Read Hadiyya Ibro'i Asso 3 Bible Online

Ibro'i Asso 3 - Hadiyya bible

Ibro'i Asso 3

¹Waa'ika weeshano aa'llakko'i keesantakko'oo iyyabbaayyuwwa, ni amma'nnatina hundiinsi lob qeessichchoo asse'amaanchoo ihu Yesuusa qoxxissakka'a sawwi'llehe.

² Waa'i minenne Muse'e amma'nnamaakkoo awwaadaanchi ihukkisam Yesuusim doo'llu Waa'ina amma'nnamaakkoohane.

³Mine baxoo manchina miniinsi lophphoo lombi yoo'isam Yesuusina Muse'eensi lobakata lophphoo lombi laboohane.

⁴Hundem minem baxukkok yookko. Ihukkaarem luwwi hundam baxukkok Waa'a.

⁵Hanenne ihoo luwwina naqqasaanchi ihoo'isina Keesammi Minenne hundannem Muse'e awwaadaanchisa amma'nnamaakkoohan hee'ukko.

⁶Ihukkaarem Kiristoos Keesammi Mine gassookkok amma'nnamaakkoo qachchisa. Neesem niina yoo neeyyatonne ni amma'nnatoo ni bakkechchaa qoxxinsumlas Waa'ina mine.

⁷ Ee bikkina Keesammi Ayyaan yoo'isam «Kaballa Waa'i sagara macceessakkolas

⁸udma'i uullanne ijaajancha sabba'a keento'i ammane ixxuwwika wodano duudisso'i ki'nnuwwi anno'isam ki'nnuwwi wodanom duudissakkotte.

⁹Ixxuwwi ee beyyonne eese keento'ookko. An baxummi baxom sor hiinchina moo'llo'ookko.

¹⁰Ee bikkina an Waa'i ee qaranchanne lobakata quuqaa ‹Ixxuwwik wodan hundi ammanem huushamoohane; i googom laqqo'oyyo› yummo.

¹¹Ee bikkina «An uwwoommi usheexxatonne hore'em aaggamoyyo» yaa quunqinne hide'aammo› yaakko» yukko.

¹²Iyyabbaayyuwwa, hee'oo Waa'iinsi annanni issaa ubbuusoo amma'nnoobee'i jor wodan ki'nnuwwanne ayyennem hee'oobee'isa ege'llehe.

¹³Ee'isinne ki'nnuwwiinsi ayyem baaxiil huushisaa ixxek wodan duudoobee'isa kaballa yoo ayyaam beeddoo'n ballina ballina ki'nnuwwina'i ki'nnuwwim qoxxixxammehe.

¹⁴Mashka'oomim luxxeka niina hee'u amma'nnato lasaanchi afeebe'e qoxxinsaa amandumlas Kiristoosinne maqirem lago a'llinoommo.

¹⁵ Oohim Keesammi Kitaabanne «Kaballa Waa'i sagara macceessakkolas ijaajancha sabbo'i keen ixxuwwi wodano duudisso'isa ki'nnuwwika wodano duudissakkotte» yamamukkane.

¹⁶ Waa'i sagara macceessa'a ijaajancha sabbo'i keen ayyayyaam hee'llo'o? Gibxi uulliinsi Muse'e awwonsaa fissu keen hundameyyonnihe?

¹⁷Sor hiinchi hundoomam Waa'a quuqisso'i keen ayyayyaam hee'llo'o? Baaxiilo baxxo'i bikkina leesh udma'anne ubu keenoyyonnihe?

¹⁸Odim ixxi usheexxatonne hore'em aaggambee'isa Waa'i hide'ukkok ayyayyaaminatte? Ijaajancha sabbo'i keenoyyonnihe?

¹⁹Eehaara'i ixxuwwi amma'nnimma hooggo'i bikkina aaggeena xantobee'isa neese lanqoommo.