Read Hadiyya Ibro'i Asso 4 Bible Online

Ibro'i Asso 4 - Hadiyya bible

Ibro'i Asso 4

¹Ee bikkina ee Waa'i usheexxatonne aagimmi neeyyat kabad afeebe'em niina yoo bikkina ee usheexxatonne ki'nnuwwiinsi ayyim aagoo'n gatoobee'isina qoxxitakka'a ege'llehe.

²Ixxuwwina kuramukkisam niinam mishiraachchi sagar kuramaakko. Ihona bagaan macceesso'i sagara amma'nnatinne a'llitobee'i bikkina oo macceesso'i sagar ixxuwwina awwaadukkoyyo.

³ «Waa'i ‹An uwwoommi usheexxatonne hore'em aaggamoyyo› yaa quunqinne hide'ummo» yukko. Ihukkaarem neese amma'nninummi keen Waa'i uwwoo usheexxatonne aangoommo. Eehannina Waa'i uulla qooccukkaanniinsim ki'isaa ixxeka baxo baxaa guullaakko.

⁴ Keesammi Kitaabanne mat beyyonne lama'l balli bikkina «Waa'i baxam hee'u bax hundiinsim lama'l ballanne usheexxukko» yamamaa kitaabamaakko.

⁵ Odim mulli beyyonnem «An uwwoommi usheexxatonne ixxuwwi hore'em aaggamoyyo» yamamaa kitaabamaakko.

⁶Mishiraachchi sagara gaassita'a macceesso'i keen Waa'i uwwoo usheexxatonne aaggobee'ek ijaajantobee'i bikkinatte. Ihona bagaan ee usheexxatonne aaggam mat mat keen yo'o.

⁷ «Kaballa Waa'i sagara macceessakkolas ki'nnuwwika wodano duudissakkotte» yummisam Waa'i lobakat doolliinsi lasage Daawiit kollinne Keesammi Kitaabanne «Kaballa» yimminne mat ayyaamo qoodaakko.

⁸ Waa'i uwwoo usheexxato minaadabina Iyyaas uwwaakkoohan yakkota'n mulli ayyaa'm bikkina Waa'i od wocam hee'ukkoyyo.

⁹Ee bikkina Usheexxaxxi Ayyaam Waa'i minaadabina hanennem yookko.

¹⁰ Waa'i baxam hee'u baxiinsi usheexxukkisam Waa'i uwwoo usheexxatonne aagookkok ayyim ixxi baxiinsi usheexxookko.

¹¹Ee bikkina ixxuwwi ijaajancha hoogga'a ubbo'isam neesem Waa'i uwwoo usheexxatonne aagimma hoongaa umboombee'isa qoxxinaa yakinona.

¹²Waa'ik sagar fooraamoo baxoohanee. Lamqar bisa'iinsim qare'aalli ihu bikkina foore tiiriinsi nigguwwam miqiinsi annanni issaa muroohane. Woda'n woronne maaxamu sawwitee mixanoo saarayyaa moo'aa oogatoohane.

¹³Waa'i illagenne qooccamu luwwi hundim umba'ad ihaa caakkaa moo'amoohane bagaan ixxi illiinsi maaxamu luwwi ma'lluchchim bee'e. Neesem ixxi illagenne uullinaa xa'mmammoommo.

¹⁴Eehaare hundiinsi lob qeessichchi Waa'i Beet Yesuus iimane marukkok niina yoo bikkina ni amma'nnatonne qoxxinona.

¹⁵Oo niina yoo hundiinsi lob qeessichchi neese hoongoommaare qishixxoohane. Ixxi baaxiilo baxukkoyyo bagaan hundisinnem ni'isam keenamaakkoohane.

¹⁶Eehaara'i qishixxatoo eroommaa siixxinoommisina niina hara'mmat hasisoo amman hundam amma'nnatinne Waa'i eroommi adilla'n barcu'm illageen hincinona.