Read Hadiyya Yaaqoob Asso 2 Bible Online

Yaaqoob Asso 2 - Hadiyya bible

Yaaqoob Asso 2

¹Lombaam Moollannanne Yesuus Kiristoosanne amma'nnitakko'oo iyyabbaayyuwwa, manni lambe'enne annannooma moo'issakkotte.

²Kobi'llishshina lam manchi ki'nnuwwi wixxitakko'i beyyo waattamo. Matii goddaanchi anganne worqi quba'a issaqqaa danaam eddechcha edde'aa waarookko. Odim matii buxichchi beeddaakkoo suusa edde'aa waarookko.

³Ee ammane danaam eddechcha moo'imminne «Ka danaam beyyonne at afuure» yitakkamo. Ihukkaarem beeddu suusa edde'aa waaru buxichcho «At ee beyyonne uulle» te'im «I lokki beyyonne uullanne afuure» yitakkamo.

⁴Eehannata'i ki'nnuwwi ki'nnuwwi lambe'enne annannooma issitakkamisii jollinne oogattakkamisii moo'amooyyonnihe?

⁵Iittantakko'oo iyyabbaayyuwwa, macceessehe. Waa'i amma'nnatinne goddaan ikkamisina ixxo iittoo keenina neeyyato aagu ixxi adillano lago aa'llamisina uulli buxxuwwa doo'llukkoyyonnihe?

⁶Ihukkaarem ki'nnuwwi bux keeno gaddakkamo. Ki'nnuwwa cogoo keenii oogaxxi minenne gosaasoo keenii goddaan keenoyyonnihe?

⁷Weeshantakkam er summa duumimminne bi'isookkodu ixxuwwayyonnihe?

⁸ «Mulli manna ki gaqqisa iitte» yamamaa kitaabamu Waa'i Seerina ijaajantakko'aare erisa issitakkamuulla.

⁹Ihukkaarem bii'l qoocca moo'imminne manni lambe'enne annannooma issitakko'aare baaxiilo baxxakkamuulla. Odim Waa'i seera ginditakkam keen ikkakkam bikkina Waa'i Seer ki'nnuwwa acceeqasookko.

¹⁰Odim ayyim Waa'i Seera hundam wonshaa matooma gindookkok hundam gindukkaannisa xigamookko.

¹¹ Mashka'oomim «Saa'llitte» yu Waa'i ee'isam «Shititte» yaakko. Saa'llitti bee'aarem shitittaare Waa'i Seera ginditaatto.

¹²Manna wolabbanonne fissoo Waa'i seerinne mannanne oogatamoo'isa woccehee baxxehee.

¹³Mashka'oomim Waa'i oogato'i urimma issoobee'i manchina urimma issooyyo. Ihukkaarem urimmi oogato'o kaa'ookko.

¹⁴Iyyabbaayyuwwa, manchi «Iina amma'nnat yookko» yukkuuyyi ixxi amma'nnato danaam baxinne moo'isubee'aare ixxena maha awwaadoo? Eehido'i amma'nnat ixxo gatiseena xanoohonnihe?

¹⁵Kobi'llishshina edde'amoo luwwii itamoo luwwii bee'i abbaayyuwwii aayyuwwii hee'amukkaare

¹⁶ki'nnuwwi ixxuwwi heechchina hasisoo luwwa uwwitakkoo'nnim «Iibbona, goddehe, xummanne mallehe» yitakko'aare ixxuwwina maha awwaadoo?

¹⁷Ee bikkina danaam baxbee'i xale'i amma'nnat lehaakkoohane.

¹⁸Ihukkaarem at «Iina amma'nnat yookko» yitaa bakke'llittaare «Iinam er bax yookko» yookkok hee'ukkaare «Ki amma'nnato baxiinsi annanni issitaa moo'ise. Anim i baxinne i amma'nnato kiina moo'isoommo» yoommo.

¹⁹At «Mat Waa'i yookko» yitaa amma'nnitootto. Oohim erane; amma'nnimma'i habusim amma'nnookko. Baddimminnem huxe'ookko.

²⁰Ate, ka qawwa, baxiinsi annanni ihaakkoo amma'nnat mishbee'an ihukkisa laqqooyyonnihe?

²¹ Niyyanni Abrihaam ixxi beet Yisaaqa kitimakkam beyyonne Waa'ina kitimeena hincaa'u ammane ixxi baxinne muccura yamamukko.

²²Ee bikkina ixxi amma'nnat ixxi baxinne maqire ihaa hee'ukkisinne amma'nnat baxinnem wo'm ihukkisa moo'llooyyonnihe?

²³ Waa'i sagarannem «Abrihaam Waa'a amma'nnukko; ixxim Waa'anne amma'nnu bikkina muccur ihaa xigamukko» yamamu sagar wo'mmukko. Abrihaamim Waa'ina beshichcho yamamukko.

²⁴Ee'isam manni muccurookkok xale'i amma'nnatinnette ihoo'n baxinnem ihukkisa moo'e.

²⁵ Saa'aanchi hee'llo'i Ra'aabe Isra'ee'l asse'amaano is minenne aa'llo'i ammanee mulli googinnem elle'amoo'isa issito'i ammanee isdu is baxinne muccutto'oyyonnihe?

²⁶Fooriinsi annanni ihu maar lehaakkoohane. Ee'isam baxiinsi annanni ihu amma'nnat lehaakkoohane.