Read Hadiyya 1Pheexiroos Asso 4 Bible Online

1Pheexiroos Asso 4 - Hadiyya bible

1Pheexiroos Asso 4

¹Maarinne Kiristoos ni bikkina hawwo aa'aakko. Ki'nnuwwim ee ixxeka sawwimminne ki'n gaga qoxxissehe. Mashka'oomim maarinne hawwo aa'ukkok ayyim baaxiilo baximma uraakkoohane.

²Ka lasage ka uullanne hee'llakkam doollenne Waa'i doo'llina hee'llehe bagaan maa'l mixano wonshitakkotte.

³Mulli minaadab issitam luwwa issimminne oohim jor balalechchinne, maa'l mixaninne, dimbimminne, kajjinne, agimminnee qophpha'n waa'ina otossimminnee hee'llakko'i doolli ihookko.

⁴Kaba ki'nnuwwi ee ixxuwwi abdaadimmi baxinne mat ikkakkobee'i bikkina maalaltamo; game'llitamome.

⁵Ihukkaarem hee'oo keenonnee lehu keenonnee oogateena gudu Waa'ina ixxuwwi issito'i luwwa kuttamo.

⁶Leto'i keeninam mishiraachchi sagar kuramukkok ee bikkinatte. Ee'isinne ixxuwwim mulli mannisam maarinne oogato'o aa'lla'a Waa'i hee'oo'isa foorinne hee'llamisinatte.

⁷Luwwi hundikim lasaanchi afaakko. Ee bikkina ki'nnuwwi Waa'i uunxatina gaga ege'llitakko'oo keenoo baqitakko'oo keenoo ikkehe.

⁸ Lobakat baaxiilo iitti ifiisoo bikkina hundiinsim lonsitakka'a ki'nnuwwina'i ki'nnuwwim hanqo'i iittinne hee'llehe.

⁹Quunquuntakkoo'n ki'nnuwwina'i ki'nnuwwim koyyinano aa'aqqammehe.

¹⁰Annannichchim Waa'iinsi aa'llakko'i annanni annanni uwwancha er gassaanchisa ikkakka'a ki'nnuwwina'i ki'nnuwwim ee uwwancha awwaaxxehe.

¹¹Ayyim kurimmi uwwanchi yookkok Waa'i sagara kurona. Awwaadookkok luwwi hundannem Yesuus Kiristoos kollinne Waa'i galaxxamoo'isina Waa'i ixxena uwwu malaayyinne awwaadona. Lombii malaayyii heer heerinam ixxena ihona! Aameen.

¹²Iittantakko'oo iyyabbaayyuwwa, gii'llisa shokkiisoo hawwi ki'nnuwwa keeneena afoo ammane mat haareechchi luwwi ki'nnuwwanne ihukkaannisa issitakka'a maalaltakkotte.

¹³Kiristoosik lombi moo'amoo ammane ki'nnuwwim lobakata liirantakkamisina Kiristoosika hawwo baxxantakkamuulla ihu bikkina liirammehe.

¹⁴Kiristoos bikkina ki'nnuwwa gadakkamulli ihulas Waa'ik lombi yoo Ayyaan ki'nnuwwanne usheexxoo bikkina maassaammuwwa.

¹⁵Ihukkaarem ki'nnuwwiinsi ayyim manna shimminne te'im gaminne te'im jora baximminne te'im manni woshshanne aagimminne hawwo aa'oone.

¹⁶Amma'nnaanchi ihimminne hawwo aa'ookkok Kiristoos bikkina yaa Waa'a galaxxukkuuyyi hawwo aa'ona bagaan tuuroone.

¹⁷Oogato'i Keesammi Mi'n abaroosanne asheeroo amman kaba afaakko. Oo oogato'i neesenne asheeroohan ihulas eehannata'i Waa'i mishiraachchi sagarina ijaajantambee'i kee'nnek lasaanchi maha iheenatte?

¹⁸ Keesammi Kitaabanne «Er manchim hawwinne gatoohan ihukkaa'lleensi Waa'a badditambee'i keenii baaxiilaammuwwii maha ikkeenatte» yamamaakko.

¹⁹Ee bikkina Waa'i doo'llinne hawwo aa'llam keen amma'nnamaakkoo qooccaanchina ixxuwwi gaga yabo uwwita'a eroka issimma uttoone.