Read Hadiyya 1Yohaannis Asso 2 Bible Online

1Yohaannis Asso 2 - Hadiyya bible

1Yohaannis Asso 2

¹I ooso, baaxiilo baxxakkambee'isina an kaka ki'nnuwwina kitaaboommuullak ayyi la'ukko niinniinsi ayyi manchim baaxiilo baxuta'n anni beyyonne ni bikkina fitamookkok xummaanchi Yesuus Kiristoos yookko.

²Waa'im ni baaxiilo haafukkok ixxennette. Baaxii'l haafite siixxinummok xale'i neesette inkoo'n manni hundichchome.

³Neese ixxi uwwu ijaajo wonshinoommi keen inkumlas ixxo lanqoommisa qoossinaa lanqoommo.

⁴Ayyi manchim ixxo la'oommo yukkuuyyi ijaajo gindoohan ihulas ixxi qophphanaancho. Hanqim ixxi woronne bee'e.

⁵Ihukkaarem hanqo'isa Waa'a iittookkok ixxi sagarina ijaajamoohane. Waa'im niinninne maqire yoo'isa qoossinaa lanqeena xannoommok eehanninnette.

⁶Ayyi manchim Waa'inne maqire hee'eena hasulas Yesuus Kiristoos hee'ukkisa hee'immi hasisookko.

⁷ Iittantakko'oo i qarmanna, ku an ki'nnuwwina kitaaboommuullak haareechchi ijaaj ihoo'n luxxekam macceessakko'i ki'nnuwwi beyyonne yoo eraa'l ijaajome.

⁸Ihukkaarem tuunsi bee'i hanqo'i caakki oohim Kiristoos heechchannee ki'nnuwwi heechchannee moo'amu caakki caakkukkuuyyi yoo bikkina ku an ki'nnuwwina kitaaboommuullak moosiroobee'i haareechchi ijaajo.

⁹Ayyi manchim «An hee'oommok caakkannette» yukkuuyyi ixxi abbaayyo sabookkok kabad afeebe'em yookkok tuunsonnette.

¹⁰Ayyim ixxi abbaayyo iittookkok caakkanne hee'ookko. Ixxo qoloo luwwi hore'em hee'ooyyo.

¹¹Ihukkaarem ixxi abbaayyo sabookkok tuunsonne hee'ookko. Daba'llamookkokim tuunsonnette; tuunsim ixxi ille qooqisu bikkina hanno marooda'em la'ooyyo.

¹²Ooso, Waa'i ki'nnuwwi baaxiilo Kiristoos bikkina yaa uru bikkina ki'nnuwwina kaka kitaaboommuulla.

¹³Anno'o, mahim qooccamoo'n illageenim yoo Waa'i Beeto laqqakko'i bikkina ki'nnuwwina kaka kitaaboommuulla. Harde'uwwa, ee jora kaa'llakko'i bikkina ki'nnuwwina kaka kitaaboommuulla. Ooso, anni Waa'a laqqakko'i bikkina ki'nnuwwina kaka kitaaboommuulla.

¹⁴Anno'o, mahim qooccamoo'n illageenim yoo Waa'i Beeto laqqakko'i bikkina ki'nnuwwina kaka kitaaboommuulla. Odim harde'uwwa, ki'nnuwwi qoxxaalluwwa, Waa'i sagarim ki'nnuwwi wodanonne yoo keenoo ee joram kaa'llakko'oo keenoo ikkakko'i bikkina ki'nnuwwina kaka kitaaboommuulla.

¹⁵Ka uullanne yoo luwwi maa'l mixano, moo'akko'i luwwa jorinne miximmaa yoo luwwanne bakkechchaa ihu bikkina ka uulla te'im ka uullanne yoo luwwa iittitakkotte. Ee keeno iittimmi iima'n Anniinsette ihoo'n ka uulliinsette ihu bikkina ayyi manchim ka uulla iittoohan ihulas iima'n Annik iitti ixxonne bee'e.

¹⁷Ku uullii ka uullanne yoo luwwa miximmii hundim higookko; ihukkaarem Waa'i yu luwwa issookkok heer heerinam hee'ookko.

¹⁸I ooso, lasaanchi doolli hincaakko. Kiristoosina diinakkichchi waaroo'isa macceessakko'isam kabadem Kiristoos maso'ik dut keen ki'llo'i bikkina lasaanchi doolli hincukkisa lanqoommo.

¹⁹Ixxuwwi fitto'ok ni lambe'iinsette. Ihukkaarem eraarem ixxuwwina niinninne maqire mateeyyoom bee'i keen hee'llo'o. Niinninne maqire mateeyyoom yoo keen ikkota'n niinninne maqirem qoxxita'a hee'llam hee'llo'o. Ihukkaarem ixxuwwina niinninne maqire mateeyyoom bee'i keen ikko'isa la'isseena ni lambe'iinsi annanni ikka'a fitto'o.

²⁰Ihukkaarem ki'nnuwwi hundichchonnem Kiristoos labu Keesammi Ayyaan yoo bikkina hanqa laqqakkamo.

²¹Ki'nnuwwina kaka kitaaboommuullak hanqa laqqambee'i bikkinayyo. Ihukkaarem ki'nnuwwi hanqa laqqakkamo. Odim hanqannem qophphan bee'isa laqqakkamo.

²²Eehaara'i qophphanaanchi ayyette? Yesuus Kiristoosatte ihukkisa lagookkok ayyim qophphanaancho. Annaa Beetoo lagookkok ixxi Kiristoosina diinakkichcho.

²³Yesuus Kiristoos Waa'i Beet ihukkisa amma'nnoobee'ek Anni Waa'am lagaakkoohane. Beetonne amma'nnookkok Anni Waa'annem amma'nnaakkoohane.

²⁴Ee bikkina ki'nnuwwi luxxeka macceesakko'i sagaranne qoxxitakka'a hee'llehe. Luxxeka macceessakko'i sagarimdu ki'nnuwwi woronne hee'ulas Waa'innee ixxi Beet Yesuus Kiristoosinnee hee'llakkamo.

²⁵Yesuus Kiristoos niina uwwu neeyyat heer heerinam hee'oo heechcha.

²⁶Ki'nnuwwa huushansiteena yakitam keen yo'i bikkina an ki'nnuwwina kaka kitaaboommuulla.

²⁷Ihukkaarem Kiristoos labu Keesammi Ayyaan ki'nnuwwi woronne yoo bikkina oo ayyaanim ki'nnuwwi woronne hee'imminne qophpha'n woshshi ihoo'n hanqo'i woshshi hundam losisoo bikkina mulli losisaan ki'nnuwwina hasisooyyo. Ee bikkina oo Keesammi Ayyaan losisukkisanne ijaajantakku'uuyyi Kiristoosanne hee'llehe.

²⁸Kabadem i ooso, Moollanni ka uulla daba'llaa waaroo ammane ixxi illagenne tuulloo'n iggimminne uullinoommisina ixxonne qoxxitakka'a hee'llehe.

²⁹Kiristoos muccur ihukkisa laqqakkolas muccuroominne hee'ookkok hundim Waa'ina qachchi ihukkisa qoossitakka'a laqqakkamo.