Read Hadiyya 2Pheexiroos Asso 2 Bible Online

2Pheexiroos Asso 2 - Hadiyya bible

2Pheexiroos Asso 2

¹«Neese hiraagaano» yitam qophphanaan keen minaadaphphi lambe'enne ki'llo'isam ee'isam ki'nnuwwi lambe'ennem qophpha'n losisaan ki'llamo. Oo keen bi'isoo qophpha'n losano maaxaqqanne eebbamo. Tisso miqaa ixxuwwa gatisu Moollannam laggamo. Ee bikkina ixxuwwi gaganne dangonnem bichcha eebaqqitamo.

²Odim dut keen ixxuwwika tuussiisoo baxo awwontamo. Ixxuwwi mashka'inne hanqo'i goog duumamookko.

³Oo qophpha'n losisaan diinate iittimmiinsi ki'ukkok ixxuwwi qooccito'i qophphano kuttu'uuyyi ki'nnuwwa coggam keeno. Ixxuwwanne afoo oogato'im lobakat doolliinsi illageen gudaakkoohane. Ixxuwwik bichchim dasooyyo.

⁴Baaxiilo baxxo'i Waa'i asse'amaan gambabbaakkoo tuunsi woronne chimchiminne [1] karanta'a oogaxxi ayyaam afeebe'e oogato'o aa'llam beyyonne egettamisina Waa'i darabukko bagaan ixxuwwina qishixxukkoyyo.

⁵ Ee'isam baaxiilaan keen hee'llam uullanne bichchi wo'o Waa'i eebu ammane muccurooma alallaatam hee'u Nohe'e mulli lamar manninnem maqire gatisukko bagaan eraa'l uullina qishixxukkoyyo.

⁶ Odim baaxiilo baxxam keenina hundinam kobi'l ikkamisina Soddomannee Gomorannee Waa'i giira ga'nnisaa gii'l buchchi ikkamisina oogataa bi'isukko.

⁷ Boqqi keen issitam tuussiisoo luwwanne lobakata hawwukkuuyyi hee'u muccur Looxa gatisukko.

⁸Oo muccur manchi ixxuwwi lambe'enne hee'ukkuuyyi ballina ballina moo'amii macceesamii hee'u ixxuwwi jor baxonne ixxek muccur foor u'nnamam hee'ukko.

⁹Eehaara'i Moollanni ixxena gatto'i keeno keenanchiinsi hinkid gatisooda'ee baaxiilaan keeno bi'iseena oogaxxi ayyaam afeebe'e hinkid egerooda'ee la'ookko.

¹⁰Lophphaatim ixxuwwika jor haashaassoo maa'l mixano awwontu'uuyyi Waa'ika malaayye gaddam keeno oogateena egeraakko. Oo qophpha'n losisaan iggaalluwwaa yito'i luwwiinsi daba'llitambee'i keenoo ikko'i bikkina iimanenne gassitam keenom game'llimma badditamoyyo.

¹¹Ixxuwwiinsi lophphoo wodii malaayyii yoo Waa'i asse'amaanom ikkota'nnim Moollanni illagenne ee keeno game'llito'oyyoo oogatto'oyyoo.

¹²Ihukkaarem oo keen ikkamis qooccanto'isinne laqqam lachchinne qaashanne amadanta'a leteena qaranto'i bii'l moochchisa. Oo keen qoossita'a laqqobee'i luwwa game'llitamo. Ixxuwwi ee bii'l moochchisam bi'llamo.

¹³Ixxuwwi bi'isso'i bi'ishshina hawwo aa'llamo. Ixxuwwik liiranchi balli hundoomam maa'l jor mixano wonshimma. Tuussiisoo luwwaa shigigaa'oo luwwaa baxxam keen ikku'uuyyi ki'nnuwwinne maqire mateeyyoo'm hurbaata ittam ammane maa'l mixano wonshitamo.

¹⁴Ixxuwwik illi xale'i saa'immi baxo moo'oo bikkina baaxiilo baximma hore'em uttamoyyo. Amma'nnatonne qoxxaa uullubee'i keenom huushissam keeno. Ixxuwwina mixano losaakkoo wodan yookko. Ixxuwwi duumanto'oo keeno.

¹⁵ Xabbeen googo utta'a huushanchi googonne matto'ookko. Ee'isam jora issimminne diinate siixxeena iittaa huushamu Baasoor beet Baala'aamisa huushanto'ookko.

¹⁶Ihukkaarem ixxi bi'ishshina Waa'i ixxo axeerukko. Woceena xanoobee'i hallichchi mannisa wocaa ee hiraagaanchika machchaalle egedukko.

¹⁷Oo manni xoo'u bu'isaa hambu'llam ki'isaa massoo duuphphisaa. Ixxuwwina gambabbaakkoo tuunsi gudaakko.

¹⁸Mashka'oomim huushanchi woronne hee'llam kee'n woriinsi abbis ammane fitto'i keeno awwaad bee'i woshsha amaadimminne woccu'uuyyi maa'l jor mixaninne huushissamo.

¹⁹Ixxuwwi gagim jor baxina agid ikka'a hee'llu'uuyyim ee keeno «Neese wolabbanonne fissinoommo» yitu'uuyyi ixxuwwina woccamo. Mat manchi ihu luwwinam kaa'amulas ee luwwina agishshi ihaakko.

²⁰Neese Gatisaanchi ni Moollanni Yesuus Kiristoosa la'imminne ka uulli haashaarammi luwwiinsi fissaqqita'a lasage daba'llita'a eehannonne digaadanta'a kaa'antolas ee kee'nnek illaqqi heechchiinsi lasaqqi heechchi lophphaa jorookko.

²¹Mashka'oomim ixxuwwina uwwamu keesammi ijaajo laqqa'a lasage utta'a laso daba'llitamaanniinsi muccuroo'm googo laqqoo'n hee'llota'n eran hee'ukko.

²² Oohim «Wishichchi uwwe'u uwwanne daba'llukko. Ee'isam boonkekkichchim aanshakka'a lasage daba'llaa haranne biqqiiqqukko» yamamu kobi'llishshi ixxuwwanne afukkok hanqame.