Read Hadiyya 1Pheexiroos Asso 5 Bible Online

1Pheexiroos Asso 5 - Hadiyya bible

1Pheexiroos Asso 5

¹An odim amma'nnaa'n lommanniinsi mat ihummok Kiristoos hawwi bikkinam kuroommok odim waaroo lombiinsim baxxamoommok ki'nnuwwi lambe'enne yoo lommanna sogoommo.

² Allaattakkamisina Waa'i yabo uwwu Waa'i allaachche allaallehe. Allaattakkamokim malaayyinnette ihoo'n iittinnee Waa'i yukkisinnee ihona. Odim ki'nnuwwi gagina mat luwwa siixximmi mixaninnette ihoo'n awwaad yoo mixaninnette ihona.

³Allaachchinam kobi'llishshi ikkehe bagaan ki'nnuwwi allaattakkamisina uwwamu allaachche malaayyinne ijaajjakkotte.

⁴Allaaraanina gassaanchi ihukkok waaroo ammane lombi yoo bi'oobee'i kaachchi mare'e siixxitakkamo.

⁵ Ee'isam woraadduwwa, ki'nnuwwim lommannina ijaajammehe. Ki'nnuwwi hundim gaga hoffiissakku'uuyyi maashaallooma eddechchisa edde'llakka'a ki'nnuwwina'i ki'nnuwwim hara'mmammehe. Keesammi Kitaabanne «Waa'i bolxitam keeno saboohane. Ihukkaarem maashaalluwwina ixxeka eroomma uwwoohane» yamamaakko.

⁶ Ee bikkina Waa'i ixxi ammanenne ki'nnuwwa lonsoo'isina malaayyaam Waa'i angiinsi woroonette ikkakka'a ki'nnuwwi gaga heeshaa'llehe.

⁷Waa'i ki'nnuwwina sawwoo bikkina ki'nnuwwa kichche'isoo luwwi hundam ixxonne ubbuussehe.

⁸Ki'nnuwwi gaga ege'llehe; baqitakko'oo keenom ikkehe. Ki'nnuwwi diinakkichchi Sheexaanchi liqicookkoka hasukkuuyyi hobbichchisa muunukkuuyyi do'oolla.

⁹Uulli hundannem amma'nnatinne ki'nnuwwi abbaayyuwwi eehido'i hawwo aa'llu'uuyyi yo'isa laqqakka'a amma'nnatonne qoxxitakka'a uullitakka'a Sheexaanchinne uullixxammehe.

¹⁰Hofqax ammanina hawwo aa'llakka'a lasage eroommi hundam uwwoo Waa'i heer heerinam hee'oo lombina Kiristoosinne weeshukkok ixxi gagim muccur keen issookko, qoxxisookkoo malaayyem uwwookkoo.

¹¹Ixxena malaayyi heer heerinam ihona! Aameen.

¹² Amma'nnamaakkoo abbaayyo yaa moo'oommi Sillaasinne gundannem ki'nnuwwina ka assi kitaaba kitaabaa asse'aammo. Kitaabummokim ki'nnuwwa sogeenattee kuk hanqo'i Waa'i eroommi ihukkisam kureenattee. Ee bikkina ee eroommanne qoxxitakka'a uullehe.

¹³ Ki'nnuwwisam doo'llamu Baabiloo'n [1] amma'nnaan xummaato asse'aakko. I beet Maarqoosim xummaato asse'aakko.

¹⁴Amma'nnaa'n iittinne ki'nnuwwina'i ki'nnuwwim suunqammehe; Kiristoosan ikkakko'i keenina hundinam xummi ihona! Aameen.