Read Hadiyya Yaaqoob Asso 1 Bible Online

Yaaqoob Asso 1 - Hadiyya bible

Yaaqoob Asso 1

¹ Waa'inaa Moollanni Yesuus Kiristoosinaa awwaadaanchi ihu Yaaqoobiinsi uulli hundannem binnito'i Waa'i minaadabina asse'amu assechcha. Xummi ki'nnuwwina ihona.

²Iyyabbaayyuwwa, annanni annanni ihaakkoo keenanchi ki'nnuwwanne afoo ammane lobakata liirammehe.

³Mashka'oomim ki'nnuwwi amma'nnatonne keenanchi waaroo ammane xa'nnimminne qoxxitakkamisa laqqakkamo.

⁴Xa'nnimminne qoxximmi ma'lluwwim hanqatoo'n wo'm muccur keen ikkakkamisina afisoohan ihona.

⁵Ki'nnuwwi lambe'iinsi qooroom hoffe'u manchi hee'ukkaare Waa'a uunxona; Waa'im uwwookko. Mashka'oomim ixxi ma'lluwwam hooroo'n hundinam biijoominne uwwoo Waa'a.

⁶Ihukkaarem manchi mahannem maloo'n amma'nnatinne uunxona. Maloo manchi hafachchi gafe'aa heekkeesu womoora labookko.

⁷Eehido'i manchi Waa'iinsi matem luchchom siidookkoka labisoone.

⁸Mashka'oomim lam sawwitenne yoo bikkinattee issoo luwwi hundannem malamoo bikkinattee.

⁹Heechchanne gadamu amma'nnaanchi Waa'i ixxo lonsoo ammane liiramona.

¹⁰ Goddaanchim Waa'i ixxo hoffiisukkaarem liiramona. Mashka'oomim mannik lombi hix fiitisa giggiroohane.

¹¹Eelliinchi lobakat iibbinne firoo ammane hixe gokkisookko; fiitoomim giggirookko; hixoomikim dan bi'ookko. Ee'isam amaxxa hasoo manchi ixxi matayyaninnem bi'ookko.

¹²Keenanchi afoo ammane qoxxaa uulloo manchi maasse'amaakkoohane. Mashka'oomim Waa'i ixxo iittoo keenina uwweena aagu hidi'l saga'l bikkina uwwoo heechchi laakki irifo'o siixxookko.

¹³Ayyi manchim keenamoo ammane «Waa'i eese keenaakko» yoone. Mashka'oomim Waa'i jor luwwinne keenamooyyo; mannam keenooyyo.

¹⁴Ihukkaarem ayyi manchim keenamookkok ixxi gaqqi mixaninne gosaasamaa maroohaarettee qawwiisamoohaarettee.

¹⁵Ee lasage jor mixan siiraa baaxiilo qarookko. Baaxiilim li'aa lasage leho qarookko.

¹⁶Iittantakko'oo iyyabbaayyuwwa, huushantakkotte.

¹⁷Er uwwanchii muccur uwwanchii hundim Waa'iinsette. Ookki hundim waarookkok iima'n eelliinchi haf daba'llamoo'isa daba'llanchibee'i caakki Anni Waa'iinsette.

¹⁸Ixxi qooccanchi hundannem neese won keen inkoommisina doo'llaa hanqo'i sagarinne qarukko.

¹⁹Iittantakko'oo iyyabbaayyuwwa, kaka xaddakkotte. Manni hundim macceesimmina gaaggaabaalli ihaa wocimminaa quuqimminaa ishtiggaakkoohan ihona.

²⁰Mashka'oomim manni quunqi Waa'i hasoo muccurooma eebeena xanooyyo.

²¹Ee bikkina jor losan hundaa boqqi haalataa uttakka'a Waa'i ki'nnuwwi wodanonne kaasu sagara maashaalloominne aa'llehe. Oo sagarim ki'nnuwwi foore gatiseena xanookko.

²²Macceessakko'i Waa'i sagara baxonne hosissehe bagaan xale'i macceesimminne ki'nnuwwi gaga qawwiissakkotte.

²³Waa'i sagara macceesaa baxonne hosisoobee'ek ixxi gaga gagmoo'ixxinne moo'oo manchisa.

²⁴Mashka'oomim oo manchi ixxi gaga gagmoo'ixxinne danaamisa moo'aqqaa marookko. Ee lasage maha labooda'e xadookko.

²⁵Ihukkaarem wolabbanonne manna fissoo Waa'i sagara qoossaa moo'ookkoka, qacaallisa losoobee'ekaa eehanniinsi odim Waa'i sagar yookkoka xadoo'n baxonne hosisookkokaa baxoo bax hundannem Waa'i maasse'ookko.

²⁶Odim ixxi allabo jora wocimmiinsi egeroo'nnim an amma'nnaancho yookkok ixxi gaga qawwiisookko bagaan ixxi amma'nnat awwaad bee'ane.

²⁷Niyyanni Waa'i illagenne tuulbee'i muccur amma'nnat kane; adaraalluwwa hara'mmimma, busar meento hawwi hundannem hara'mmimmaa ka uulli haashaarammi luchchiinsi gaga ege'llimmaa.