Read Hadiyya Ibro'i Asso 2 Bible Online

Ibro'i Asso 2 - Hadiyya bible

Ibro'i Asso 2

¹Ayyi la'ukko neese macceensummi sagariinsi luxuunxinaa umboombee'isa ee macceensummi sagaranne qoxximmi hasisookko.

²Waa'i ixxi asse'amaa'n kollinne asse'u assi qoxxaalli ihukkaa'lleensi ee assina ijaajantobee'i keenii gindito'i keenii laboo'isanne guzumo'antolas

³eehaare neese ka kido'i kee'mmaalli gatimma gandumlas Waa'i oogato'iinsi hinkid xolleena xannoommo? Ee gatimmi bikkina gaassaa kurukkok Moollanni ixxi gagame. Ixxi suumiinsi macceesso'i keenim niina qoxxissa'a kutto'o.

⁴Waa'im mare'uwwa, maalalsiisoo luwwaa annanni annanni agannuwwaa issimminne ixxi doo'llukkisinnee Keesammi Ayyaa'n uwwanchuwwa baxxansaa uwwimminnee ixxuwwi kutto'i woshshi hanqi ihukkisa caakkisaa la'isaakko.

⁵Neese kaba waaroolla yinaa kulloommi haareechchi uulla asse'amaan gassitamisina Waa'i issukkoyyo.

⁶ Keesammi Kitaabaannonne mat beyyonne «Waa'a! At ixxena kaa'nna sawwiteena manchi maruchcho? Te'im at ixxo qoxxitaa egettoottok manchi beet maruchcho?

⁷Atim ixxo hoffi ammaninam ki asse'amaaniinsi hoffiissaatto. Ixxonnem lombikaa galaxxekaa laakka issitto.

⁸At qooccitti luwwi hundam ixxi gassoo'isa issitto» yaakko. Hundem luwwam ixxi gassoo'isa issukkuuyyi ixxena ijaajamoobee'isa issu luwwi ma'lluchchim bee'e. Ihukkaarem kaba hundem luwwim ixxena ijaajamukkuuyyi moo'nnummoyyo.

⁹Ihona bagaan hoffi ammaninam Waa'i asse'amaaniinsi hoffe'aa hee'u Yesuus Waa'i eroomminne annannichchinam hawwo aa'aa lehu bikkina kaba lombikaa galaxxekaa laakka issaqqaakkoo moo'nnoommuulla. Ixxim lehukkok Waa'i eroomminne manni hundinatteme.

¹⁰Hundem luwwam ixxi gagina qooccu Waa'i lobakat ooso lombanne aagiseena yaa Yesuusa hawwonne aagisaa muccussimmi hasisoohan hee'ukko. Ee mashka'inne Yesuus gatimmi googonne manna awwonsoohan ihukko.

¹¹Manna baaxiiliinsi muccussookkokii muccutto'i keenii hundim matem anniinsettem ikko'i bikkina ixxuwwa «Iyyabbaayyuwwa» yaa weesheena tuurukkoyyo.

¹² Ee bikkina «Ki summa iyyabbaayyuwwina kuroommo. Ixxuwwi wixxixxi lambe'ennem keese mazmuurinne galaxxoommo» yukko.

¹³ Odim mulli beyyonnem «An Waa'anne amma'nnoommo» yukko. Odim «Anii iina Waa'i uwwu oosii keyye yoommine» yukko.

¹⁴Ee bikkina oos maarii xiigii yoo keen ikko'isam Yesuusim ixxuwwisam manchi ihukko. Oohim lehonne malaayyi yoo Sheexaancho lehinne kaa'eenaa yaatette.

¹⁵Ee'isinne hee'llam doolli hundoomam leho baddimminne ki'ukkok agiddanonne hee'llam keen hundam wolabbanonne fisseenatte.

¹⁶ Hanqinam Yesuus waarukkok Waa'i asse'amaano hara'mmeenatte ihoo'n Abrihaam shumo'o hara'mmeenatte.

¹⁷Ee bikkina Waa'i awwaadonnem ixxi niina qishixxoohanee amma'nnamaakkoohanee ihaa hundiinsi lob qeessichchi iheena duuha'i hundinnem ixxi abbaayyuwwa labimmi hasisukko. Oohim mannika baaxiilo shiinshiseenatte.

¹⁸Ixxi gagim hawwo aa'aa keenamaakkoohan ihu bikkina keenamoo keeno hara'mmeena xanookko.