Read Hadiyya Ibro'i Asso 13 Bible Online

Ibro'i Asso 13 - Hadiyya bible

Ibro'i Asso 13

¹Abbaayyuwwi iitti ki'nnuwwanne hundi ammanem hee'ona.

² Mat mat keen koyya aa'nnoommuulla yitu'uuyyim laqqoo'nnim Waa'i asse'amaano aa'llo'i bikkina ki'nnuwwim koyya aa'imma xaddakkotte.

³Ki'nnuwwim ixxuwwinne maqirem karantakko'aannisa ikkakka'a karanto'i keeno sawwi'llehe. Ee'isam hawwo aa'oo keenom ixxuwwinne maqirem hawwo aa'llakkamaannisa ikkakka'a sawwi'llehe.

⁴Mine issimmi manni hundi beyyonnem lombi yoohan ihona. Saa'aanonnee lokko iggaalluwwannee Waa'i oogatoo bikkina aree aro'ii ixxuwwina'i ixxuwwim amma'nnanto'oo keen ihimmi hasisookko.

⁵ Waa'i «An ki'nnuwwa hore'em uroommoyyoo uunjoommoyyoo» yu bikkina diinate iittimmiinsi gaga ege'llehe. Yooqax niina ihookko yi'llehe.

⁶ Ee bikkina neese iggimminne «I Waa'i iina hara'mmaancho; an baddoommoyyo. Manni eese ma'issookko?» yinoommo.

⁷Luxxeka ki'nnuwwina Waa'i sagara kuru ki'nnuwwi awwonsaano xaddakkotte. Ixxuwwi hee'llo'i heechchaa baxxo'i baxoo sawwitakku'uuyyi ixxuwwi amma'nnato laboo amma'nnat ki'nnuwwinam hee'ona.

⁸Yesuus Kiristoos beeballam kaballam heer heerinam daba'llamoobee'ane.

⁹Hanqo'i googiinsi haareechchi annanni annanni losan ki'nnuwwa agaa massoobee'isa qoxxitakka'a ege'llehe. «Kaka ite, eekka ittitte» yoo losano egetteena yakitam keeninam maham awwaadu bee'i bikkina niikki woro'l mannoom Waa'i eroomminne qoxxuta'n erane.

¹⁰Waa'i ixxi minaadabinne edamam hee'u dukkaananne awwaaddam hee'llo'i qeessuwwi itteena xantambee'i kitima hincaa'akkam beyyi niina yookko.

¹¹ Hundiinsi lob qeessichchi baaxii'l haafitina kitimakko'i diinaxxi xiiga amadaa hundiinsi keesammi du'm woro aagam hee'ukko. Ee diinaxxeka maara manni gattiinsi biireen fissakka'a shokkiisakkam hee'akko'o.

¹²Ee'isam odim Yesuus minaadaba ixxi gaqqi xiiginne muccusseena beero'iinsi biireen hawwo aa'ukko.

¹³Neesem gattiinsi biiranne ixxi kollonne fillaa ixxi gadamu gadancha baxxammona.

¹⁴Mashka'oomim ka uullanne heer heerinam hee'oo beero'i niina bee'i bikkina waaroo beero'o egellaammo.

¹⁵Eehaara'i Yesuus kollinne hundi ammanem galaxxi kitima Waa'ina hincaa'nnona. Oohim ixxi summi bikkina suumiinsi firoo galaxxi kitima.

¹⁶Eroka issimmii yoo luwwika mannina baxxansimmii Waa'a liiransoo kitim ihu bikkina ee'isa issimma xaddakkotte.

¹⁷Ki'nnuwwi awwonsaanina ijaajammehe. Ijaajjo'i ijaajom baxonne hosissehe. Mashka'oomim ixxuwwi baxxam baxina xa'mmantam bikkina ki'nnuwwi foorina yakitamuulla. Ki'nnuwwi ijaajantakkolas ixxuwwi baxo liiranchinne baxxamo. Eehidette ihubeelas baxxam bax kichchechchinnette ihu bikkina ki'nnuwwina awwaadooyyo.

¹⁸Ni bikkinam Waa'a uunxehe. Hundem ammanem luwwi hundannem er luwwa issineena hansoommi bikkina neesenne muccur sawwit yoo'isa qoossinaa lanqoommo.

¹⁹An lonsaahim ki'nnuwwa uunxoommuullak Waa'i neese ki'nnuwwi beyyo qaqqisaa dabaraa asse'oo'isina Waa'a uunxitakkonatte.

²⁰Heer heerinam hee'oo hidi'l xiiginne gereebbina hundiinsi lob allaaraanchi ihu ni Moollanni Yesuusa lehiinsi ki'isu xumma uwwoo Waa'i

²¹ixxi doo'lla issitakkamisina ki'nnuwwina hasisoo er luwwa hundam uwwona. Yesuus Kiristoos kollinne ixxo liiransoo luwwa ki'nnuwwi woronne issona. Kiristoosina heer heerinam lombi ihona! Aameen.

²²Iyyabbaayyuwwa, an ki'nnuwwa sogeena kitaabummi assi gundi ihu bikkina iyyaqqimminne macceessakkamisina ki'nnuwwa uunxoommuulla.

²³Niyyabbaayyi Ximootoos karaxxi miniinsi tiramukkisa laqqakkamisina hasoommo. Ixxi qaqqisaa waarulas an ki'nnuwwa moo'eena ixxenne maqirem ki'nnuwwi beyyo waaroommo.

²⁴Ki'nnuwwa awwonsaan hundinaa amma'nnaan hundinaa ni xummaato kullehe. Xaaliyaa'n uulliinsi waatto'i niyyabbaayyuwwi ki'nnuwwina xummaato asse'llo'ookko.

²⁵Waa'ik eroommi ki'nnuwwinne hundinnem maqire ihona! Aameen.