Read Hadiyya Ibro'i Asso 8 Bible Online

Ibro'i Asso 8 - Hadiyya bible

Ibro'i Asso 8

¹ Kaba neese woncoommi horoor woshshi kane, Lombi yoo Waa'i adilla'n barcu'm makki kollonne afuuraakkoo kido'i hundiinsi lob qeessichchi iimanenne niina yookko.

²Ixxim awwaadukkuuyyi yookkok hundiinsi keesammi hanqo'i dukkaanannette. Ee dukkaanam baxukkok Waa'a bagaan mannayyo.

³Hundiinsi lob qeessi hundim doo'llamookkok doo'llinne uwwakkam luwwaa kitimaa Waa'ina hincaa'eenatte. Ee bikkina ku hundiinsi lob ni qeessichchim Waa'ina hincaa'oo mat luwwi hee'immi hasisookko.

⁴See'llisanne Waa'ina uwwakko'i luwwa Waa'ina hincaa'oo qeessuwwi yoo bikkina ixxi ka uullannette ihuta'n hore'em qeessichchi iham hee'ukkoyyo.

⁵ Ixxuwwi awwaaddam hee'llo'ok iimanenne yoo Keesammi Minina kobi'llaa hafaa hee'ukkaannonnette. Mashka'oomim Waa'i ixxi minaadabinne edamoo dukkaana Muse'e baxeena asheeru ammane «An kiina duunanne moo'isummi dukkaa'nnisa issitaa hundem luwwam baxxeena qoossitaa la'e» yaa ijaajukkisinnette.

⁶Ihukkaarem kaba Yesuus lambe'aanchi ihaa uullisu hidir eraa'l hidiriinsi lophphoohane. Mashka'oomim oo hidir shooho'amukkok e'lloo neeyyaxxi sagarannette. Ee'isinne Yesuusik qeessooma'n awwaad ixxuwwaanniinsi lobakata lophphoohane.

⁷Luxxi hidironne miiqakkam luwwi ma'lluchchim bee'an ihuta'n la'm hidir hasisam hee'ukkoyyo.

⁸ Ihukkaarem Waa'i ixxi minaadabanne bi'ishsha siidu bikkina «Isra'ee'l minaadabinnee Yihuxxi minaadabinnee haareechchi hidiro aagoommi doolli waarookko.

⁹Oo hidirim ixxuwwika anga amadaa Gibxi uulliinsi fissummi ammane ixxuwwi anno'inne aagummi hidiri'nnoo'i hidiroyyo. Ixxuwwim i hidironne uullitobee'i bikkina anim ixxuwwa gadaa uraa urummo» yoolla.

¹⁰Odim Waa'i «Lasaqqi doollenne Isra'ee'l minaadabinne aagoommi hidir kane, I seeram ixxuwwi tiironne issoommo. Ixxuwwi wodanonnem kitaaboommo. Anim ixxuwwina Waa'i ihoommo. Ixxuwwim i minaadab ikkamo.

¹¹Hoffaanniinsi ki'isaa lobaannonne afeebe'e hundim eese laqqam bikkina ayyim ixxi beshichcho te'im ixxi abbaayyo ‹Waa'a la'e› yaa losisooyyo.

¹²Anim ixxuwwi baaxiilo haafoommo. Ixxuwwi bi'ishsham hore'em sawwoommoyyo» yoolla.

¹³Waa'i ka hidiro «Haareechchi» yimminne eraa'l hidiro moosir issaakko. Ebeeru luwwii moosiru luwwii bi'oo amman hincaakko.