Read Hadiyya 2Pheexiroos Asso 1 Bible Online

2Pheexiroos Asso 1 - Hadiyya bible

2Pheexiroos Asso 1

¹Ni Waa'aanninnee neese Gatisaanchi Yesuus Kiristoosaanninnee muccuroominne neese siindummi lombi yoo amma'nnati'nnoo'i amma'nnato siiddakko'i keenina Yesuus Kiristoosina awwaadaanchoo asse'amaanchoo ihu Pheexiroosa yamamu Simi'ooniinsi asse'amu asso.

²Waa'aa ni Moollanni Yesuus Kiristoosaa la'imminne eroommii xummii ki'nnuwwina lophphaa ihona.

³Waa'i ixxi gaqqi lombinnee eroomminnee weeshukkok ixxo lanqummi bikkina heechchaa hanqo'i amma'nnatinne hee'immaa ixxi gaqqi malaayyinne niina hundem luwwam uwwaakko.

⁴Ka uulli jor mixaninne waaroo adabi'immiinsi fittakka'a Waa'ik qoocci ki'nnuwwanne hee'oo'isina lobakat lombi yoo neeyyato uwwaakko.

⁵Ee bikkina amma'nnatonne eroomma, eroommannem lachcha

⁶lachchannem gaga ijaajimma, gaga ijaajimmannem iyyaqqimma, iyyaqqimmannem Waa'a labimma

⁷Waa'a labimmannem abbaayyoo'm biijooma, abbaayyoo'm biijoomannem iitto eddakkeena xantakko'is hundinnem yaki'llehe.

⁸Oo keen ki'nnuwwina exxukkuuyyi marulas Moollanni Yesuus Kiristoosa laqqakkamisa issookko bagaan baxo tittakko'oo keenoo mish bee'i keenoo ikkakkamoyyo.

⁹Ayyim oo keen bee'ek qooqaa xale'i ixxi illagenne yookkoka moo'oohanee bagaan eraa'l baaxiiliinsi muccurukkisa xadaakkoohane.

¹⁰Ee bikkina iyyabbaayyuwwa, ki'nnuwwika weeshanchaa doo'llanchaa qoxxissakkeena lobakata yaki'llehe. Ee'isa issitakkolas hore'em ubbakkamoyyo.

¹¹Ee'isinne heer heerina hee'oo neese Gatisaanchi ni Moollanni Yesuus Kiristoos adillanonne aaggakkamisina mahim hanqatoo'n uwwamookko.

¹²Maham ee keeno laqqakka'a amaddakko'i hanqanne qoxxitakka'a uullitakko'aarem an ee kee'n bikkina hundem ammanem tiissiisimma uroommoyyo.

¹³An foorinne hee'ummuuyyi ki'nnuwwina tiissiisimminne baqaa'immi hasisoohan ihukkisa la'oommo.

¹⁴Mashka'oomim ni Moollanni Yesuus Kiristoos iina moo'isukkisinne maarinne ka uullanne hee'oommi heechchiinsi abbis ammanenne annanni ihoommisa la'oommo.

¹⁵An kaba lobakata yakoommok ki'nnuwwiinsi lehinne annanni ihaa lasagem ka woshsha hundem ammanem tiittakkeena xantakkamisinatte.

¹⁶Ni Moollanni Yesuus Kiristoosika malaayyee waaroo'isaa ki'nnuwwina la'insummi ammane ixxeka malaayyaam lomba moo'nnaatette bagaan manni qooroominne qooccamu heesso awwonnaateyyo.

¹⁷ Neesem Yesuusinne maqirem keesamaakkoo duunanne hee'nnonam «Kuk an iittoommi i Beeto; an ixxonnem lobakata liiramoommo» yoo sagar hundiinsi hanaan lombi yoohaanniinsi waaru ammane macceensummo. Oo sagar iimaniinsi waaru ammane lombaa galataa Anni Waa'iinsi aa'ukko.

¹⁹Hiraagaa'n sagar hanqi ihukkisa ookki niina caakkisaa kuraakko. Uulli soodeebe'ee soodaraa'l boollaankichchi ki'nnuwwi wodanonne fireebe'ee tuunsonne caakkisakko'i kuraaza egerakkamisa ee sagara egettakko'aare erane.

²⁰Keesammi Kitaabanne kuramu woshsha ayyi manchim ixxi sawwixxisa tireena xanoobee'isa hundiinsim gaassitakka'a la'immi hasisookko.

²¹Mashka'oomim Keesammi Kitaabanne kuramu woshsha manni Keesammi Ayyaan awwonsukkisinne Waa'iinsi waaru woshsha wocukko bagaan manni sawwixxisinne waarubee'ane.