Read Hadiyya Yaaqoob Asso 5 Bible Online

Yaaqoob Asso 5 - Hadiyya bible

Yaaqoob Asso 5

¹Kaba odim goddaan keen, macceessehe! Jor hawwi ki'nnuwwanne waaroo bikkina laattakku'uuyyi wi'llehe.

² Ki'nnuwwi goddi hundim shamaa bi'aakko. Ki'nnuwwi eddechcham bil itaakko.

³Ki'nnuwwik worqii birii ci'llaakko. Ci'lloomim ki'nnuwwanne dabaraa naqqasoohan ihookko. Oo ci'llim ki'nnuwwi maaram aphphoo gii'llisa itookko. Ka lasaanchi lobakat amaxxa wixxaa'llakko'ookko.

⁴ Odim ki'nnuwwi abuulli hurbaata muru baxaa'nneka baxxo'i bito uwwitakkobee'i bikkina ixxuwwi laachchi macceesamoolla. Ee hurbaata muru kee'n laachcha gogoxxi Moollanni macceesaakko.

⁵Ki'nnuwwi ka uullanne makkannee liiranchannee hee'llakkam bikkina ki'nnuwwi gaga durakkeena xiikkakko'i mirgo'isa geejjissakko'ookko.

⁶Muccura shitakkeena ki'nnuwwi oogattakko'o. Ixxenam sabeena malaayyi bee'e.

⁷Iyyabbaayyuwwa, Moollanni waaro xa'nnimminne egellehe. Abuullaanchi illagee'nnekaa lasaanchikaa xeena siideebe'i afeebe'e xa'nnimminne uulliinsi er misha egerookko.

⁸Ee'isam ki'nnuwwi xa'nnehe. Moollanni waaroo balli hincu bikkina ki'nnuwwi tiiro qoxxissehe.

⁹Iyyabbaayyuwwa, ki'nnuwwannem oogatamoobee'isa ki'nnuwwina'i ki'nnuwwim quunquuntakkotte. Oono'o, oogataanchi waaroo amman hincaakko.

¹⁰Iyyabbaayyuwwa, Waa'i summinne hiraaggo'i keen hawwo xa'nnimminne aa'lla'a kobi'llishshi ikko'isa laqqehe.

¹¹ Odim xa'nnimminne qoxxu keeno «Maasse'amaakkoo keeno» yinoommo. Iyyoob hinkid xa'nnimminne qoxxuda'e macceessakko'ookko. Waa'im lasaanchonne ixxena issu er luwwa moo'llakko'ookko. Eehanniinsim Waa'i uroohanee lobakata qishixxoohanee ihukkisa moo'llakko'ookko.

¹² Iyyabbaayyuwwa, hundiinsi illageen iimanennee uullannee te'im ayyi luwwannem hide'llakkotte. Ki'nnuwwi woc eeyya yimmi ihukkaa'lleensi hanqinne «Eeyya» yi'llehe. Eehideyyo yimmi ihukkaa'lleensi hanqinne «Eehideyyo» yi'llehe. Oohim Waa'i oogato'onne ki'nnuwwi aaggakkambee'isinatte.

¹³Ki'nnuwwi lambe'enne ayyi manchim hawwookkok hee'ukkaare Waa'a uunxona. Ayyi manchim liiramookkok hee'ukkaare Waa'a galaxximminne zammarona.

¹⁴ Ki'nnuwwi lambe'enne ayyi manchim xissukkok hee'ukkaare amma'nnaa'n wixxixxi lommanna weeshona. Ixxuwwim xissaanchina Moollanni summinne zayta labamaa Waa'a uunxamona.

¹⁵Eehido'i amma'nnaxxi uunxat xissaancho fayyiisookko. Xissaanchim baxu baaxiil hee'ukkaare haafite siixxookko.

¹⁶Ee bikkina fayye'llakkamisina ki'nnuwwi baaxiilo ki'nnuwwina'i ki'nnuwwim biiraa yaqqanchinne mat mullaannina Waa'a uunxehe. Muccur manchi uunxat lophphaakkoo malaayyi yoohane.

¹⁷ Eeliyaas ni'isam manchi hee'ukko. Ihukkaarem xeen ga'nnoobee'isa uunxu ammane sas hiinchinaa kollinaa uullanne xeen ga'nnukkoyyo.

¹⁸ Odim Waa'a uunxu ammanenne iimaniinsi xeen ga'nnukko. Uullim misha uwwukko.

¹⁹Iyyabbaayyuwwa, ki'nnuwwiinsi mat hanqi googiinsi firukkaare mulleka hanqo'i googonne dabaruta'n

²⁰ baaxiilaancho huushamu googiinsi dabarookkok baaxiilaanchika foore lehiinsi gatisoo'isaa lobakat baaxiilo haafissiisoo'isa la'ona.