Read Hadiyya 1Pheexiroos Asso 1 Bible Online

1Pheexiroos Asso 1 - Hadiyya bible

1Pheexiroos Asso 1

¹Yaayyanchi mashka'inne Phaanxoosanne, Galatiyanne, Qaphaadooqe'enne, Issiyannee Biitaanannee binnitakka'a hee'llakkam Waa'i minaadabina Yesuus Kiristoosina asse'amaanchi ihu Pheexiroosiinsi asse'amu asso.

²Anni Waa'i gaassaatim sawwaa ki'nnuwwa doo'llukkok Keesammi Ayyaaninne keesantakka'a Yesuus Kiristoos xiiginnem aanshaqqitakka'a muccur keen ikkakkamisinattee ixxena ijaajantakkamisinattee. Ki'nnuwwina eroommii xummii lophphaa ihona.

³Waa'i Yesuus Kiristoosa lehiinsi ki'isimminne heer heeraxxi neeyyata uwwukko. Ixxaanninne lophphaakkoo qishixxatinne haareechcho qarammoommisa issu ni Moollanni Yesuus Kiristoos Anni Waa'ina galat afona.

⁴Ki'nnuwwi a'llitakkam heechchi gulummi bi'oobee'ane, xurbee'anee moosiroobee'anee. Eekka iimanenne ki'nnuwwina gudisaa egeraakko.

⁵Lasaanchi doollenne moo'ameena gudaa yoo gatimmina amma'nnaxxi kollinne Waa'i malaayyinne egerantakko'ookko.

⁶Ihona bagaan kaba ki'nnuwwi hofqax ammanina annanni annanni keenatinne hawwitakko'aarem eehannonne liirammehe.

⁷Bi'oo worqam ihuta'n giiranne issakka'a moo'akkamo; hore'em worqiinsim lophphoo ki'nnuwwi hanqo'i amma'nnatim keenanchi hasisookko. Ee'isinne moo'amu ki'nnuwwi amma'nnat Yesuus Kiristoos waaroo ammane galata, lombaa nuuraa siidisoo'isinatte.

⁸Ixxo moo'llakkobee'aarem iittitakko'ookko; ixxo kaba moo'llakkobee'aarem ixxonne amma'nnitakko'ookko. Ee'isinne kurakkeena xanakkambee'i lombi yoo liirancha liirantakkamo.

⁹Ixxonne yoo amma'nnatinne ki'ukkok ki'nnuwwi foorina gatimma siixxitakko'ookko.

¹⁰Ki'nnuwwi gattakko'i gatimmi bikkinam hiraagaan qoxxaallisa saarayyita'a hassa'a hee'llo'o. Ixxuwwim ki'nnuwwina uwwamu gatimmi bikkina gaassita'atim kutta'a hee'llo'o.

¹¹Ixxuwwanne hee'u Kiristoos Ayyaan Kiristoosanne afoo hawwi bikkinaa ee lasagem ixxi siidoo lombi bikkinaa gaassaatim kuraa hee'ukko. Ookki hinki ammane ihooda'ee hinkido'isinne ihooda'ee ixxuwwi laqqeena yakito'ookko.

¹²Ixxuwwina moo'amukkok ki'nnuwwina awwaadonatte bagaan ixxuwwi gagina awwaaxxiteenayyo. Ixxuwwi ki'nnuwwina awwaaddo'okim iimaniinsi asse'amu Keesammi Ayyaa'n kollinne kaba mishiraachchi sagara kutto'i mannika caakkissa'a kurimminatte. Eekkam Waa'i asse'amaan moo'lleena mixxam hee'llo'o.

¹³Ee bikkina ki'nnuwwika tiiro baqaa'llakka'a baxina guddehe. Yesuus Kiristoos waaroo ammane siixxitakkam eroommina neeyyata issitakka'a ki'nnuwwi gaga gullitakka'a ege'llimminne hee'llehe.

¹⁴Ijaajamoo oosisa ikkakku'uuyyi gaassi lachcha hoonginne hee'llakko'i jor mixano awwontakkotte.

¹⁵Ki'nnuwwa weeshu Waa'i keesamaakkoohan ihukkisam ki'nnuwwi gagim hundisinnem keesantakko'oo keen ikkehe.

¹⁶ Mashka'oomim Keesammi Kitaabanne «An keesammi ihummisam ki'nnuwwim keesammi ikkehe» yamamaa kitaabamaakko.

¹⁷Ayyenam golo'oo'n annannichchonnem ixxi baxisam oogatoo Waa'a «Niyyanni Waa'a» yitakka'a weeshshakkaman ihulas ka koyyina'n uullanne hee'llakkam doolli hundam Waa'a baddimminne hee'llehe.

¹⁸Ki'nnuwwi anno'iinsi aa'llakko'i awwaad bee'i heechchiinsi bitaa'antakko'ok bi'oo birinnette te'im worqinnette ihubee'isa laqqakkamo.

¹⁹Ihukkaarem miiqakkam luwwi bee'i muccur gereechchisa ihu lombi yoo Kiristoos xiiginnette.

²⁰Kiristoos doo'llamukkok uulli qooccameena illageenette; ihukkaarem kaba lasaanchi doollenne ki'nnuwwi bikkina moo'amaakko.

²¹Ixxo lehiinsi ki'isaa lomba uwwu Waa'anne ki'nnuwwina ixxi kollinne amma'nnat yoo bikkina ki'nnuwwik amma'nnatii neeyyatii Waa'annette.

²²Hanqina ijaajantakku'uuyyi hanqo'i abbaayyoo'm iittina ki'nnuwwi heechcha muccussitakka'a ki'nnuwwina'i ki'nnuwwim wodaninnem guullitakka'a iittammehe.

²³Ki'nnuwwi haareechcho qarantakko'ok bi'oo shumo'iinsette ihoo'n heer heerinam hee'oo Waa'i sagarinne bi'oobee'i shumo'iinsette.

²⁴ Ee'isam Keesammi Kitaabanne «Manni hundim hixisa; ixxek lombi hundim hix fiitisa; hixim gogookko; fiitim giggirookko.

²⁵Ihukkaarem Moollanni sagar heer heerinam hee'ookko» yamamaa kitaabamaakko. Oo sagarim ki'nnuwwina kuramu mishiraachchi sagara.