Read Hadiyya Ibro'i Asso 7 Bible Online

Ibro'i Asso 7 - Hadiyya bible

Ibro'i Asso 7

¹ Ku Malkaxeedeeq Saalee'm adilaa hundam xanoo Waa'ina qeessichchoo hee'ukko. Ixxim Abrihaam adilluwwinne oramaa kaa'aa daba'llukkuuyyi googonne edamaa maasse'ukko.

²Abrihaamim ee adilluwwiinsi massu luwwi hundiinsim tommiinsi mato Malkaxeedeeqina uwwukko. Malkaxeedeeqa yimmi «Muccuroo'm Adila» yimma. Odim Saalee'm adila yimmi «Xummina Adila» yimma.

³Malkaxeedeeqika anna te'im ama te'im qaranchi lugumo la'ookkok ayyim bee'e. Ixxeka qaramu ballaa lehu ballaa la'ookkokim bee'e. Ee bikkina ku Malkaxeedeeq Waa'i Beet kobi'llanne heer heerinam qeessichchi ihaa hee'oohane.

⁴Ni lob anni Abrihaam adilluwwa kaa'aa qeefadaa eebu luwwiinsi tommiinsi mato uwwu ku Malkaxeedeeq hinkaa'nna la'amaakkoo manchi ihuda'e sawwi'llehe!

⁵ Qeessooma'n baxo baxxam Leewi'i shumo'i Isra'ee'l minaadabiinsi oohim ixxuwwi abbaayyuwwiinsi tommiinsi mato aa'llamisina Seer ijaajookko. Oo uwwitam hee'llo'i keenim Abrihaam shumo'o.

⁶Ihukkaarem ku Malkaxeedeeq Leewi'i shumo'iinsi qaramubee'aarem Abrihaamiinsi tommiinsi mato aa'aakko; Waa'iinsi neeyyata aa'u Abrihaamam maasse'aakko.

⁷Hoffok lobaanniinsi maasso aa'immi la'amaakkoohane.

⁸Tommiinsi mato aa'llam hee'llo'i Leewi'i shumo'i mulli mannisam letam keen hee'llo'o. Ihukkaarem tommiinsi mato aa'u Malkaxeedeeq «Heer heerinam hee'oohane» yamamaakko.

⁹Tommiinsi mato aa'am hee'u Leewi'im Abrihaam kollinne ihaa tommiinsi mato uwwaakko.

¹⁰Mashka'oomim Malkaxeedeeq Abrihaaminne edamu ammane Leewi'i Abrihaam gubeedonne hee'ukko.

¹¹Ee Leewi'i qeessooma'nnisanne Isra'ee'l minaadabina Seer uwwamaakko. Leewi'i qeessooma'n bax Waa'i sawwixxeka wonshaakkoohan yakkota'n Aaroon qeessooma'n ogorinnette ihoo'n Malkaxeedeeq qeessooma'n ogoranne mulli qeessichchi ki'immi mahina hasisam hee'ukko?

¹²Mashka'oomim qeessooma'n ogor dabassamoo ammane Seerim dabassanchi hasisookko.

¹³Ku hundim wocamu ni Moollanni waarukkok ayyim qeessichchi ihaa Waa'ina kitima hincaa'akkam beyyonne hore'em awwaadubee'i shumo'iinsette.

¹⁴Ni Moollanni qaramukkok Yihuxxi shumo'iinsette ihukkis qoossamaa la'amaakkoohane. Qeessuwwi bikkina Muse'e wocu ammane ka Yihuxxi shumo'i bikkina maham wocukkoyyo.

¹⁵Ku woshshi lobakata caakkaa la'amukkok Malkaxeedeeqi'nnoo'i mulli qeessichchi waarukkaarette.

¹⁶Ixxim qeessichchi ihukkok manni see'llisinnette, gatti ogo'llisinnettee ihoo'n heer heerinam hee'oo heechchi malaayyinnettee.

¹⁷ Keesammi Kitaabanne ixxi bikkina «At Malkaxeedeeq qeessooma'n ogoranne heer heerinam qeessichcho» yamamaa kitaabamaakko.

¹⁸Mullisinne odim eraa'l ijaaj hoongaanchoo awwaad bee'anee ihu bikkina gataakko.

¹⁹Mashka'oomim seer maham muccussukkoyyo. Ihukkaarem kaba Waa'i kollonne hincinoommisina e'lloo neeyyat niina waaraakko.

²⁰ Eehanniinsim ku qeessooman mulli keen hidir bee'ekam qeessuwwi ikko'is ihoo'n hidirinnette.

²¹Yesuus qeessichchi ihukkok hidirinnette. Oohim «Moollanni ‹At heer heerinam qeessichcho› yaa hide'aakko; hide'u sagaram dabarooyyo» yamamaa kuramukkisinnette.

²²Ee hidi'l mashka'inne Yesuus e'lloo hidirina lubbat ihaakko.

²³Eraare awwaaddam hee'llo'i qeessuwwa qeessooma'n awwaadiinsi leh annanni issam hee'u bikkina ixxuwwik xig dut hee'ukko.

²⁴Ihukkaarem Yesuus heer heerinam hee'oo bikkina ixxi qeessoomano ayyenam higisaa uwwooyyo.

²⁵Manni bikkina Yesuus Waa'a uunxeena heer heerinam hee'oo bikkina ixxenne ihaa Waa'i kollonne waaroo keeno hundam guullaa gatiseena xanookko.

²⁶Ee bikkina Yesuus keesamaakkoohane, miiqakkam luwwi bee'ane, muccuraa baaxiilaammuwwiinsi annanni ihaa kaba iimanenne lombinne afuuraa niina hasisoo luwwi hundam wonshoo hundiinsi lob qeessichchoo.

²⁷ Yesuus matemaaggem ixxi gaga kitim issaa hincaa'aa guullu bikkina ee hundiinsi lob qeessuwwisa luxxeka ixxi gaqqi baaxii'l bikkina ee lasage odim minaadaphphi baaxii'l bikkina ballina ballina kitima hincaa'immi hasisooyyo.

²⁸Hanqinam Seer hoongaan manna hundiinsi lob qeessuwwi ihoo'isina doo'llam hee'ukko. Ihukkaarem See'l lasonne waaru hidi'l sagar heer heerinam Waa'i sawwixxeka wonshoo Waa'i Beeto doo'llukko.