Read Hadiyya Ibro'i Asso 9 Bible Online

Ibro'i Asso 9 - Hadiyya bible

Ibro'i Asso 9

¹Luxxi hidirinattem yakkota'n Waa'ina otossakkam siyya'ii uullanne ixxena otossakkam dukkaanii hee'ukko.

² Ee dukkaanam lam dum yoohan issakka'a baxakko'oohan hee'ukko. Caakka dissakkam mu'ut, xaraphpheezii keesammi qorosho'ii hee'u dukkaa'n luxxi baxxanchi «Keesammi beyyo» yamamam hee'ukko.

³ La'm du'm eddechchiinsi afareen yoo du'm wor «Keesammiinsi keesammi beyyo» yamamam hee'ukko.

⁴ Ee Keesammiinsi keesammi beyyonne aduruusa wiriissimmina worqiinsi baxamaakkoo mu'utii worqinne goolabamaakkoo saaxinii hee'ukko. Ee saaxi'n woronnem maanna'i hee'u worqiinsi baxamaakkoo mu'ut, lataa buyya eebaakkoo Aaroon biccii tommem ijaajim kitaabamaa hee'u lam ki'n ba'lluwwii hee'ukko.

⁵ Ee saaxi'n hanennem mannika baaxiilo Waa'i haafoo beyyo kiruubeela yamamoo lombi asse'amaan ladinne ifiissa'a hee'llo'o. Ihukkaarem kaba ee kee'n bikkina guullinaa kulleena xannoommoyyo.

⁶ Oo luwwi hundim gudaa lasage qeessuwwi awwaaddam awwaado baxxeena ballina ballina ee dukkaa'n luxxi du'm woro aaggam hee'llo'o.

⁷ Ihukkaarem ee dukkaa'n woronne yoo la'm du'm woro hundiinsi lob qeessichchi xale'i aagam hee'ukko. Ixxim aagam hee'ukkok hiinchonne xale'i mat kor hee'ukko. Aagoo ammanem ixxi gaqqi baaxiilinaa minaadab laqqoo'n baxxo'i baaxiilinaa xiiga amadoo'n aagam hee'ukkoyyo.

⁸Ee'isinne luxxi dukkaa'n awwaad hee'u doollenne hundannem keesammiinsi keesammi woro massoo goog ifiisamaa hee'ukkisa Keesammi Ayyaan caakkisaa kuraakko.

⁹Oohim kaba ihoo luwwina kobi'lla. Waa'ina uwwakkam luwwii kitimmuwwii Waa'ina otossitam hee'llo'i kee'nneka wodano muccusseena xanukkoyyo.

¹⁰Oo keen awwaaddam hee'ukkok haareechchi gatti ogora Waa'i uulliseebe'i afeebe'e itakkam luwwi bikkina, agakkam luwwi bikkina, aanshaqqakkam ogolluwwi bikkinaa xale'i biireen issakkam losa'n bikkinaa kuroohane.

¹¹Ihukkaarem Kiristoos kaba issamukkuuyyi yoo er luwwina[1] hundiinsi lob qeessichchi ihaa waaraakko. Ixxim awwaadukkuuyyi yoo dukkaan lobakata lobanee miiqakkam luwwi bee'ane. Oohim manni anginne baxamoo'n yoohanee ka uullanne qooccamu luwwiinsi annanni ihaakkoohane.

¹²Kiristoos keesammiinsi keesammi beyyo aagu ammane fella'ikaa labeennuwwikaa xiiga amadaatette ihoo'n ixxi gaqqi xiiginne heer heerinam niina gatimma siidisaa matemaaggem aagukko.

¹³ Haashaaramu mannanne fella'ikii labeennuwwi xiigii odim kitimakka'a shokkiisakko'i addichchi gii'l buchchii kifakkamaare muccussoohan ihulas

¹⁴heer heerina hee'oo Keesammi Ayyaa'n kollinne miiqakkam luwwi ma'lluchchim bee'i ixxi gaga Waa'ina uwwu Kiristoosik xiig lehaakkoo baxiinsi hee'oo Waa'ina awwaandoommisina niikka tiiro hinkaa'nna lonsaa muccussookko?

¹⁵Ee bikkina oo weeshanto'i keen Waa'i neeyyata uwwu heer heerina hee'oo heechcha siixxitamisina Kiristoos haareechchi hidirina lambe'aancho. Oohim ihukkok luxxi hidiriinsi woroonette ikka'a seera gindimminne baaxiilo baxxo'i keeno lehinne gatiseenatte.

¹⁶Mat manchi lago'i bikkina lago ijaajulas oo woshshi beyyo amadoo'isina ee manchika leho qoossakka'a la'immi hasisookko.

¹⁷Mashka'oomim lago'ina lago ijaaju manchi foorinne hee'ukkuuyyi oo wocu woshshi beyyo amadooyyo. Ihukkaarem oo woshshi beyyo amadookkok oo manchi lehaa lasage.

¹⁸Luxxi hidirom ihuta'n xiig bee'eka beyyo amadukkoyyo.

¹⁹ Seeranne yoo ijaaj hundam Muse'e gaassaa manni hundinam kuraakko. Ee lasage labeennuwwikaa fella'ikaa xiiga wo'inne hamaaraa hiisoophphi buyyaa kashar gereechchi oddaa ee xiiganne cefaa ee See'l kitaabannee manni hundannemii kifaakko.

²⁰Ixxim minaadabina «Waa'i ki'nnuwwina ijaaju hidi'l xiig kane» yukko.

²¹ Ee'isam odim Waa'i ixxi minaadabinne edamoo dukkaanannee ee dukkaa'n woronne awwaaxxakkam mu'ut hundannee ee xiiqqeka kifaakko.

²² Hanqina See'llisanne hofqax luwwiinsi bagaan hundem luchchim xiiginne muccurookko. Xiig dunamubeelas baaxii'l haafit bee'e.

²³Iimanenne yoo mu'utina kobi'l ihu mu'uttuwwi ee'isinne muccurimmi hasisulas iimanenne yoo mu'ut gagim ee keeniinsi e'lloo kitiminne muccurimmi hasisookko.

²⁴Kiristoos iiman gagoonchom aagukko bagaan hanqo'aannina kobi'l hee'u manni anginne baxamu hundiinsi keesammi du'm woro aagukkoyyo. Kaba ixxi ni bikkenne ihaa Waa'i illagenne moo'amoolla.

²⁵Hundiinsi lob qeessichchi hee'ukkok hiinchina hiinchina ixxi gaqqi xiig ihoo'n diinaxxi xiiga amadaa keesammiinsi keesammi woro aagam hee'ukko. Ihukkaarem Kiristoos ixxi gaga dut ammane kitim issaa hincaa'eena aagukkoyyo.

²⁶Ee'is ihuta'n uulli qooccamukkaanniinsi ki'isaa dut ammane hawwimmi hasisam hee'ukko. Ihukkaarem kaba lasaanchi doollenne mannika baaxiilo shiinshaa hooreena matemaaggem ixxi gaga kitim issaa hincaa'eena waaraakko.

²⁷Manni hundim mataagge lehimmi hasisookko. Ee lasage oogato'o aa'eena Waa'i illagenne hincookko.

²⁸ Ee'isam Kiristoos dut kee'nneka baaxiilo shiinshaa hooreena mexxo'aagge ixxi gaga kitim issaa uwwaakko. Ixxi la'mmaagge waarookkok ixxo qulunxinne egeroo keeno gatiseenatte bagaan baaxii'l bikkina leheenayyo.