Read Hadiyya Yaaqoob Asso 3 Bible Online

Yaaqoob Asso 3 - Hadiyya bible

Yaaqoob Asso 3

¹Iyyabbaayyuwwa, neese losisaan inkummi keen mulli keeniinsi lophphaakkoo oogato'o aa'nnoommisa laqqakkam bikkina ki'nnuwwiinsi dut keen losisaan ihoone.

²Mashka'oomim neese hundim lobakat ammane huushammoommi bikkinatte. Ihukkaarem ayyi manchim wocoo woshshi hundannem huushamoobee'ek ixxi gaga ege'lleena xanoo muccur mancho.

³Farashshi niina ijaajamoo'isina suumenne hakkamma issinoommo. Ee lasage farashshooma hansummi kollonne hundannem maroo'isa issinoommo.

⁴Odim markaba sawwi'llehe; markab maham loban ihukkaarem malaayyaam hafachchinne gafe'amoo ammane markaphphi ushe'aanchi hoffi ushe'oo luwwinne hasu kollonne hundannem maroo'isa isseena xanookko.

⁵Ee'isam allab hoffi orachchi ihaa lob luwwanne bakke'ookko. Lob doom gootto'i gii'l xoxanqinne shokkookko.

⁶Allab gii'l laba'nnisa. Odim allab orachchi lambe'enne siidamoo jolli nigga. Allab orachchi hundam haashaassookko. Giir ixxi gagoomim waarookkok xoo'oobee'i giiriinsette ihu bikkina allab manni heechchi hundam luxxaanniinsi ki'isaa lasaanchi afeebe'e ee gii'llisa shokkiisookko.

⁷Moochchi hundim cii'i, uullinne taakke'oo keenii wo'i woronne heekke'oo qooccanchii hund manninne gabbarameena xanamookkomee gabbaramaakkomee.

⁸Ihukkaarem ayyi manchim allabo gabbareena xanooyyo. Ixxonne shoo jor qaraar wo'mmaakkoohane. Ixxim usheexxato uwwoobee'i jor luwwa.

⁹ Ixxennem niyyanni ihu ni Moollanni Waa'a galaxxinoommo. Odim ixxennem Waa'i qooccanne qooccamu manna duummoommo.

¹⁰Matem suumiinsim maassii duunchii firookko. Iyyabbaayyuwwa, eehid ihoone.

¹¹Matem bu'iinsi xee'aalli wo'ii qaraaraalli wo'ii fireena xanoohonnihe?

¹²Iyyabbaayyuwwa, odakkichchi weera misheena xanoohonnihe? Te'im duubaan odakkichchi misha misheena xanoohonnihe? Ee'isam qaraaraalli bu'iinsi xee'aalli wo'i fireena xanooyyo.

¹³Ki'nnuwwi lambe'iinsi lachchi yoo qoor manchi ayyette? Ixxi lachchinnee maashaalloominnee baxu baxo er heechchinne moo'isona.

¹⁴Ihukkaarem qaraaraalli to'achchimmii gaga iittimmii ki'nnuwwi wodanonne hee'ukkaare amaaddakkottee hanqanne qophphantakkottee.

¹⁵Mashka'oomim eehido'i qooroom uwwamookkok uulliinsette, maariinsettee habusiinsettee bagaan Waa'iinsetteyyo.

¹⁶To'achchimmii gaga iittimmii yoo beyyonne hambalaachchanchii jor baxii hundim hee'ookko.

¹⁷Ihukkaarem Waa'iinsi uwwamoo qooroom luxxeka muccura, la'mmekam xumma iittaalla, maashaalla, ijaajamoohane, qishixximmi wo'mmaakkoohanee er mish wo'mmaakkoohanee. Golo'immii biranchii bee'ane.

¹⁸Iittansitam keen iitto wixxa'a muccuroo'm misha wixxaa'llamo.