Read Hadiyya Ibro'i Asso 5 Bible Online

Ibro'i Asso 5 - Hadiyya bible

Ibro'i Asso 5

¹Hundiinsi lob qeessichchi ihookkok hundem manni baaxiilinam bikkamaa Waa'ina uwwakkam luwwaa kitimaa amadaa Waa'i illagenne hincaa'oo'isina manni lambe'iinsi doo'llamoo mancho.

²Ixxi gagoomim hoongaanchi ihu bikkina tunneewwinaa huushantam keeninaa qishixximminne hara'mmeena xanookko.

³ Ixxi gagim baaxiilaanchi ihu bikkina xale'i minaadaphphi baaxii'l bikkinatte ihoo'n ixxi gaqqi bikkinam kitima hincaa'immi hasisookko.

⁴ Aaroonisa Waa'i weeshukkaanniinsi bagaan ee lomba ayyim ixxi gaginne massaqqookkok bee'e.

⁵ Ee'isam Waa'i «At i Beeto; an keese kaballa qaraammo» yaa Kiristoosa doo'llukko bagaan Kiristoos hundiinsi lob qeessichchi ihimmi lomba ixxi gaginne massukkoyyo.

⁶ Odim mulli beyyonnem Waa'i «At Malkaxeedeeq qeessooma'n ogoranne heer heerinam qeessichcho» yaakko.

⁷ Manchi ihaa Yesuus ka uullanne hee'u doolle ixxo lehiinsi gatiseena xanoo Waa'ina lobakat laachchinnee indiiddinnee worwaataa uunxaa Waa'ina hincaa'ukko. Lobakat maashaalloominnee ijaajanchinnee uunxu bikkina Waa'im ixxi uunxato macceesukko.

⁸Ixxi mahaa Waa'ina Beet ihukkaarem ee ixxonne afu hawwiinsi ijaajancha losukko.

⁹Ixxi guullaa ijaajamu bikkina ixxena ijaajantam keen hundinam heer heerinam hee'oo heechcha uwwoohan ihukko.

¹⁰Ee bikkina Waa'i ixxo Malkaxeedeeq qeessooma'n ogoranne hundiinsi lob qeessichchi issukko.

¹¹Ka woshshi bikkina woncoommi dut luwwi hee'ukko. Ihukkaarem ki'nnuwwi qaqqissakka'a qoossitakkambee'i bikkina caakkinsaa kurimmi kee'mmaalla.

¹² Ki'nnuwwi kaba mulli keenina losisaan ihimmi hasisukkuuyyi Waa'i saga'lleka asheero'i losano mat manchi losisona hassakkamuulla. Ki'nnuwwi hassakkamuullak ado bagaan qoxxaalli hurbaatayyo.

¹³Xale'i ado agukkuuyyi hee'ookkok hundim ciilichchi ihu bikkina hanqo'i woshsha la'oobee'ane.

¹⁴Ihukkaarem qoxxaalli hurbaat hasisookkok li'ino guullita'a erokaa joraa annanni issita'a la'immi losan yoo keeninatte.