Read Hadiyya 1Yohaannis Asso 3 Bible Online

1Yohaannis Asso 3 - Hadiyya bible

1Yohaannis Asso 3

¹ Waa'i neese hinkaa'nna iittuda'e sawwi'llehe. Ixxi neese lobakata iittu bikkina Waa'i ooso yamammaa weeshammoommi gada'a siixxinaammo. Eeyya, hanqinam neese Waa'i ooso. Ka uulli manni Waa'a neese laqqambee'i bikkina Waa'am laqqamoyyo.

²Iittantakko'oo i qarmanna, kaba neese Waa'ina ooso. Ihukkaarem lasage hinkid inkoomda'e qoossinaa lanqoommoyyo. Ihona bagaan Yesuus ka uulla waaroo ayyaamo ixxi gagoomam moo'nnoommi bikkina neesem ixxo lamboommisa lanqoommo.

³Eekka mixoo hundim Kiristoos muccur ihukkisam muccur ihimmi hasisookko.

⁴Baaxiilo yimmi Waa'ina ijaajancha sabimmi ihu bikkina baaxiilo baxookkok hundim Waa'i ijaajo gindaakkoo bi'isichcho.

⁵ Kiristoos mannika baaxiilo shiinsheena waarukkisa laqqakkamo. Ixxonnem baaxiil bee'ane.

⁶Ee bikkina Kiristoosanne hee'ookkok baaxiilo baxooyyo. Ihukkaarem baaxiilo baxookkok ayyim hore'em ixxo moo'ukkoyyo te'im la'ukkoyyo.

⁷I ooso, ayyim ki'nnuwwa huushansoone. Kiristoos muccur ihukkisam ayyim muccurooma baxookkok muccura.

⁸Siriinsim Sheexaanchi jora issichchi ihu bikkina jora issookkok hundichchim Sheexaanchane. Waa'i Beet waarukkok Sheexaanchika baxo gindeenatte.

⁹Waa'iinsi qaramukkaannonne Waa'i qoocci yoo bikkina baaxiilo baxooyyo. Ixxi Waa'i qachchi ihu bikkina baaxiilo baxeena xanooyyo.

¹⁰Waa'i oosoo Sheexaa'n oosoo annanni issinaa lanqeena xannoommok kanninnette. Er baxo baxoobee'ek te'im ixxi abbaayyo iittoobee'ek Waa'ina qachchoyyo.

¹¹ Ki'nnuwwi luxxekam macceessakko'i sagar «Ki'nnena'i ki'nnem iittammehe» yoo sagara.

¹² Neese ee joriinsi asse'amaa ixxi abbaayyo Aabeela shu Qaayeela lamboone. Qaayeel ixxi abbaayyo Aabeela shukkok ixxi bax jor ihaa ixxi abbaayyik bax danaam ihu bikkinatte.

¹³Ee bikkina iyyabbaayyuwwa, Waa'a laqqambee'i ka uulli minaadab ki'nnuwwa sabbota'n maalaltakkotte.

¹⁴ Neese niyyabbaayyuwwa iittinummi bikkina lehiinsi heechchanne filloommisa lanqoommo. Ayyim ixxi abbaayyo iittoobee'ek kabad afeebe'em hee'ookkok leh woronnette.

¹⁵Ixxi abbaayyo iittoobee'ek manna shaakkoohane; manna shukkokim heer heerina hee'oo heechchanne hee'oobee'isa laqqakkamo.

¹⁶Iitti mada'e ihukkisa lanqeena xannoommok Kiristoos ni bikkina lehukkisa la'imminnette. Ee bikkina neesem niyyabbaayyuwwi bikkina ni foore higinsaa uwwimmi hasisookko.

¹⁷Mat ka uulli amaxxi yoo manchidu ixxi abbaayyina mat luwwi hawwisukkisa la'ukkuuyyim ixxi wodanonne ixxi abbaayyina qishixximma sabaa moguta'n Waa'a iitteena hinkid xanoo?

¹⁸I ooso, neese hanqo'isa baxinnem iittammona bagaan xale'i suuminne iittammoone.

¹⁹Eehaara'i neese hanqiinsette inkummisaa Waa'i illage tuulloo'n iggimminne aangoommisaa lanqoommok kanninnette.

²⁰Ni tiirimdu neese acceeqasoohan ihulas Waa'i ni tiiriinsi lobakata loban ihukkisaa hundi luchchom la'oo'isaa lanqoommo.

²¹Iittantakko'oo i qarmanna, ni tiirimdu neese acceeqasoobee'an ihulas Waa'i illage tuulloo'n iggimminne aangoommo.

²²Neese Waa'i ijaajo egelloommi keenoo ixxom liiransoo baxo banxoommi keenoo inkummi bikkina Waa'a xa'mminummi luwwi hundam siixxinoommo.

²³ Oo Waa'i ijaajim neese ixxi Beet Yesuus Kiristoosanne amma'nninoommisinatte; odim ixxi neese ijaajukkisam neesena'i neesem iittammoommisinatte.

²⁴Waa'i ijaajo egettam keen hundim Waa'inne maqire hee'llamo. Waa'im ixxuwwinne maqire hee'ookko. Neesem Waa'i ni woronne yoo'isa lanqoommok ixxi niina uwwu Keesammi Ayyaaninnette.