakka'atennihe?

⁷Waa'i ixxi oos issaa axeeroo bikkina ixxi axeerimma iyyaqqimminne aa'llehe. Qachchi bi'isoo ammane axeeroobee'i anni ayyette?

⁸Waa'i ixxi ooso hundam axeeroohane. Ki'nnuwwimdu axeerantakkobeelas hincarabe'e bagaan hanqo'i qachchoyyo.

⁹Eehanniinsim loboka maarinne neese qaru anno'i axeerookko. Neesem ixxuwwa lonsinoommo. Eehaara'i foorinne yoo manni hundinam Anni Waa'ina foorinne hee'nneena hinkaa'nna lonsinaa ijaajanchi hasisoohane?

¹⁰Maarinne neese qaru niyyanno'i ixxuwwina danaamo labaa moo'amukkisinne hoffi ammaninam neese axeerookko. Ihukkaarem Waa'i ixxesam neesem muccur keen inkoommisina ni eroommina axeerookko.

¹¹Axeerimmi hundim ammanoomina kichche'isoohan ihaa moo'amookko bagaan liiransooyyo. Ihukkaarem axeeranta'a losso'i keenina lasaanchonne xummi wo'mmaakkoo muccuroo'm heechcha siidisookko.

¹² Ee bikkina ki'nnuwwika qacu anguwwaa hoogu gurubbuwwaa qoxxissehe.

¹³ Dim manchi fayye'oo'isinatte bagaan fayye'eena ihukkok beyyo fatakaa iiqamoobee'isina ki'nnuwwi lokkina xabbeen googo hassehe.

¹⁴Manni hundinnem xumminne hee'llakkeena yaki'llehe. Odim keesamubee'ek ayyim Waa'a moo'eena xanoobee'i bikkina keesamimmina yaki'llehe.

¹⁵ Ki'nnuwwiinsi matinam Waa'ik eroommi hoffe'oobee'isina qoxxitakka'a ege'llehe. Ee'isam ki'nnuwwi lambe'enne qaraaraalli xaph li'aa ki'nnuwwa hawwisoobee'isinaa dut kee'nnekam heechcha bi'isoobee'isinaa ege'llehe.

¹⁶ Ki'nnuwwiinsi ayyim saa'aanchi te'im mexxo'i ammancho itoo hurbaatina wonooma biteesaa haashaaramu Eesa'isa ihoobee'isa qoxxitakka'a ege'llehe.

¹⁷ Lasonne Eesa'i annika maasso a'lleena hasu ammane maassi ixxena hooramukkisa laqqakkamo. Ixxi wi'llukkuuyyi maasso lobakata hasukkaarem luxxi huushancha mahinnem gudiseena xanukkoyyo.

¹⁸ Anginne amadakkeena xanakkam luwwi oohim aphpham hee'u giir, tuunsi, witiriichchi, hambu'llam,

¹⁹xurumbulli sagarii macceesu manni «Od edamaa wocamoone» yisiisu lobakata baddisam hee'u sagarii hee'u Siina'i duuna ki'nnuwwi affakko'oyyo.

²⁰ Mashka'oomim «Diinatim ee duuna nakkuta'n kininne aphphissakka'a shi'llehe» yoo ijaajo iyyiteena xanto'oyyo.

²¹Ee ammane moo'amu luwwi lobakata baddisoohan hee'u bikkina Muse'e «An lobakata baddaa huxe'aammo» yukko.

²²Ihukkaarem ki'nnuwwi Xiyoo'n duuna oohim hee'oo Waa'ina beero'i ihu iima'n Yerusaaleema ixxonnem xigakkeena xanakkambee'i Waa'i asse'amaan liiranchinne wixxu beyyo affakko'ookko.

²³Odim iimanenne summi kitaabamaa Waa'ina won oos ikka'a wixxito'i amma'nnaa'n beyyo, manni hundannem oogatoo Waa'i beyyoo muccurooma siixxito'i xummaan manni foor yoo beyyoo affakko'ookko.

²⁴ Odim haareechchi hidirina lambe'i manchi ihu Yesuus beyyoo Aabeel xiigiinsi lobakata e'lloo'isa wocoo kifamu xiiqqi beyyoo waattakko'ookko.

²⁵ Ee wocoohaanni sagara sabbakkambee'isa ege'llehe. Ka uullanne Waa'i sagara kuroohaanniinsi macceessa'a sabbo'i keen Waa'i oogato'iinsi xottobeelas iimaniinsi kuroohaannika sambumlas hinkid xolleena xannoommo?

²⁶ Ee ammane ixxek sagar uulla heekkeesaakko. Ihukkaarem kaba «Mataagge uulli xale'i ihoo'n iimanem edaa heekkeesoommo» yaa hide'aakko.

²⁷Ku «Mataagge eddaate» yoo sagar ku qooccamu luwwi heekke'aa bi'oo'isaa heekke'oobee'i luwwi qoxxaa hee'oo'isaa moo'isoohane.

²⁸Ee bikkina heekke'oobee'i adillano aa'nnoommi bikkina Waa'a galaxxinona. Waa'i liiramoo duuha'anne ixxo lonsimminnee baddimminnee ixxena otossinona.

²⁹ Mashka'oomim ni Waa'i shokkiisoo giira.