Read Hadiyya 1Pheexiroos Asso 2 Bible Online

1Pheexiroos Asso 2 - Hadiyya bible

1Pheexiroos Asso 2

¹Eehannata'i jolle, qawwiisimma, labishsha, to'achchimmaa hamimmaa hundam ki'nnuwwiinsi qeessitakka'a hoollehe.

²Moollanni biijaalli ihukkisa laqqakko'oohan ihulas haareechcho qaramu ciilluwwi ado hasoo'isa ki'nnuwwim muccur adi'nnoo'i Waa'i sagarinne gattakkeena li'llakku'uuyyi mallehe.

⁴Ee bikkina manni beyyonne sabamaa Waa'i illagenne doo'llamaa lobakat lombi yoo heechcha uwwoo kinchi ihu Kiristoos beyyo waallehe.

⁵Ee hee'oo kinchisam ki'nnuwwim Waa'i hee'oo min ikkakka'a baxammehe. Ee'isinne Yesuus Kiristoos kollinne hee'oo er kitima Waa'ina hincaa'immina keesantakko'oo qeessuwwi ikkakkamo.

⁶ Oohim Keesammi Kitaabanne «Oono'o! An hundiinsim lophphaa awwaadoo doo'llamaakkoo bito xee'aalli kincho Xiyoonanne uullisoommo. Ixxonne amma'nnookkok tuurooyyo» yamamaa kitaabamaakko.

⁷ Ee bikkina amma'nnitakko'i ki'nnuwwina oo kinchi lobakata awwaadoohane. Ihukkaarem amma'nnitobee'i keenina «Mine baxxam keen ‹Awwaadooyyo› yita'a uunjito'i kinchi hundiinsim lophphaa awwaadoohan ihukko» yamamaa kitaabamaakko.

⁸ Odim mulli beyyonnem «Oo kinchi manna qoloohane; kinchoomim ixxuwwa ubbuusookko» yamamaakko. Ixxuwwi qolanto'okim Waa'i sagarina ijaajancha sabbo'i bikkinatte. Ixxuwwi eehannina uwwanto'oo keeno.

⁹ Ihukkaarem ki'nnuwwa tuunsiinsi maalalsiisoo caakkanne fissu Waa'i lomba kuttakkamisina doo'llantakko'oo ixxi shumo'o; adilinam qeessuwwa. Odim keesantakko'oo minaadaba; Waa'inam ixxi gaqqi minaadaba.

¹⁰ Eraare ki'nnuwwi Waa'i minaadab hee'llakko'oyyo. Ihukkaarem kaba ki'nnuwwi Waa'i minaadaba. Eraare urimma siixxitakkobee'i keen hee'llakko'o. Ihukkaarem kaba ki'nnuwwi urimma siixxitakko'ookko.

¹¹Iittantakko'oo iyyabbaayyuwwa, ki'nnuwwi ka uullanne waaraanoo koyyaa ikkakko'i bikkina ki'nnuwwi foorinne uullixxamoo maa'l jor mixaniinsi qee'llitakkamisina uunxoommuulla.

¹²Ayyi la'ukko hanqo'i Waa'a laqqambee'i minaadab «Jor issitam keeno» yita'a ki'nnuwwinne uullixxantota'n ki'nnuwwika er baxo moo'lla'a Waa'i oogateena waaroo balla ixxena lomba uwwitamisina ixxuwwi lambe'enne er baxo moo'issehe.

¹³Moollanni bikkina yitakka'a gassimmi malaayyi yoo keenina ijaajammehe. Adilam ihuta'n hundiinsim hanaan ihaa gassoohan ihu bikkina ijaajammehe.

¹⁴Jora issitam keeno guzumo'llamisinaa eroka issitam keenom galaxxitamisinaa adiliinsi asse'anto'oo keen ikko'i bikkina gassaanina ijaajammehe.

¹⁵Ki'nnuwwi eroka issimminne qawwuwwi keen woccam lachbee'i woshsha sa'a issiissamisina Waa'i doo'lla.

¹⁶Waa'ina awwaaddam kee'nnisa ikkakka'a wolabbaninne hee'llehe bagaan ki'nnuwwik wolabban jolle maaxoohan ihoone.

¹⁷Manni hundam lonsehe. Amma'nnaanom iittehe; Waa'am baddehe; adilam lonsehe.

¹⁸Agido, biijaalluwwinaa maashaalli moollanno'inaa xale'i ihoo'n mogaalli keeninam hundisinnem lonsimminne ijaajammehe.

¹⁹Waa'i bikkina yaa laboobee'isinne afoo hawwonne iyyaqqoo manchi Waa'iinsi maasso siixxookko.

²⁰Jora issitakka'a aphphisakkamaare iyyaqqitakkota'n maha awwaadoo? Ihukkaarem eroka issitakka'a iyyaqqimminne hawwo aa'llakko'aare eehannina Waa'iinsi maasso siixxitakkamo.

²¹Kiristoos kobi'lla awwontakkamisina ixxi ki'nnuwwi bikkina hawwo aa'aa ki'nnuwwina kobi'llishshi ihaakko. Ki'nnuwwi weeshantakko'okim eehanninatte.

²² Ixxi maham baaxiilo baxukkoyyo. Ixxi suumiinsim jor firukkoyyo.

²³ Hanqa oogatoohaannina ixxi gaga higisaa uwwukko bagaan hawwo aa'ukkuuyyim sha'llamukkoyyo. Ixxo game'llakko'aarem dabaraa game'llukkoyyo.

²⁴ Neese baaxiilina lenaa muccuroomina hee'nnoommisina ixxi gagim maarinne haqqanne saqalamaa lehimminne ni baaxiilo iyyukko. Ixxi madinnem ki'nnuwwi fayye'llakko'o.

²⁵Gereebbisa ki'nnuwwi bi'llakko'oo keen hee'llakko'o; ihukkaarem kaba ki'nnuwwi foore allaaraanchi beyyoo egeraanchi beyyoo daba'llitakka'a waattakko'ookko.