Read Hadiyya 1Yohaannis Asso 1 Bible Online

1Yohaannis Asso 1 - Hadiyya bible

1Yohaannis Asso 1

¹ Neese ki'nnuwwina kitaamboommuullak mahim qooccamoo'n illageenim hee'u heechchi Saga'l[1] bikkinatte. Neesem ixxeensi macceensaammo; ni illinnem ixxo qoossinaa moo'nnaammo; ni anginnem ixxo amandaammo.

² Ixxim Waa'inne maqire hee'ukkokii ixxi gagam niina la'isukkokii heer heerinam hee'oo heechchi niina moo'amukkaare neesem moo'nnummo. Ee bikkina neese ixxi bikkina woncoommuullaa ki'nnuwwinam alallaantoommuullaa.

³Niina Anni Waa'innee ixxi Beet Yesuus Kiristoosinnee mateeyyoom yoo'isam ki'nnuwwinam niinninne maqirem mateeyyoom hee'oo'isina ee niina moo'amukkokaa macceesamukkokaa ki'nnuwwina alallaantoommo.

⁴Neese kaka ki'nnuwwina kitaamboommuullak neesenne liiranchi wo'mmoo'isinatte.

⁵Neese Yesuusiinsi macceensummi assi ki'nnuwwinam alallaantoommok «Waa'i ixxi gagim caakka; ixxonnem tuunsi hore'em bee'e» yoohane.

⁶Neese tuunsonne hee'nnummuuyyim «Waa'inne maqire niina mateeyyoom yookko» yinumta'n woncoommi woshshannee banxoommi baxonnee qophphannoommuulla; hanqim neesenne bee'e.

⁷Ihukkaarem Waa'i caakkanne hee'oo'isa neesem caakkanne hee'nnumta'n neesennena'i neesennem mateeyyoom hee'ookko. Waa'i Beet Yesuus xiigim neese baaxiil hundiinsim muccussookko.

⁸Neesemdu «Neesenne baaxiil bee'e» yinumta'n neese ni gagam huushinsoommuulla; ni woronnem hanqi bee'e.

⁹Ihukkaarem ni baaxiilo Waa'ina biiraa yinumta'n Waa'i amma'nnamaakkoohanee hanqo'anee ihu bikkina ni baaxiil hundam haafookko. Odim ixxi neese bi'insummi bi'ishshi hundiinsim muccussookko.

¹⁰Neesemdu «Baaxiilo banxummoyyo» yinumta'n Waa'a qophphanaanchi issinaammo; ixxi sagarim ni woronne bee'e.