Read Hadiyya Ibro'i Asso 6 Bible Online

Ibro'i Asso 6 - Hadiyya bible

Ibro'i Asso 6

¹Ee bikkina neese Kiristoos bikkina lonsummi luxxi losano lasonne ullaa guullinaa li'nnummuuyyi illage mallona. Lehina awwonsaa massoo baaxiilo biiraa yimmaa Waa'anne amma'nnimmaa ki'nnuwwina eraarem losinsummi bikkina la'mmaagge shooho'o murimmi hasisooyyo.

²Ee'isam xammaqanchi bikkina, hanenne anga issakka'a Waa'a uunximmi bikkina, lehiinsi kichchi bikkinaa heer heerinam hee'oo oogaxxi bikkinaa odim daballaa losinsoommoyyo.

³Waa'i doo'llamdu ihulas ee keeno odim issinoommo.

⁴Kanniinsi illageen Waa'ik caakki caakkaa hee'u keen, iima'n uwwanchuwwika xee'nna moo'lla'a hee'llo'i keenii Keesammi Ayyaa'n uwwancham baxxamaan hee'llo'i keenii daba'llita'a ubbolas ee keeno baaxiilo biiraa yita'a daba'llitamisa issimmi xansiisoobee'ane.

⁵Odim ixxuwwi Waa'ik sagar eran ihukkisaa lasaqqi doollenne waaroo malaayyee laqqa'a hee'llo'o.

⁶Amma'nnatiinsi ixxuwwi ubbolas Waa'i Beeto la'mmaaggem haqqanne saqaltamuullaa manni illagenne tuussiissamuullaa ihu bikkina baaxiilo biiraa yita'a daba'llitamisa issimmi xansiisoobee'ane.

⁷Dut ammane ga'nnoo xeena agaa misha siideena abuulloo keenina awwaadoo misha uwwoo uulla Waa'i maasse'aakkoohane.

⁸ Ihukkaarem oo uulli uttaa acoongaraa mutisoohan ihulas awwaad bee'anee duumameena gudaakkoohanee. Ee uullik lasaanchoom giirinne shokkimma.

⁹Iittantakko'oo iyyabbaayyuwwa, neese ee'isa woncummaarem ki'nnuwwi gattakko'i bikkina e'lloo maassi ki'nnuwwina yoo'isa qoossinaa lanqaammo.

¹⁰Waa'i hanqo'isa oogatoohan ihu bikkina ki'nnuwwika baxo kabad afeebe'em amma'nnaano hara'mmimminne Waa'i bikkinaa yitakka'a issitakko'i luwwa moo'isoo iitto xadooyyo.

¹¹Ki'nnuwwi a'llinoommo yitakka'a neeyyatinne egettakko'i luwwa a'llitakkeebe'i afeebe'e annannichchim ee yakite lasaanchi afeebe'e moo'issakkamisina minxoommo.

¹²Ee bikkina Waa'i neeyyaxxisanne amma'nnatinnee iyyaqqimminnee lago aa'llam keeno labbehe bagaan ceemmaalluwwi ikkakkona neese hansoommoyyo.

¹³ Waa'i Abrihaamina neeyyata uwwu ammane ixxi gagiinsi lophphookkok matim bee'i bikkina «Hanqinam an keese maasse'oommo. Ki shumo'om fikkaannisoommo» yaa ixxi gagannem hide'aakko.

¹⁵Abrihaamim iyyaqqimminne egeraa Waa'i uwwu neeyyata siixxukko.

¹⁶Manni mat luwwina hide'oo ammane ixxi gagiinsi lophphoo luwwanne hide'ookko. Oo hidirim fitamu luwwi hundam guullookko.

¹⁷Waa'i ixxeka neeyyaxxi sagara a'llitam keenina ixxi sawwite dabaransoobee'an ihukkisa moo'iseena yaa hide'imminne caakkisaa kurukko.

¹⁸Ee'isinne ee lamem luwwannem Waa'i qophphanoobee'anee ixxi sawwitem dabaransoobee'anee ihukkisa niina la'isaakko. Ganteena ixxi kollonne gimbummi neesem ee ni illagenne yoo neeyyato amandeena lobakat iggimmi yookko.

¹⁹ Oo ni foorina yoo neeyyat markaba uullisimmina awwaadoo luwwisa amma'nnamaakkoo luwwisa niina yookko. Oo neeyyat iimanenne yoo Keesammi Mi'n du'm eddechcha higaa hundiinsi keesammi beyyo aagukkane.

²⁰ Yesuus Malkaxeedeeq qeessooma'n ogoranne heer heerinam hundiinsi lob qeessichchi ihaa ni bikkenne ee hundiinsi keesammi beyyo niinniinsi gaassaa aagaakko.