Read Hadiyya 2Pheexiroos Asso 3 Bible Online

2Pheexiroos Asso 3 - Hadiyya bible

2Pheexiroos Asso 3

¹Iittantakko'oo iyyabbaayyuwwa, kaba an ki'nnuwwina kitaabummok la'm asso. Ee kitaabummi lamem assonnem ki'nnuwwika muccur tiiro tiissiisimminne baqaa'eenatte.

²Ki'nnuwwina tiissiiseena hasoommok lobakat doolliinsi illageen keesanto'oo hiraagaan kutto'i woshshaa ki'nnuwwi asse'amaa'n kollinne Gatisaanchi Moollanniinsi uwwamu ijaajoo.

³ Lasaanchi doollenne naaccam keen ixxuwwika jor mixano awwontu'uuyyi naacimminne waattamisa ki'nnuwwi gaassitakka'a la'immi hasisookko.

⁴Ixxuwwim waattamok «Ixxi ‹Waaroommo› yaakkoollayyonnihe? Eehaare ixxi hannonne yookko? Niyyanno'i woddallam leta'a laaqqo'ookko. Uulli qooccamukkaanniinsi ki'isaa luwwi hundim kabad afeebe'em eraa'llisame» yitamo.

⁵ Lobakat doolliinsi illageen Waa'i ixxi sagarinne iimanee uullaa qooccaa uullam wo'iinsi wo'innem qooccukkisa laqqeena ha'yyitamoyyo.

⁶ Ee doollenne hee'u uulli wo'innem xuuxamaa bi'ukko.

⁷Ihukkaarem kaba yoo iimanii uullii Waa'i sagarinne giirinne bi'eena gudaa yookko. Oohim Waa'i ixxena ijaajantambee'i keeno oogataa bi'isoo ayyaam afeebe'e.

⁸ Iittantakko'oo iyyabbaayyuwwa, ka hanqo'i woshsha xaddakkotte. Moollannina kum hiinchi mexxo'i ballisa. Mexxo'i ballim kum hiinchisa.

⁹Mat mat keen «Moollanni dasoohane» yita'a sawwitamisa ihoo'n ixxi «Issoommo» yu luwwina dasoobee'ane. Ixxi ki'nnuwwina qishixxoohan ihu bikkina hundim baaxiilo biiraa yaa daba'llona hasookko bagaan ayyim bi'ona hasooyyo.

¹⁰ Ihukkaarem Moollanni waaroo ayyaam gamaanchisa. Ee ammane iimanim lobakat sagarinne bi'ookko. Iimanenne yoo qooccanchim giirinne bi'ookko. Uullii uullanne yoo luwwii hundim shokkaa bi'ookko.

¹¹Eehannah oo luwwi hundim ee'isinne bi'oohan ihulas ki'nnuwwi hinkido'i manni ihimmi hasisookko? Keesantakko'oo keenoo Waa'a badditakko'oo keenoo ihimmi hasisookko.

¹²Ee'isinne Waa'i waaroo ayyaamo egettakku'uuyyi ixxi qaqqisaa waaroo'isa issehe. Ee ammane iiman shokkaa bi'ookko. Iimanenne yoo qooccanchuwwim giirinne bukkamaa bi'ookko.

¹³ Ihukkaarem Waa'i neeyyatukkisanne muccuroom hee'oo haareechchi iimanee haareechchi uullaa egelloommo.

¹⁴Iittantakko'oo iyyabbaayyuwwa, eekka egettakku'uuyyi tuussiisoo te'im miiqisoo luwwik ma'lluchchim bee'i keen ikkakka'a xumminne Waa'inne edantakkeena qoxxehe.

¹⁵Moollanni qishixxukkok ki'nnuwwa gatisimminatte ihukkisa xaddakkotte. Iittamaakkoo niyyabbaayyi Phaawuloosim ixxena uwwamu lachchinne ki'nnuwwina eehanni bikkina kitaabaakko.

¹⁶Ixxi assonne hundannem kurukkok ee'isinnetteme. Ixxi kitaabu assonne qoossakkeena kee'mmoo mat mat luwwi yookko. Oohim lachchi bee'i keenii lamaankuwwii Keesammi Kitaab woshsha boqqissamisam ixxekam boqqissamo. Eehanninne ixxuwwi gaganne bichcha eebaqqitamo.

¹⁷Iittantakko'oo iyyabbaayyuwwa, eekka gaassitakka'atim laqqakko'ookko. Ee bikkina boqqi kee'n huushancha awwontakka'a qoxxitakka'a uullitakko'i beyyiinsi ubbakkambee'isa ege'llehe.

¹⁸Ihukkaarem neese Gatisaanchi ni Moollanni Yesuus Kiristoos eroommannee lachchannee li'llehe. Ixxena kabademii heer heerinamii lombi ihona! Aameen.